Bainhira dezastre akontese

“Foufoun ami sente lakon esperansa. Ami-nia sasán hotu hetan estragu husi rai-halai no bee-saʼe.”—Andrew, husi rai-Serra Leoa.

“Depois anin-fuik, ami fila fali ba uma. La iha sasán ida mak hela. Ami labele koʼalia buat ida. Haʼu-nia oan-feto hakneʼak no tanis.”—David, husi Illa Virjen.

SE ITA hasoru ona dezastre ruma, ita bele komprende vítima sira-nia situasaun hanesan: estrese, la simu realidade, konfuzaun, laran la hakmatek, no mehi aat. Vítima barak mak lakon esperansa no kole atu halaʼo fali moris.

Se Ita lakon buat hotu tanba dezastre, karik Ita mós sei sente hanesan labele tahan estrese no hanoin barak. Karik Ita komesa hanoin katak Ita-nia moris hanesan la iha folin. Maski nuneʼe, Bíblia esplika katak, Ita-nia moris iha folin duni no Ita iha razaun neʼebé diʼak atu nafatin iha esperansa ba futuru.

LIA-LOOS HUSI BÍBLIA FÓ ITA ESPERANSA

Eclesiastes 7:8 hatete: “Buat ida nia rohan mak diʼak liu duké foin hahú.” Bainhira Ita hahú hadiʼa buat hotu depois mosu dezastre, moris hanesan la iha esperansa. Maibé se Ita pasiénsia atu hadiʼa Ita-nia moris, Ita sei hetan rezultadu diʼak.

Bíblia koʼalia kona-ba tempu neʼebé “ema sei la rona tan tanis halerik tanba susar”. (Isaias 65:19) Neʼe sei sai loos bainhira mundu sai paraízu liuhusi Maromak nia Ukun. (Salmo 37:11, 29) Dezastre sei la akontese tan. Ita-nia hanoin kona-ba susar no trauma sei lakon ba nafatin, tanba Maromak Kbiit Boot Liu Hotu promete: “Ema sei la hanoin tan buat uluk nian, no buat sira-neʼe sei la rai nafatin iha ema nia laran.”—Isaias 65:17.

Hanoin toʼok: Ita-nia Kriadór hakarak fó ba ita “futuru kapás no esperansa”, moris neʼebé nakonu ho dame iha Maromak nia Ukun okos. (Jeremias 29:11) Hatene kona-ba lia-loos husi Bíblia bele ajuda ita atu iha moris neʼebé diʼak liu. Sally, neʼebé temi ona, hatete: “Hodi hanoin beibeik kona-ba buat furak neʼebé Maromak nia Ukun sei halo ba ita iha futuru, bele ajuda ita haluha tiha susar neʼebé ita hasoru, no tahan hasoru situasaun neʼebé mosu.”

Ami anima Ita atu aprende liután kona-ba saida mak lakleur tan Maromak nia Ukun sei halo ba ema. Tanba hodi halo nuneʼe, maski dezastre kona Ita, Ita sei sente duni katak moris mak iha folin no nafatin hein ba futuru neʼebé kapás. Maibé ohin loron, Bíblia fó matadalan ba Ita atu ajuda Ita tahan hasoru situasaun neʼebé mosu tanba dezastre. Haree toʼok ezemplu sira tuirmai.

Eskritura husi Bíblia neʼebé bele ajuda

Toba natoon.

“Diʼak liu deskansa uitoan duké serbisu makaʼas demais, tanba neʼe hanesan duni tuir anin.”—Eclesiastes 4:6.

Peskizadór sira hatete, depois hetan tiha trauma, “se ita la toba ho diʼak bele halo aat liu ita-nia sintoma trauma no susar atu halo balansu ita-nia hanoin.” Tan neʼe, matenek atu toba natoon.

Fó sai Ita-nia sentimentu.

“Hanoin resin mak halo ema sente laran-todan [ka, “sente laran-triste,” nota-rodapé], maibé liafuan neʼebé diʼak mak halo ema sente laran-haksolok.”—Provérbios 12:25.

Fó sai Ita-nia sentimentu ba família ka belun neʼebé Ita tau fiar. Hodi rona ba buat neʼebé Ita koʼalia, família ka belun neʼebé besik bele fó sai liafuan neʼebé mak fó kmaan no ajuda.a

Hanoin kona-ba futuru neʼebé diʼak liu.

“Tuir Maromak nia promesa, ita hein lalehan foun no rai foun, no iha neʼebá buat hotu sei tuir justisa.”—2 Pedro 3:13.

a Ema neʼebé mak sente estrese ka hanoin resin ba tempu naruk, karik presiza hetan tratamentu médiku.