Saida mak Jesus nia haree kona-ba buat polítiku?
EMA sira neʼebé hakerek Evanjellu fó sai kona-ba akontesimentu balu durante Jesus halaʼo ninia serbisu haklaken iha rai. Akontesimentu sira-neʼe hatudu kona-ba oinsá Jesus hatán, kuandu situasaun ruma mosu neʼebé bele halo nia envolve an iha buat polítiku. Porezemplu, lakleur depois Jesus hetan batizmu, kuandu nia maizumenus tinan 30, Diabu oferese ba Jesus pozisaun atu sai ukun-naʼin ba mundu neʼe. Iha tempu seluk kuandu Jesus halaʼo ninia serbisu haklaken, ema-lubun hakarak foti nia sai liurai. Iha tempu seluk tan, ema koko obriga Jesus atu apoia sira-nia ideia ruma kona-ba polítiku. Mai ita haree akontesimentu sira-neʼe.
Ukun-naʼin ba mundu neʼe. Evanjellu sira hatete katak Diabu oferese ba Jesus pozisaun atu sai ukun-naʼin ba “mundu nia reinu hotu-hotu”. Se Jesus simu pozisaun neʼe, ita bele fiar katak nia bele ajuda ema hotu neʼebé iha terus laran. Maski nuneʼe, Jesus la simu. Ema neʼebé fiar katak governu bele ajuda ema, nia sei simu duni oportunidade neʼe atu sai ukun-naʼin. (Mateus 4:8-11) Tanba ita hatene katak Jesus hanoin ema hotu nia susar, ita bele fiar katak nia iha razaun diʼak atu la simu buat neʼebé Diabu oferese ba nia.
Liurai. Ema barak neʼebé moris iha Jesus nia tempu, hakarak tebes atu iha ukun-naʼin neʼebé bele rezolve sira-nia problema kona-ba ekonomia no polítiku. Tanba sira haree katak Jesus iha kapasidade, sira hakarak Jesus atu hola parte iha buat polítiku nian. Saida mak Jesus halo? Apóstolu João hatete: “Wainhira nia hatene katak sira atu kaer nia hodi foti nia nuʼudar liurai, Jesus subar an mesak hodi fila fali ba foho.” (Joao 6:10-15) Klaru katak Jesus lakohi envolve an iha buat polítiku.
Apoia ema nia ideia kona-ba polítiku. Hanoin toʼok buat neʼebé akontese loron balu antes ema oho Jesus. Fariseu nia dixípulu sira neʼebé hakarak hetan independénsia husi Roma, hamutuk ho grupu Herodes nian neʼebé apoia Roma, koʼalia ba Jesus. Sira hakarak obriga Jesus atu apoia sira-nia opiniaun kona-ba polítiku. Sira husu ba Jesus se ema judeu tenke selu impostu ba nasaun Roma ka lae.
Dixípulu Marcos hakerek Jesus nia resposta, Jesus hatete: “‘Tansá imi koko haʼu? Lori osan mai haʼu atu haʼu bele haree!’ Sira lori osan mai. Nia dehan ba sira, ‘Ida-neʼe sé-nia ilas no hakerek?’ ‘César nian.’ sira hatán. Neʼe duni, Jesus dehan ba sira, ‘Fó fali ba César buat neʼebé César nian; no ba Maromak buat neʼebé Maromak nian!’” (Marcos 12:13-17) Livru ida (Church and State—The Story of Two Kingdoms) fó komentáriu kona-ba Jesus nia resposta, livru neʼe hatete katak Jesus lakohi atu sai ema-boot iha governu. No Jesus hatudu ho klaru katak iha lei sira husi governu neʼebé ita presiza halo tuir, no iha lei sira husi Maromak neʼebé ita presiza halo tuir.
Maski Jesus la envolve an iha buat polítiku, maibé ida-neʼe la dehan katak nia la hanoin kona-ba ema nia terus. Tuir loloos, Bíblia hatudu katak Jesus hanoin tebetebes ema sira neʼebé hasoru susar. (Marcos 6:33, 34) Maski Jesus hanoin tebes sira neʼebé iha terus laran, maibé nia la envolve an iha buat polítiku hodi halo buat ruma atu halakon ema nia problema hotu iha tempu neʼebá.
Hanesan ezemplu sira-neʼe hatudu, ita bele haree ho klaru katak Jesus lakohi envolve an iha buat polítiku nian. Maibé oinsá ho ema kristaun sira ohin loron? Saida mak sira tenke halo?