“Jeová lori imi mai Fransa atu aprende lia-loos”

ANTOINE SKALECKI nia aman serbisu keʼe rai atu buka anar-fatuk. Maibé tanba loron ida nia hetan asidente no la bele serbisu tan, Antoine mak presiza bá atu serbisu oras sia loroloron. Iha tempu neʼebá, Antoine sei kiʼik. Nia ho ninia kuda laʼo bá-mai iha tunel nakukun sira neʼebé naruk metru 500 iha rai okos, hodi lalin anar-fatuk. Dala ida, Antoine mós besik mate tanba rai monu.

Durante tinan 1920 toʼo 1939 ema Polónia barak muda ba rai-Fransa. Antoine nia inan-aman mós muda ba neʼebá. Tanbasá mak sira hakarak bá rai-Fransa? Tanba liutiha Funu Mundiál Primeiru, bainhira rai-Polónia hetan fali independénsia, populasaun aumenta toʼo barak tebes. Maibé iha rai-Fransa, populasaun menus tanba ema barak mate iha funu. No sira presiza ema atu serbisu keʼe anar-fatuk. Tan neʼe, Fransa no Polónia asina kontratu imigrasaun nian iha fulan-Setembru 1919. Toʼo tiha tinan 1931, ema Polónia neʼebé hela iha rai-Fransa aumenta toʼo 507.800. Sira barak hela iha norte, iha área neʼebé ema serbisu keʼe anar-fatuk.

Imigrante sira neʼebé muda ba rai-Fransa la husik sira-nia kostume, inklui mós sira-nia fiar boot ba Bíblia. Antoine, neʼebé agora tinan 90, hatete: “Haʼu-nia avó José koʼalia kona-ba Eskritura Sagrada sira ho respeitu tebes. Nia aprende ida-neʼe husi ninia aman.” Maski ema Fransa la gosta, maibé domingu-domingu família Polónia sira hatais kabeer hodi bá misa, hanesan uluk sira halo iha sira-nia rai rasik.

Iha fatin ida naran Nord-Pas-de-Calais, Estudante Bíblia sira haklaken ho laran-manas husi tinan 1904. Iha fatin neʼe mak ema Polónia sira rona kona-ba lia-loos ba dala primeiru. Husi tinan 1915, livru The Watch Tower tradús no print iha língua Polónia nian fulan-fulan. No husi tinan 1925 livru The Golden Age (agora bolu Matan-moris bá!) mós tradús ona ba língua neʼe. Família barak gosta informasaun husi livru sira-neʼe, no mós livru Maromak nia Arpa iha língua Polónia nian.

Antoine nia família rona kona-ba Estudante Bíblia sira liuhusi ninia tiu neʼebé tuir ninia reuniaun primeiru iha tinan 1924. Iha tinan neʼe mós iha fatin naran Bruay-en-Artois, Estudante Bíblia sira halaʼo reuniaun boot primeiru iha língua Polónia nian. La toʼo fulan ida liutiha neʼe, reprezentante ida husi sede jerál, Joseph F. Rutherford, halaʼo reuniaun ida. Husi ema naʼin-2.000 neʼebé tuir reuniaun neʼe, barak mak husi Polónia. Irmaun Rutherford hatete ba sira: “Jeová lori imi mai Fransa atu aprende lia-loos. Agora, imi ho imi-nia oan sira presiza ajuda ema Fransa! Sei iha ema barak seidauk rona lia-loos, maibé Jeová sei fó haklaken-naʼin sira atu halo serbisu neʼe.”

Maromak Jeová halo nuneʼe duni. Irmaun-irmán sira-neʼe nia badinas haklaken mak hanesan sira-nia badinas atu serbisu keʼe anar-fatuk. Sira balu mós fila ba rai-Polónia atu fahe lia-loos neʼebé sira aprende hanesan Teofil Piaskowski, Szczepan Kosiak, no Jan Zabuda.

Maibé ema Polónia barak hela iha rai-Fransa no kontinua atu haklaken ho laran-manas hamutuk ho sira-nia irmaun-irmán Fransa sira. Iha reuniaun boot ida iha 1926 iha Sin-le-Noble, ema naʼin-1.000 tuir programa língua Polónia nian no ema naʼin-300 tuir língua Fransa nian. Iha livru tinan 1929 Yearbook of Jehovahʼs Witnesses hatete: “Durante tinan neʼe, ema Polónia naʼin-332 hetan batizmu.” Antes Funu Mundiál Segundu, husi kongregasaun hamutuk 84 iha rai-Fransa, 32 mak língua Polónia nian.

Iha tinan 1947, Testemuña ba Jeová barak fila fali ba rai-Polónia. Maski sira barak fila ona, maibé serbisu barak neʼebé irmaun-irmán sira husi Polónia no Fransa halo ho badinas, lori rezultadu diʼak tanba iha tinan neʼe, haklaken-naʼin sira aumenta porsentu 10. Durante tinan 1948 toʼo 1950, haklaken-naʼin sira aumenta porsentu 20, 23 no 40! Atu bele fó treinu ba haklaken-naʼin foun sira-neʼe, sukursál iha rai-Fransa hili irmaun sira atu serbí nuʼudar katuas área nian iha 1948. Husi irmaun naʼin-lima neʼebé sukursál hili, naʼin-haat mak ema Polónia. Irmaun Antoine Skalecki mós sira ida.

Toʼo ohin loron, Testemuña barak iha rai-Fransa lori sira-nia beiʼala sira-nia apelidu Polónia nian. Ohin loron, imigrante barak aprende kona-ba lia-loos iha rai-Fransa. Maski haklaken-naʼin balu hili atu fila fali ba sira-nia rai no balu hela metin iha sira-nia rai foun, sira haklaken ho laran-manas hanesan ema Polónia sira uluk halo.—Husi ita-nia arkivu iha Fransa.