Koʼalia hamutuk kona-ba Bíblia—Ema diʼak hotu bá lalehan ka lae?
TESTEMUÑA BA JEOVÁ kontente atu koʼalia kona-ba Bíblia ho ema seluk. Ita iha pergunta ruma kona-ba Bíblia ka lae? Ita hakarak hatene liután kona-ba saida mak Testemuña ba Jeová fiar ka lae? No Ita hakarak hatene tanbasá mak sira halaʼo sira-nia fiar iha dalan neʼebé la hanesan ho relijiaun seluk? Se nuneʼe, Ita bele husu pergunta sira-neʼe kuandu Ita hasoru Testemuña ba Jeová. Sira sei kontente atu esplika ba Ita resposta ba pergunta sira-neʼe.
Tuirmai mak ezemplu ida neʼebé hatudu Testemuña ba Jeová ida koʼalia ho ema seluk kona-ba tópiku husi Bíblia. Hanoin toʼok katak Testemuña ida naran Marcos koʼalia hamutuk ho mane ida naran Roberto.
Sira neʼebé bá lalehan sei halo saida iha neʼebá?
Marcos: Se Ita haree situasaun iha mundu neʼe, tuir Ita-nia hanoin, buat hotu iha mundu neʼe sei sai diʼak fali ka sei sai aat liután?
Roberto: Haʼu hanoin, buat hotu iha mundu neʼe sei sai diʼak fali, no haʼu hein atu bá lalehan hodi hamutuk ho Maromak.
Marcos: Ida-neʼe kapás tebes. Bíblia mós koʼalia dala barak kona-ba lalehan fatin oinsá, no atu moris iha lalehan mak oportunidade espesiál tebes. Ita hatene sira neʼebé bá lalehan sei halo saida iha neʼebá?
Roberto: Ita sei hamutuk ho Maromak no sei hahiʼi nia ba nafatin.
Marcos: Ita sei kontente duni atu halo ida-neʼe, loos ka lae? Maibé tuir loloos, maski Bíblia hatete katak atu moris iha lalehan mak oportunidade espesiál, maibé Bíblia mós dehan katak sira neʼebé sei moris iha neʼebá sei simu responsabilidade neʼebé importante.
Roberto: Responsabilidade saida?
Marcos: Mai ita haree kona-ba neʼe iha Bíblia, iha Apokalipse 5:10. Eskritura neʼe hatete: “Hodi halo sira sai reinu no amlulik ba ita-nia Maromak no atu ukun raiklaran tomak.” Tuir eskritura neʼe, responsabilidade saida mak sira neʼebé bá lalehan sei simu?
Roberto: Eskritura neʼe hatete katak sira sei sai nuʼudar liurai no ukun raiklaran tomak.
Marcos: Sin, neʼe loos.
Sira sei ukun sé?
Marcos: Entaun, se sira neʼebé sei bá lalehan sei ukun nuʼudar liurai, karik Ita mós hanoin, sira sei ukun sé? Tanba la bele iha governu se la iha povu atu ukun, loos ka lae?
Roberto: Sin, haʼu komprende ida-neʼe.
Marcos: Entaun, loloos sira sei ukun sé?
Roberto: Karik ita sei ukun ema iha rai neʼebé seidauk bá lalehan.
Marcos: Karik neʼe loos, se Ita hanoin katak ema hotu neʼebé diʼak sei bá lalehan. Maibé oinsá se ema diʼak balu sei la bá lalehan? Tuir Ita-nia hanoin, ida-neʼe bele akontese ka lae?
Roberto: Haʼu seidauk rona kona-ba neʼe.
Marcos: Haʼu husu kona-ba neʼe tanba buat neʼebé Bíblia hatete iha Salmo (Mazmur) 37:29. Ita hakarak lee eskritura neʼe ka?
Roberto: Bele. Eskritura neʼe hatete: “Ema loos rasik sei simu rai, no sira sei moris ba nafatin iha neʼebá.”
Marcos: Obrigadu. Husi eskritura neʼe, ema diʼak sira sei hela iha neʼebé?
Roberto: Sira sei hela iha rai.
Marcos: Loos, no sira sei la hela iha rai ba tempu uitoan deʼit, tanba eskritura neʼe mós hatete: “Sira sei moris ba nafatin iha neʼebá.”
Roberto: Maibé, karik neʼe tanba sempre iha ema diʼak sira neʼebé moris iha rai. No se ita mate bá lalehan, karik ema diʼak sira seluk sei moris no troka fali ita.
Marcos: Ema barak mós karik hanoin hanesan neʼe. Maibé eskritura neʼe dehan katak ema diʼak sira sei moris ba nafatin iha rai. Tuir Ita-nia hanoin, neʼe katak sá?
Roberto: Haʼu ladún komprende ida-neʼe.
Moris iha rai neʼebé kapás
Marcos: Mai ita haree eskritura seluk no haree toʼok saida mak ida-neʼe hatete kona-ba ema nia moris iha rai. Mai ita lee iha Apokalipse 21:4. Eskritura neʼe koʼalia kona-ba ema nia moris iha futuru, hatete: “Nia [Maromak] sei hamaran sira-nia matabeen husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian liu tiha ona.” Neʼe mak futuru neʼebé kapás tebes, loos ka lae?
Roberto: Sin. Maibé haʼu hanoin, neʼe koʼalia kona-ba ema nia moris iha lalehan.
Marcos: Maski sira neʼebé bá lalehan sei simu bensaun neʼebé atu hanesan, maibé haree fali eskritura neʼe. Tuir eskritura neʼe, saida mak sei akontese ba mate?
Roberto: Iha neʼe hatete katak “mate la iha ona”.
Marcos: Loos. Hanoin toʼok kona-ba ida-neʼe, se buat ruma “la iha ona”, neʼe katak uluk buat neʼe iha, loos ka lae?
Roberto: Loos.
Marcos: Maibé iha lalehan mate la iha, loos ka lae? Só iha rai deʼit mak ema mate.
Roberto: Em, karik haʼu tenke hanoin lai kona-ba neʼe.
Marcos: Tuir loloos, Bíblia hanorin katak ema diʼak balu sei bá duni lalehan, maibé barak liu sei moris ba nafatin iha rai. Karik Ita mós rona ona Jesus nia liafuan tuirmai neʼe: “Ksolok ba sira neʼebé laran-kmaus, basá sira sei simu rai nuʼudar liman-rohan.”—Mateus 5:5.
Roberto: Sin, haʼu rona beibeik ona ida-neʼe iha ami-nia igreja.
Marcos: Se ema laran-maus sira sei simu rai nuʼudar liman-rohan, ida-neʼe hatudu katak sei iha duni ema neʼebé sei hela iha rai, loos ka lae? Sira neʼebé sei moris iha rai sei haksolok ho bensaun neʼebé fó-hatene nanis iha livru Apokalipse. Sira sei haree buat diʼak neʼebé sei akontese iha mundu kuandu Maromak halakon buat aat hotu iha mundu neʼe, inklui mós mate.
Roberto: Haʼu komprende. Maibé haʼu sente eskritura ida ka rua deʼit latoʼo ba haʼu atu hatudu katak ida-neʼe loos.
Marcos: Sin, haʼu komprende Ita-nia hanoin. Maibé tuir loloos, iha eskritura barak neʼebé hatudu kona-ba moris iha rai sei sai oinsá iha futuru. Se Ita iha tempu, karik haʼu bele hatudu ba Ita eskritura ida seluk neʼebé haʼu gosta.
Roberto: Bele.
“Ema laran-aat sira sei la iha ona”
Marcos: Ohin ita lee ona eskritura iha Salmo 37:29. Agora mai ita lee tan iha Salmo 37:10, 11. Ita bele lee eskritura neʼe?
Roberto: Bele. Neʼe hatete: “No tempu uitoan tan, ema laran-aat sira sei la iha ona, no imi sei hateke duni ba ninia fatin, no nia sei la iha. Maibé ema laran-maus sei simu rai, no sira sei haksolok tebes ho dame neʼebé la iha rohan.”
Marcos: Obrigadu. Tuir versíkulu 11, “ema laran-maus”, ka ema diʼak sira sei hela iha neʼebé?
Roberto: Iha neʼe dehan, sira “sei simu rai”. Maibé, haʼu hanoin versíkulu neʼe koʼalia kona-ba ohin loron, tanba agora ema diʼak sira mós moris iha rai.
Marcos: Neʼe loos. Maibé versíkulu neʼe mós hatutan tan katak ema diʼak sira sei haksolok ho “dame neʼebé la iha rohan”. Ohin loron la iha dame iha mundu neʼe, loos ka lae?
Roberto: Loos.
Marcos: Entaun, oinsá mak Maromak nia promete kona-ba dame sei sai loos? Karik haʼu uza ai-knanoik ida. Hanoin toʼok katak Ita iha uma neʼebé Ita fó aluga. Ema balu neʼebé aluga tau matan didiʼak Ita-nia uma, no sira mós hakaʼas an atu hatudu laran-diʼak ba sira-nia viziñu. Ita kontente atu fó aluga Ita-nia uma ba sira. Maibé ema seluk la hanesan neʼe, sira estraga Ita-nia uma no halo susar ba sira-nia viziñu. Se ema sira-neʼe lakohi troka sira-nia hahalok, Ita sei halo saida?
Roberto: Haʼu sei hasai sira.
Marcos: Sin, Maromak mós sei halo ida-neʼe ba ema aat hotu neʼebé hela iha mundu neʼe. Haree fali iha versíkulu 10. Neʼe hatete, “ema laran-aat sira sei la iha ona”. Ida-neʼe katak Maromak sei hasai ema hotu neʼebé fó susar ba ema seluk. Depois neʼe, ema diʼak sira sei moris ho dame iha rai. Haʼu hatene katak ida-neʼe la hanesan ho buat neʼebé uluk Ita hanoin.
Roberto: Sin, la hanesan duni. Haʼu nunka rona kona-ba neʼe iha haʼu-nia igreja.
Marcos: No hanesan Ita hatete ona, latoʼo atu haree eskritura ida ka rua deʼit kona-ba neʼe. Tuir loloos, ita presiza estuda didiʼak saida mak Bíblia tomak hatete kona-ba ema diʼak nia futuru. Maibé husi eskritura sira neʼebé ita foin lee, Ita bele fiar ka lae, katak maski ema diʼak balu sei bá lalehan, maibé barak liu mak sei moris ba nafatin iha rai?
Roberto: Haʼu duvida hela kona-ba neʼe. Maibé husi eskritura sira neʼebé Ita lee ona, haʼu sente katak nuneʼe duni. Haʼu presiza hanoin liután kona-ba neʼe.
Marcos: Nuʼudar Ita hanoin liután kona-ba neʼe, karik Ita bele hanoin kona-ba pergunta seluk tan. Porezemplu, oinsá kona-ba ema diʼak sira neʼebé moris iha tempu uluk? Sira bá lalehan ka lae? Selae, agora sira iha neʼebé?
Roberto: Pergunta sira-neʼe diʼak.
Marcos: Karik haʼu bele fó hela ba Ita eskritura balu neʼebé koʼalia kona-ba neʼe.a Se Ita iha tempu, bele lee nanis no hanoin kleʼan kona-ba eskritura sira-neʼe. No haʼu hakarak atu vizita fali Ita hodi koʼalia hamutuk kona-ba eskritura sira-neʼe. Bele ka lae?
Roberto: Bele. Obrigadu tanba Ita esplika ida-neʼe mai haʼu.
[Nota–rodapé]