Maromak nia Reinu​—Tansá mak Jesus hafolin tebes?

Hanesan Ita-Boot lee ona, loroloron Jesus badinas tebes atu “haklaken no fó sai liafuan diʼak kona-ba Maromak nia Ukun”. (Lucas 8:1) Nia halo ida-neʼe hodi laʼo rai ba fatin oioin iha rai-Izraél tomak. Se ita lee Evanjellu haat neʼebé hakerek kona-ba Jesus nia moris, liafuan Maromak nia Reinu hakerek dala 100 liu no dala barak mak temi fali Jesus nia liafuan rasik. Maibé Jesus nia liafuan uitoan deʼit mak hakerek tiha iha Evanjellu laran, tanba loloos iha Jesus nia moris tomak nia temi Maromak nia Reinu dala barak tebes toʼo sura la bele!—João 21:25.

Tanbasá mak Jesus hafolin tebes Maromak nia Reinu? Razaun ida tanba Jesus hatene ona katak Maromak hili ona nia atu sai Liurai ba Reinu neʼe. (Isaías [Yesaya] 9:6; Lucas 22:28-30) Maibé neʼe laʼós katak Jesus hakarak hatudu an ka simu glória husi ema. (Mateus 11:29; Marcos 10:17, 18) Nia nunka buka diʼak ba ninia an maibé nia hadomi ninia Aman no ema. Tan neʼe husi uluk kedas toʼo ohin loron,a nia hafolin Maromak nia Reinu tanba Reinu neʼe sei lori ksolok ba ninia Aman no dixípulu sira.

REINU HALO SANTU AMAN NIA NARAN

Jesus hadomi tebes ninia Aman iha lalehan. (Provérbios [Amsal] 8:30; João 14:31) Nia mós hafolin duni Aman nia hahalok furak sira, hanesan domin, hanoin ema, no hadomi justisa. (Deuteronômio [Ulangan] 32:4; Isaías [Yesaya] 49:15; 1 João 4:8) Jesus hakribi tebes lia-bosok kona-ba ninia Aman neʼebé habelar iha mundu neʼe, porezemplu ema dehan “Maromak la hanoin ema nia terus”, no “Susar neʼebé kona ema nia moris tanba Maromak nia hakarak”. Tan neʼe mak Jesus haklaken “liafuan diʼak kona-ba Maromak nia Ukun” tanba nia hatene, aban-bainrua liuhusi Maromak nia Ukun mak sei halo santu Aman nia naran. (Mateus 4:23; 6:9, 10) Maibé oinsá?

Lakleur tan, Maromak Jeová nia Reinu (ka Ukun) sei hadiʼa buat aat hotu neʼebé akontese iha mundu neʼe. Bíblia hatete: “Nia sei hamaran [ema laran-loos] sira-nia matan-been husi sira-nia matan.” Neʼe katak, Nia sei halakon buat hotu neʼebé halo ema nia matan-been suli, tanba “mate sei la iha tan ona, no mós tanis, no hakilar, no moras sei la iha tan ona”. (Apokalipse 21:3, 4) Loos duni, liuhusi ninia Ukun, Maromak sei halakon ema nia susar no terus hotu.b

Tan neʼe mak Jesus hakarak tebes habelar mensajen Reinu nian! Tanba Jesus hatene katak liuhusi Maromak nia Ukun neʼe, ema hotu sei hatene Aman nia kbiit boot no domin kleʼan. (Tiago 5:11) Jesus mós hatene katak Ukun neʼe sei lori bensaun barak ba ema neʼebé halo tuir Maromak nia hakarak.

REINU LORI BENSAUN BA EMA NEʼEBÉ HALO TUIR

Uluk antes Jesus mai toʼo rai, nia hamutuk ona ho Aman iha lalehan. Jesus ajuda ninia Aman atu kria buat hotu-hotu—lalehan ho fitun rihun ba rihun, no ita-nia planeta mundu neʼebé furak tebes nakonu ho animál no ai-horis oioin. (Koloso 1:15, 16) Maski Jesus haksolok ho kriasaun hotu, maibé buat neʼebé fó ksolok liu ba nia mak ita ema.—Provérbios (Amsal) 8:31.

Jesus hadomi tebes ema. Tan neʼe, wainhira nia komesa halaʼo ninia knaar iha rai, nia fó-hatene kedas katak nia mai toʼo rai atu “haklaken liafuan diʼak” ba ema kbiit-laek sira. (Lucas 4:18) Jesus hatudu domin laʼós deʼit ho ninia liafuan, maibé liuhusi ninia hahalok loroloron. Porezemplu, bainhira ema-lubun boot halibur hamutuk hodi rona Jesus nia hanorin, nia “hanoin tebes sira, no nia kura ema sira neʼebé moras”. (Mateus 14:14) Wainhira mane moras-lepra ida ho fiar metin hatete ba Jesus: “Se Ita-Boot hakarak, Ita bele halo haʼu sai moos”, ho domin Jesus kura nia, dehan: “Haʼu hakarak. Sai moos bá.” (Lucas 5:12, 13) Iha loron ida bainhira Jesus haree ninia belun Maria triste tebes tanba Lázaro mate, Jesus “sai laran-triste tebes no neon-susar” toʼo “tanis”. (João 11:32-36) Iha tempu neʼebá, Jesus halo milagre furak ida! Nia halo Lázaro moris fali maski mate ba loron haat ona!—João 11:38-44.

Maski nuneʼe, Jesus hatene katak milagre sira-neʼe lori diʼak ba ema ba tempu uitoan deʼit, tanba loron ida ema neʼebé nia kura sei moras fali, no ema neʼebé nia fó moris-hiʼas sei mate fali. Nia mós hatene katak Maromak nia Ukun deʼit mak bele lori bensaun sira no sei halakon ema nia susar hotu ba nafatin. Tan neʼe mak Jesus la uza ninia tempu hotu atu halo milagre barabarak, maibé nia hanoin liu atu haklaken “liafuan diʼak kona-ba Maromak nia Ukun”. (Mateus 9:35) Milagre sira neʼebé Jesus halo mak haleno buat furak hotu neʼebé sei akontese iha futuru bainhira Maromak nia Reinu toʼo mai rai. Mai ita haree Bíblia nia promesa sira kona-ba tempu neʼe.

• 

  Moras sei la iha tan.

  “Iha tempu neʼebá, matan-delek sira-nia matan sei loke, no tilun-diuk sira-nia tilun sei nakloke duni. Iha tempu neʼebá, ema ain-kudeʼik sei halai hanesan bibi-rusa, ema monok nia nanál sei haklalak ho ksolok.” “La iha ema neʼebé hela iha rai sei dehan: ‘Haʼu moras.’”—Isaías (Yesaya) 33:24; 35:5, 6.

• 

  Mate sei la iha tan.

  “Ema loos sei simu rai, no sira sei moris ba nafatin iha neʼebá.”—Salmo (Mazmur) 37:29.

  “Nia sei tolan mate ba nafatin, no Jeová, Ukun-Naʼin Boot Liu, sei hamaran matabeen husi ema hotu nia matan.”—Isaías (Yesaya) 25:8.

• Ema neʼebé mate ona sei moris fali.

  “Ema hotu neʼebé iha rate laran sei rona nia lian no sai husi rate.”—João 5:28, 29.

  “Maromak sei fó moris-hiʼas ba ema.”—Apóstolu 24:15.

• 

  Ema hotu sei iha hela-fatin no serbisu diʼak.

  “Sira sei harii uma no hela, sira sei kuda toʼos-uvas no han nia fuan. Sira sei la harii uma no ema seluk mak hela, sira sei la kuda no ema seluk mak han. . . . Sira neʼebé haʼu hili sei haksolok boot ho serbisu neʼebé sira halo ho sira-nia liman.”—Isaías (Yesaya) 65:21, 22.

• 

  Funu sei la iha tan.

  “Nia sei hapara funu toʼo rai nia rohan.”—Salmo (Mazmur) 46:9.

  “Nasaun sei la hiʼit surik hasoru nasaun, sira mós sei la aprende tan funu.”—Isaías (Yesaya) 2:4.

• 

  Ema sei la hamlaha tan.

  “Rai sei fó duni modo ho ai-fuan, Maromak, ita-nia Maromak sei fó bensaun mai ita.”—Salmo (Mazmur) 67:6.

  “Sei iha hahán barak iha rai; iha foho-tutun, sei iha barak liután.”—Salmo (Mazmur) 72:16.

• Ema kiak sei la iha tan.

  “Maromak sei la haluha ema kiak sira ba nafatin.”—Salmo (Mazmur) 9:18.

  “Nia sei salva ema kiak neʼebé halerik hodi husu ajuda, no mós ema neʼebé hasoru susar no ema neʼebé la hetan ajuda. Nia sei sente kasian ba ema kiʼik no ema kiak.”—Salmo (Mazmur) 72:12, 13.

Hodi hanoin didiʼak Maromak nia promesa hirak-neʼe, ita bele komprende tansá mak Jesus hafolin tebes Maromak nia Ukun, loos ka lae? Wainhira Jesus sei iha rai, nia koʼalia kona-ba Maromak nia Ukun ba ema hotu neʼebé hakarak rona, tanba nia hatene katak liuhusi Ukun neʼe deʼit mak sei halakon susar hotu neʼebé ita ema hasoru.

Ita-Boot mós kontente ho bensaun hirak-neʼe ka lae? Entaun, oinsá mak Ita bele aprende liután kona-ba Maromak nia Ukun? Ita presiza halo saida deʼit atubele simu bensaun hirak-neʼe? Ita bele hetan resposta ba pergunta hirak-neʼe iha informasaun tuirmai.