Saida mak ita bele aprende husi Joana?

EMA barak hatene katak Jesus iha apóstolu naʼin-12, maibé tuir loloos iha mós feto barak neʼebé sai Jesus nia dixípulu sira. Ida mak naran Joana.—Mateus 27:55; Lucas 8:3.

Joana halo saida deʼit atu ajuda Jesus iha ninia serbisu haklaken? No saida mak ita bele aprende husi nia?

SÉ MAK JOANA?

Joana mak “Kuza nia feen, Kuza mak ema neʼebé tau matan ba Herodes nia uma”. Joana no feto sira seluk, Jesus kura sira-nia moras. Joana no feto sira-neʼe laʼo hamutuk ho Jesus no ninia apóstolu sira.—Lucas 8:1-3.

Ulun-naʼin sira ba relijiaun judeu nian hanorin katak feto sira la bele ransu no laʼo beibeik ho mane sira neʼebé laʼós sira-nia família no mane la bele koʼalia barak ba feto sira. Maibé Jesus la halo tuir kostume sira-neʼe. Nia husik Joana no feto fiar-naʼin seluk atu tuir sira.

Ema hotu neʼebé hili atu tuir Jesus iha tempu neʼebá presiza halo mudansa iha sira-nia moris. Ba Joana, nia presiza prontu atu hetan goza husi ninia família, kolega sira no komunidade tanba nia ransu hamutuk ho Jesus ho ninia apóstolu sira. Maibé kona-ba ninia dixípulu sira Jesus hatete: “Haʼu-nia inan no haʼu-nia alin sira mak ema sira-neʼe, neʼebé rona Maromak nia liafuan no halo tuir.” (Lucas 8:19-21; 18:28-30) Ita kontente atu hatene katak Jesus sente besik ho ema neʼebé halo sakrifísiu sira hodi bele tuir nia.

NIA UZA NINIA RIKUSOIN RASIK ATU FÓ APOIA

Joana no feto sira seluk “uza sira-nia rikusoin rasik atu fó apoia ba Jesus no ninia apóstolu sira”. (Lucas 8:3) Hakerek-naʼin ida koʼalia kona-ba Lucas nia evanjellu, nia hatete: “Lucas la dehan katak feto sira-neʼe teʼin ba sira, fase bikan no hadiʼa sira-nia roupa. Karik sira halo nuneʼe duni . . . , maibé Lucas la dehan ida-neʼe.” Karik feto sira-neʼe uza sira-nia osan, sasán ka rai atu fó apoia ba sira-nia maluk.

Bainhira Jesus no ninia apóstolu sira haklaken, sira la serbisu atu manán osan. Tan neʼe karik sira-nia osan la toʼo atu selu hahán no buat hotu neʼebé sira presiza ba ema maizumenus naʼin-20. Maski sira-nia maluk fiar-naʼin sira hatudu laran-luak, maibé sira la sadere deʼit ba sira-nia laran-luak neʼe. Ita hatene ida-neʼe tanba dala ruma Jesus ho ninia apóstolu sira lori kaixa osan nian. (João 12:6; 13:28, 29) Karik Joana no feto sira seluk ajuda hodi fó osan nuʼudar kontribuisaun.

Ema balu la konkorda katak feto judeu sira iha Bíblia nia tempu iha sira-nia osan ka rai rasik. Maibé manuskritu antigu nian hatudu katak feto sira iha tempu neʼebá bele simu rikusoin iha dalan oioin. Porezemplu feto ida bele simu liman-rohan se ninia aman neʼebé la iha oan-mane, mate. Ka ema bele fó rai ba nia. Ka osan neʼebé fahe ba nia bainhira nia laʼen soe nia. Ka nia simu osan ka rai husi ninia laʼen neʼebé mate ona ka nia rasik manán osan husi serbisu.

Ita fiar katak Jesus nia dixípulu sira ajuda hodi fó buat neʼebé sira bele. Karik iha mós feto riku balu neʼebé laʼo tuir nia. Ema balu hanoin katak Joana mak feto riku ida, tanba nia mak Herodes nia serbisu-naʼin nia feen. Ita la hatene maibé karik feto riku ida hanesan nia mak fó ba Jesus ninia unuk furak neʼebé la suku hamutuk. Hakerek-naʼin ida hatete katak unuk furak hanesan neʼe, “laʼós mai husi peskadór nia feen”.—João 19:23, 24.

Bíblia la hatete katak Joana fó osan nuʼudar kontribuisaun maibé nia halo deʼit buat neʼebé nia bele halo. Ida-neʼe hanorin saida ba ita? Hili atu fó buat ruma atu apoia serbisu haklaken no saida mak ita deside atu fó, neʼe mak ita-nia desizaun. Buat neʼebé importante ba Maromak mak ita halo deʼit buat neʼebé ita bele, ho laran haksolok.—Mateus 6:33; Marcos 14:8; 2 Korinto 9:7.

APOIA NAFATIN IHA TEMPU JESUS MATE

Bainhira Jesus mate iha ai-riin, karik Joana mós iha neʼebá haree hela. Iha mós feto sira seluk neʼebé ‘baibain laʼo tuir Jesus atu ajuda nia kuandu nia iha Galileia, no mós feto barak seluk neʼebé mai hamutuk nia toʼo Jeruzalein’. (Marcos 15:41) Bainhira ema hatún Jesus nia mate-isin atu hakoi, “feto sira neʼebé laʼo tuir Jesus husi Galileia mós tuir hodi haree rate neʼe no oinsá ema hakoi Jesus nia mate-isin, no sira fila hodi prepara nanis buat morin oioin no mós mina-morin”. Lucas hakerek katak feto sira-neʼe mak Maria Madalena, Joana, no Maria, Tiago nia inan. Loron Sábadu hotu tiha, sira fila fali ba Jesus nia rate hodi haree anju sira neʼebé dehan katak Jesus moris hiʼas ona.—Lucas 23:55–24:10.

Iha loron Pentekostes 33, bainhira Jesus nia dixípulu sira no mós Jesus nia inan no alin sira halibur hamutuk iha Jeruzalein, karik Joana mós iha neʼebá. (Apóstolu 1:12-14) No tanba Joana nia laʼen serbisu ba Herodes, ema balu hanoin katak liuhusi Joana mak Lucas bele hetan informasaun atu hakerek kona-ba Herodes Antipas, liuliu tanba só Lucas deʼit mak temi Joana nia naran iha evanjellu sira.—Lucas 8:3; 9:7-9; 23:8-12; 24:10.

Joana nia istória hanorin ita saida? Nia fó apoia ba Jesus tuir buat neʼebé nia bele halo. Ita bele fiar katak nia kontente se osan neʼebé nia fó bele ajuda Jesus, apóstolu sira no dixípulu sira seluk atu haklaken hamutuk. Joana fó apoia ba Jesus no laran-metin ba nia bainhira Jesus hasoru susar sira. Feto kristaun sira ohin loron bele banati-tuir ninia hahalok diʼak sira-neʼe.