KONA-BA INFORMASAUN IHA OIN | TANSÁ HAROHAN: “HALO ITA-NIA REINU TOʼO MAI AMI”?

Maromak nia Reinu—Ita-Boot hakarak simu bensaun ka lae?

Agora, Ita-Boot hatene ona katak ami Testemuña ba Jeová hafolin duni Maromak nia Reinu. Karik Ita-Boot mós hakarak simu bensaun furak sira neʼebé Maromak nia Ukun sei lori mai. Maibé karik Ita-Boot sei laran-rua hela no hanoin: ‘Haʼu seidauk bele fiar deʼit ba promesa furak sira-neʼe.’

Loos duni, diʼak ba ita hotu atu buka-hatene didiʼak uluklai antes atu fiar ba buat ruma neʼebé ita rona. (Provérbios [Amsal] 14:15) Ita bele halo tuir ema Bereiaa sira-nia ezemplu neʼebé hakerek iha Bíblia. Bainhira sira foin rona liafuan diʼak kona-ba Maromak nia Ukun, sira la fiar kedas tan deʼit gosta rona kona-ba neʼe, maibé sira buka-hatene didiʼak “se buat sira-neʼe loos ka lae”. (Apóstolu 17:11) Sira halo ida-neʼe hodi kompara buat neʼebé sira rona ho liafuan neʼebé hakerek ona iha Eskritura. Ikusmai, sira bele fiar duni katak buat hotu neʼebé sira rona mak loloos mai husi Maromak nia Liafuan.

Hanesan ho ema Bereia, ami Testemuña ba Jeová konvida mós Ita-Boot atu estuda Bíblia hamutuk ho ami. Liuhusi estudu neʼe neʼebé la selu, Ita-Boot bele buka-hatene didiʼak buat neʼebé Testemuña ba Jeová koʼalia kona-ba Maromak nia Ukun hodi kompara ho Bíblia nia hanorin.

Se Ita estuda didiʼak Bíblia, Ita mós bele hatene resposta ba pergunta importante sira neʼebé ema barak husu kona-ba sira-nia moris. Porezemplu:

Ita ema mai husi neʼebé?
Tanbasá mak ita moris?
Tanbasá mak Maromak husik terus?
Saida mak akontese bainhira ita mate?
Loron ida, mundu neʼe sei lakon mohu ka lae?
Oinsá mak haʼu bele halaʼo moris família nian neʼebé kontente?

Liután neʼe, estuda Bíblia mós bele ajuda Ita-Boot atu “hakbesik ba Maromak”. (Tiago 4:8) Hodi nuneʼe, Ita-Boot mós bele hatene ho loloos oinsá mak Maromak nia Ukun sei lori bensaun barak mai ita ema , laʼós deʼit ba ita-nia moris ohin loron, maibé mós ba ita-nia moris iha futuru. Jesus mós temi iha orasaun ba Aman: “Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.”—João 17:3.

Testemuña ba Jeová bele estuda Bíblia ho Ita-Boot hodi uza livru ida-neʼe.

Se Ita-Boot hakarak estuda Bíblia ho ami, husu ba Testemuña ba Jeová ida ka loke ami-nia sítiu www.jw.org/tdt, klik ESTUDU BÍBLIA, prenxe formuláriu hodi husu ami atu vizita Ita-Boot.

a Bereia mak sidade antigu ida iha parte Masedónia.

Nia hafolin Maromak nia Reinu

Foin lalais, labarik-feto ida ho tinan 10, naran Folake, halo TPC hodi hakerek kona-ba ninia istória ho tópiku “Buat neʼebé haʼu hadomi liu iha mundu neʼe”. Folake hakerek kona-ba tansá mak nia gosta tebes atu haklaken Maromak nia Reinu.

Folake hakerek: “Maromak nia Reinu mak governu ida neʼebé iha duni iha lalehan, maibé ita ema labele haree ida-neʼe. Maski uza ókulu espesiál mós la bele haree ho matan!”

Tuirmai, Folake hatutan tan katak nia sei hein ba bensaun barak neʼebé nia sei hetan husi Maromak nia Reinu. Nia konta kona-ba problema balu neʼebé Maromak nia Ukun sei rezolve, hodi hakerek: “Bainhira haʼu haree ema neʼebé la iha hela-fatin no toba deʼit iha dalan ninin, no labarik barak iha rai oioin mate hamlaha, buat hirak-neʼe halo haʼu triste tebes. Maibé bainhira haʼu lee eskritura iha Isaías (Yesaya) 65:21, ida-neʼe halo haʼu kontente fali.” Tanba Eskritura neʼe dehan: “Sira sei harii uma no hela, sira sei kuda toʼos-uvas no han nia fuan.”

Folake mós hein ba tempu neʼebé Maromak nia Ukun mak sei halakon ema nia moras hotu. Nia hakerek tan eskritura iha Apokalipse 21:4, neʼebé dehan katak Maromak “sei hamaran sira-nia matan-been husi sira-nia matan, no mate sei la iha tan, no ema sei la tanis tan ka laran-susar, ka laran-triste”. Folake ramata ninia istória neʼe hodi hakerek liafuan tuirmai neʼe: “Buat neʼebé haʼu hadomi liu iha mundu neʼe mak koʼalia kona-ba Maromak Jeová no Ninia Ukun.” Loos duni, labarik-feto neʼe hadomi tebes Maromak nia Reinu!