Hakarak hatene?

Tanbasá mak Jesus bolu kontratu-naʼin sira neʼebé faʼan animál iha Jeruzalein nia templu nuʼudar “naʼok-teen sira”?

IHA livru Mateus ita lee katak: “Jesus tama ba templu no duni sai ema sira hotu neʼebé faʼan no sosa iha templu, no nia baku fila meza ema troka osan nian no banku ema faʼan manu-pombu nian. Nia hatete ba sira: ‘Hakerek nanis ona: “Haʼu-nia uma sei bolu nuʼudar uma orasaun nian”, maibé imi halo nia sai fali hanesan naʼok-teen sira-nia knuuk.’”​—Mateus 21:12, 13.

Iha tempu uluk, kontratu-naʼin sira la hatudu laran-moos bainhira sira fila liman, tanba sira faʼan folin neʼebé karun tebes. Porezemplu, baibain manu-pombu sira mak baratu tebes no fasil mós ba ema kiak atu hola hodi uza ba sakrifísiu. Maibé tuir dokumentu judeu sira husi tempu uluk, dehan katak, iha apóstolu sira-nia tempu, ema ida presiza serbisu ba loron 25 mak foin bele hola manu-pombu rua. Neʼe halo susar ba ema kiak sira atu hola manu-pombu tanba karun tebes. (Levítico [Imamat] 1:14; 5:7; 12:6-8) Rabbi ida naran Simeon ben Gamaliel hirus tebes kona-ba neʼe toʼo nia hamenus sakrifísiu sira neʼebé ema tenke hasaʼe. Husi tempu neʼebá, folin sai baratu fali toʼo ema ida presiza serbisu deʼit ba oras tolu atu hola manu-pombu rua.

Husi neʼe ita haree katak kontratu-naʼin sira mak kaan-teen no hakarak hamatak deʼit ema seluk. Tan neʼe mak Jesus bolu sira nuʼudar “naʼok-teen sira”.