Ohin loron, ema kristaun bele hola parte iha buat polítiku ka lae?
OHIN loron, ema kristaun loos la hola parte iha buat polítiku. Tanbasá? Tanba sira halo tuir Jesus nia ezemplu. Jesus hatete kona-ba nia an: ‘Haʼu laʼós mundu neʼe nian.’ No kona-ba ninia dixípulu sira, Jesus hatete: “Sira laʼós mundu neʼe nian.” (Joao 15:19; 17:14) Hanoin toʼok kona-ba razaun balu tanbasá mak ema kristaun sira labele envolve an iha buat polítiku.
1. Ema nia matenek latoʼo. Bíblia hatete katak ema la iha matenek ka direitu atu ukun an rasik. Profeta Jeremias hakerek: “Ema la iha kbiit atu hili nia dalan rasik. Ema neʼebé laʼo, mós la iha kbiit atu hili ninia hakat.”—Jeremias (Yeremia) 10:23.
Maromak la kria ema hodi bele semo hanesan manu sira, nuneʼe mós, Maromak la kria ema atu bele ukun an rasik. Ema matenek ida naran David Fromkin, iha ninia livru (The Question of Government), nia koʼalia kona-ba buat neʼebé governu la bele halo. Nia hatete katak tanba ema mak ukun governu sira, dala barak sira-nia hakaʼas-an la hetan susesu. Maski sira iha kbiit, maibé sira la bele halo buat hotu neʼebé sira hakarak. Ho ida-neʼe ita bele komprende tanbasá mak Bíblia fó avizu mai ita atu la tau ita-nia fiar ba ema.—Salmo (Mazmur) 146:3.
2. Anju aat sira book ukun-naʼin sira. Kuandu Satanás oferese ba Jesus pozisaun atu ukun mundu, Jesus la nega katak mundu nia ukun hotu-hotu mak Diabu nian. Tuir loloos, iha situasaun ida Jesus bolu Satanás nuʼudar “ukun-naʼin mundu neʼe nian”. No tinan balu depois neʼe, apóstolu Paulo temi Satanás nuʼudar “maromak mundu neʼe nian”. (Joao 14:30; 2 Korinto 4:4) Paulo hakerek ba ninia maluk kristaun hodi dehan katak ita luta “hasoru kbiit-naʼin sira, hasoru ukun-naʼin sira mundu neʼe nian neʼebé iha nakukun laran, hasoru grupu espíritu neʼebé aat iha lalehan”. (Efeso 6:12, MF) Sin, maski ita la haree, maibé tuir loloos Diabu no ninia anju aat sira mak ukun mundu neʼe. Oinsá mak ida-neʼe kona ita-nia haree kona-ba buat polítiku?
Hanoin toʼok kona-ba ezemplu neʼe: Hanesan laloran boot baku bero bá-mai, anju aat sira neʼebé iha forsa boot bele book makaʼas governu sira. Ró-naʼin la bele halo buat ida atu kontrola laloran boot, nuneʼe mós ho polítiku-naʼin sira la bele halo buat ida atu hapara anju aat sira atu halo buat aat iha mundu neʼe. Anju aat sira-neʼe nia hakarak mak atu book ema hotu atu halo buat neʼebé aat no hamosu ‘susar ba rai’. (Apokalipse 12:12) Tan neʼe, atu situasaun aat iha mundu neʼe bele troka, ita presiza ida neʼebé iha forsa boot liu fali Satanás no ninia anju aat sira. Maromak Jeová mak Ida neʼebé iha forsa boot liu.—Salmo 83:18; Jeremias 10:7, 10.
3. Ema kristaun loos apoia deʼit Maromak nia Ukun: Jesus no ninia dixípulu sira hatene katak iha tempu neʼebé Maromak deside ona, Maromak sei harii governu ida iha lalehan neʼebé sei ukun mundu tomak. Bíblia bolu governu neʼe Maromak nia Reinu, ka ukun, no fó sai katak Maromak hili Jesus Kristu atu sai Liurai. (Apokalipse 11:15) Ukun neʼe sei ajuda ema hotu. Nuneʼe, kuandu Jesus halaʼo ninia serbisu haklaken iha mundu, nia koʼalia liuliu kona-ba “lia-foun diʼak Maromak nia reinu nian”. (Lucas 4:43) Jesus mós hanorin ninia dixípulu sira atu halo orasaun ba Maromak hodi dehan: “Halo Ita-nia reinu toʼo mai ami.” Tanbasá? Tanba liuhusi Ukun neʼe, Maromak sei halaʼo nia hakarak iha rai, nuʼudar iha lalehan.—Mateus 6:9, 10.
Saida mak sei akontese ba ema nia governu? Bíblia fó-hatene katak governu “sira hotu rai neʼe nian” sei lakon. (Apokalipse 16:14; 19:19-21) Se ema ida fiar duni katak lakleur tan Maromak nia Ukun sei halakon ema nia governu sira, ema neʼe sei lakohi duni atu apoia governu sira-neʼe. Tanba se nia hili atu apoia ema nia governu neʼebé nia hatene sei lakon, tuir loloos neʼe hanesan nia kontra hasoru Maromak rasik.
Agora ita komprende tansá ema kristaun loos la hola parte iha buat polítiku. Maibé ida-neʼe dehan katak sira la halo buat ida atu ajuda sira-nia komunidade ka lae? Mai ita haree resposta iha informasaun tuirmai.
[Liafuan neʼebé foti husi pájina 7]
Testemuña ba Jeová apoia Maromak nia Ukun, laʼós ema nian