Buat hotu laʼo ho diʼak tanba domin

HUSI tempu uluk toʼo agora, Maromak nia povu hotu haksolok hodi han hahán espirituál iha Maromak nia meza liuhusi reuniaun boot sira. No bainhira ita halibur hamutuk hanesan neʼe, ita mós haksolok hodi bele han hahán isin nian hamutuk.

Iha fulan-Setembru 1919, Estudante Bíblia sira halaʼo reuniaun boot ba loron ualu iha Cedar Point, Ohio, Estadus Unidus. Otél sira mak fó fatin ba bainaka sira hela no mós fó hahán ba sira. Maibé tanba Estudante Bíblia rihun ba rihun mós mai tan, ida-neʼe halo serbisu-naʼin barak iha restaurante sira sai estrese no lakohi tan serbisu. Manajer husi restaurante ida husu se Estudante Bíblia balu bele ajuda hein meza sira no barak prontu atu fó ajuda. Irmán ida naran Sadie Green hatete: “Neʼe primeiravés haʼu halo serbisu neʼe, maibé haʼu gosta.”

Durante tinan sira tuirmai, irmaun no irmán barak serbí sira-nia maluk sira hodi ajuda iha departamentu dapur nian atu prepara hahán ba ema neʼebé tuir reuniaun boot. Serbisu hamutuk ho maluk fiar-naʼin sira book joven barak atu halo planu espirituál. Porezemplu, irmán Gladys Bolton ajuda iha departamentu neʼe durante reuniaun boot ida iha tinan 1937. Nia konta dehan: “Haʼu hasoru irmaun-irmán sira husi fatin oioin no haʼu rona oinsá sira manán hasoru sira-nia problema sira. Husi tempu neʼe mak haʼu foin halo planu atu foti pioneiru.”

Irmán Beulah Covey hatete: “Tanba voluntáriu sira hotu fó laran ba serbisu neʼe, buat hotu laʼo ho diʼak.” Maibé dala ruma sira mós hasoru susar sira. Iha tinan 1969, bainhira irmaun Angelo Manera foin toʼo iha estádiu Dodger iha Los Angeles, Kalifórnia mak nia foin hatene katuas sira foti nia atu sai koordenadór ba departamentu dapur nian. Nia hatete: “Haʼu hakfodak tebes ho knaar neʼe.” Hodi prepara ba reuniaun boot neʼe nia presiza arranja atu keʼe baleta naruk ida toʼo dapur ho metru 400 hodi bele liga gas ba dapur.

Iha rai-Serra Leoa iha tinan 1982, voluntáriu sira ulukliu presiza hamoos hotu kampu sira, depois harii dapur hodi uza deʼit sasán neʼebé sira iha. Iha sidade Frankfurt, iha Alemaña iha tinan 1951, irmaun sira iha dalan ida atu la gasta osan barak. Sira aluga komboiu nia ulun ida atu aproveita komboiu nia gas hodi teʼin hahán iha sanan boboot sira. Irmaun-irmán sira serbisu voluntáriu hodi fó hahán ba ema naʼin-30.000 iha oras ida nia laran. Hodi la fó todan ba sira naʼin-576 neʼebé presiza fase bikan sira, ema hotu neʼebé tuir reuniaun boot neʼe lori sira rasik nia kanuru. Iha Yangon, Myanmar, sira neʼebé teʼin la tau ai-manas barak tanba hanoin sira-nia maluk sira neʼebé mai husi rai seluk.

“SIRA HAN HAMRIIK DEʼIT”

Irmán Annie Poggensee simu bensaun ida bainhira nia hein atu foti ninia hahán iha reuniaun boot ida iha Estadus Unidus iha tinan 1950. Nia hatete: “Haʼu hamriik hela besik irmán naʼin-rua no rona sira koʼalia ba malu. Sira dehan sira saʼe ró husi rai-Europa atu mai tuir reuniaun boot.” Irmán rua neʼe konta kona-ba oinsá Jeová ajuda sira hodi toʼo iha reuniaun boot fatin. Annie hatete: “Husi ema hotu neʼebé tuir, haʼu haree irmán rua neʼe kontente liu hotu. Sira la hanoin kona-ba rai-manas ka tempu neʼebé sira hamriik hein hela.”

Iha reuniaun boot sira, dala ruma fatin la toʼo ba ema hotu atu han. Tan neʼe sira tau meza aas sira hodi ema hamriik deʼit no han lalais. Sira dada lona hodi fó mahon ba irmaun-irmán sira. Ema ida neʼebé laʼós Testemuña hatete: “Relijiaun neʼe oin seluk fali. Sira han hamriik deʼit.”

Funsionáriu sira no ema-boot sira husi militár, hakfodak tebes hodi haree Testemuña sira organiza sira-nia an ho didiʼak no lalais. Bainhira militár husi Estadus Unidus ida haree oinsá irmaun-irmán sira serbisu iha dapur iha Yankee Stadium, Novaiorke, nia husu majór Faulkner husi Departamentu Funu Bretaña nian atu bá haree toʼok. Nia bá hamutuk ho ninia feen hodi asiste reuniaun boot “Triumphant Kingdom” iha Twickenham, Inglaterra, iha tinan 1955. Nia hatete katak buat hotu laʼo ho diʼak tanba sira iha domin ba malu.

Ba tinan barak tebes irmaun-irmán sira serbisu makaʼas hodi prepara hahán diʼak no simples ba ema sira neʼebé asiste reuniaun boot sira. Maibé tanba serbisu neʼe, irmaun-irmán barak la bele rona ba programa iha reuniaun boot. Maizumenus iha tinan 1979, sira komesa atu hamenus serbisu iha departamentu neʼe. No husi tinan 1995 sira husu ema hotu neʼebé tuir reuniaun boot sira atu lori sira-nia hahán rasik. Arranju foun neʼe diʼak tanba irmaun-irmán barak neʼebé baibain ajuda prepara hahán, sira bele tuur hodi rona ba programa no ransu ho maluk sira.a

Jeová hafolin tebes sira neʼebé serbisu makaʼas atu serbí sira-nia maluk! Karik irmaun-irmán balu neʼebé uluk ajuda ho serbisu neʼe, hanoin fali tempu neʼebé sira serbisu hamutuk ho domin. Maibé toʼo ohin loron, bele hetan nafatin domin iha ita-nia reuniaun boot sira.—João 13:34, 35.