Pedro no Ananias bosok​—Saida mak ita bele aprende husi ida-neʼe?

Ita hotu hatene, bosok mak liafuan ruma neʼebé ita koʼalia maski ita hatene katak neʼe la loos. Dala ruma ó bosok ka lae?—a Triste katak dala ruma ema neʼebé hadomi Maromak mós bosok. Karik ó hatene ona ema iha Bíblia laran neʼebé halo nuneʼe. Nia naran Pedro, nia mak ida husi Jesus nia apóstolu naʼin-12. Mai ita haree istória kona-ba tanbasá nia bosok.

Depois ema kaer Jesus, sira lori Jesus ba amlulik boot nia uma. Neʼe kalan-boot ona no Pedro laʼo ba amlulik boot nia uma liʼur no ema ida la rekoñese nia. Maibé kuandu ahi nia naroman kona nia, amlulik boot nia atan-feto ida rekoñese nia, depois dehan: “Ó mós hamutuk ho Jesus.” Maibé tanba Pedro taʼuk, nia nega.

Bíblia hatete katak depois neʼe, “atan-feto seluk haree nia” no dehan: ‘Mane neʼe mós hamutuk ho Jesus.’ Dala ida tan Pedro nega kona-ba neʼe. Liutiha tempu uitoan, ema seluk hakbesik Pedro no hatete: “Loos duni, ó mós sira-neʼe ida.”

Pedro sente taʼuk tebes. Entaun ba dala tolu, nia bosok hodi dehan: “Haʼu la hatene ema neʼe!” Iha tempu neʼe, manu kokoreek. Jesus hateke ba Pedro, no Pedro hanoin-hetan fali buat neʼebé Jesus hatete oras balu liubá. Jesus dehan: “Molok manu kokoreek, ó sei nega haʼu dala tolu.” Iha tempu neʼe, Pedro sente sala no nia tanis.

Loron ida ó mós sei hasoru situasaun hanesan neʼe ka lae?— Karik loron ida iha eskola, ó rona ó-nia kolega sira komesa koʼalia kona-ba Testemuña ba Jeová. Karik sira ida hatete: “Sira la fó sinál ba bandeira.” Depois ida seluk hatete: “Sira la hola parte iha funu.” No ida seluk tan dehan: “Sira laʼós kristaun, tanba la selebra Natál.” Depois sira-neʼe ida husu ba ó: “Ó mós Testemuña ba Jeová, loos ka lae?” Saida mak ó sei hatete?—

Antes ó hasoru situasaun hanesan neʼe, diʼak atu prepara nanis resposta oinsá atu hatán. Pedro la halo ida-neʼe, no kuandu nia hasoru situasaun neʼebé halo nia taʼuk, nia bosok! Depois neʼe nia sente sala tebes ba buat neʼebé nia halo tiha ona no Maromak fó perdua ba nia.

Jesus nia dixípulu ida seluk naran Ananias, nia mós bosok. Maibé Maromak la fó perdua ba nia no ninia feen Safira. Safira mós apoia ninia laʼen hodi bosok. Mai ita haree tanbasá mak Maromak la fó perdua ba Ananias no Safira.

Liutiha loron sanulu depois Jesus husik nia apóstolu sira no fila fali ba lalehan, maizumenus ema naʼin-3.000 mak hetan batizmu iha Jerusalém. Sira barak mai husi fatin dook atu selebra loron Pentekostes, no depois sai tiha Jesus nia dixípulu, sira hakarak hela kleur iha neʼebá atu aprende liután kona-ba sira-nia fiar foun. Tan neʼe, Jesus nia dixípulu balun uza sira-nia osan rasik atu tau matan ba sira.

Ananias no nia feen faʼan sira-nia rai balun atu hetan osan hodi ajuda maluk fiar-naʼin sira neʼebé foin hetan batizmu. Kuandu Ananias lori osan ba apóstolu sira, nia hatete katak nia lori osan hotu husi rai neʼebé nia faʼan. Maibé neʼe la loos tanba nia rai hela osan balun ba ninia an! Maromak fó-hatene ida-neʼe ba Pedro, no Pedro dehan ba Ananias: ‘Ó la bosok deʼit ema, maibé mós ba Maromak!’ Depois neʼe, Ananias monu no mate! Maizumenus liutiha oras tolu, nia feen mai, no nia la hatene saida mak foin akontese ba ninia laʼen. Nia mós koʼalia bosok, no nia mós monu no mate.

Ida-neʼe hanorin ita katak importante tebes atu koʼalia buat neʼebé loos! Sin, ita hotu presiza atu halo ida-neʼe! Maski nuneʼe, ita hotu halo sala, liuliu kuandu ita sei tinan kiʼik. Ó sente kontente ka lae tanba Jeová hadomi ó no nia sei fó perdua ba ó hanesan nia halo ba Pedro?— Maibé la haluha, ita hotu presiza koʼalia buat neʼebé loos. No se ita halo sala neʼebé boot hodi bosok, ita presiza husu perdua husi Jeová. Ita bele fiar katak neʼe mak buat neʼebé Pedro halo, no Maromak fó perdua ba nia. Se ita hakaʼas an atu la koʼalia bosok, Maromak mós sei fó perdua ba ita!