Oinsá mak ema kristaun nia mensajen ajuda komunidade?

IHA informasaun sira neʼebé ita foin lee, esplika tanbasá mak ema kristaun loos sira la hola parte iha buat polítiku. Maibé, oinsá mak ema kristaun sira bele hatudu katak sira hakarak ajuda komunidade? Dalan ida mak hodi halo tuir Jesus nia mandamentu atu: “Laʼo bá, hanorin ema husi nasaun hotu-hotu atu sai dixípulu; sarani sira hodi Aman, Oan no espíritu santu nia naran, hanorin sira atu halo tuir buat hotu neʼebé haʼu haruka imi.”—Mateus 28:19, 20, MF.

Tuir loloos, Jesus nia mandamentu atu “hanorin ema . . . sai dixípulu”, no atu sai hanesan masin no naroman ba mundu, neʼe iha ligasaun ba malu. (Mateus 5:13, 14) Oinsá? No oinsá mak ema kristaun nia serbisu ajuda ema seluk?

Oinsá mak Kristu nia mensajen bele kompara ho masin no naroman?

Hanesan masin bele ajuda atu halo hahán tahan ba tempu kleur, nuneʼe mós mensajen neʼebé Jesus haruka ninia dixípulu sira atu hatoʼo, bele ajuda ema. Oinsá? Sira neʼebé simu no halo tuir Jesus nia hanorin proteje sira-nia an husi hahalok aat sira. Sira aprende atu sees an husi hahalok ruma neʼebé bele estraga sira-nia saúde hanesan fuma, no sira haburas hahalok diʼak hanesan domin, dame, pasiénsia, laran-diʼak, no laran-luak. (Galasia 5:22, 23) Hahalok diʼak sira-neʼe halo sira sai sidadaun neʼebé diʼak. Ema kristaun sira neʼebé hola parte atu hatoʼo mensajen neʼe, ajuda duni sira-nia komunidade.

Jesus mós kompara ema kristaun sira ho naroman. Oinsá mak sira halo ida-neʼe? Hanesan fulan haleno loro-matan nia naroman, nuneʼe mós Kristu nia dixípulu sira haleno “naroman” husi Maromak Jeová. Sira halo ida-neʼe liuhusi sira-nia hahalok diʼak no sira-nia serbisu haklaken.—1 Pedro 2:12.

Jesus mós esplika buat neʼebé hanesan entre sai dixípulu no sai mundu nia naroman. Jesus dehan: “Ema la sunu lakan ahi-oan hodi tau iha okos, maibé tau iha ahi-oan fatin atu leno ema hotu iha uma laran. Nuneʼe, imi-nia [naroman] sei nabilan mós hanesan neʼe iha ema sira oin.” Klaru katak kuandu ahi-oan tau iha ninia fatin, ema hotu iha uma laran bele haree ninia naroman. Hanesan neʼe mós, ema hotu husi komunidade tenke haree ema kristaun sira-nia serbisu haklaken no hahalok diʼak. Tanbasá? Jesus hatete katak sira neʼebé haree neʼe sei fó glória ba Maromak.—Mateus 5:14-16.

Ema kristaun hotu nia responsabilidade

Kuandu Jesus dehan: ‘Imi mundu nia naroman’ no ‘imi-nia naroman sei nabilan’, tuir loloos nia koʼalia ba ninia dixípulu sira hotu. Klaru katak fiar-naʼin balu deʼit husi relijiaun sira, la bele kumpre Jesus nia mandamentu neʼe. Testemuña ba Jeová hamutuk naʼin-7.000.000 husi rai 235 liu, hakaʼas an atu fó “naroman”. Sira komprende katak serbisu atu hatoʼo Jesus nia mensajen mak Testemuña hotu nia responsabilidade.

Testemuña ba Jeová haklaken liuliu kona-ba saida? Kuandu Jesus haruka ninia dixípulu sira atu haklaken, nia la haruka sira atu envolve an iha buat polítiku ka halo mudansa ruma iha sira-nia komunidade. Nia mós la haruka sira atu apoia relijiaun no polítiku neʼebé serbisu hamutuk. Duké halo nuneʼe, Jesus hatete: “Lia-foun reinu nian neʼe, ema sei haklaken iha mundu tomak hodi fó sasin ba povu hotu.” (Mateus 24:14) Tan neʼe, hodi halo tuir Jesus nia mandamentu, ohin loron ema kristaun loos nafatin haklaken ba ema kona-ba Maromak nia Reinu, ka ukun. Sira hatene katak Maromak nia Ukun deʼit mak bele halakon Satanás nia mundu aat neʼe no halo mundu sai fali fatin kapás neʼebé iha justisa.

Tuir loloos, kuandu ita lee istória sira iha Evanjellu, ita bele haree buat rua neʼebé Jesus halo iha ninia serbisu haklaken neʼebé ema kristaun loos sira halo tuir ohin loron. Ita sei haree ida-neʼe iha informasaun tuirmai.

[Liafuan neʼebé foti husi pájina 8]

Oinsá mak ema kristaun nia mensajen bele kompara ho masin?

[Liafuan neʼebé foti husi pájina 9]

Oinsá mak ema kristaun nia mensajen bele kompara ho ahi-oan iha fatin neʼebé nakukun?