Saida mak akontese depois ita mate?

EMA iha hanoin oioin kona-ba moris no kona-ba saida mak akontese bainhira ema mate. Ema balu hanoin katak bainhira ita mate, parte ruma husi ita-nia isin sei moris hela. Balu tan hanoin katak ema neʼebé mate ona sei moris fali nuʼudar animál ka ema seluk. Iha mós ema neʼebé hanoin katak bainhira mate, buat hotu ramata ona.

Karik Ita mós iha opiniaun rasik, neʼe depende ba Ita-nia kultura, ka buat neʼebé Ita-nia inan-aman hanorin. Tanba ema ida-idak iha opiniaun neʼebé la hanesan, karik Ita husu: ‘Tuir loloos, saida mak akontese depois ita mate? No husi neʼebé mak haʼu bele hetan resposta neʼebé loos?’

Ba tinan atus ba atus, ulun-naʼin relijiaun sira hanorin katak ema iha klamar neʼebé nunka mate. Ema husi relijiaun Katólika, Protestante, Indú, Judeu, Izlaun no relijiaun seluk fiar ba mate-klamar, neʼebé sai husi ema nia isin no moris ba nafatin nuʼudar espíritu. Ema Budista sira fiar katak ema neʼebé mate sei moris fali nuʼudar ema seluk no prosesu neʼe kontinua toʼo ikusmai sira sei hetan kondisaun furak ida neʼebé sira bolu nuʼudar Nirvana.

Hanorin hanesan neʼe halo ema barak iha mundu tomak fiar katak liuhusi mate mak sira bele moris iha mundu seluk. Ba sira, mate mak Maromak nia hakarak no hakat importante ida. Maibé saida mak Bíblia hatete kona-ba neʼe? Haree toʼok informasaun tuirmai. Karik resposta husi Bíblia sei halo ita hakfodak no kontente.