“Fó-agradese nafatin”
1 Bainhira Jesus fó isin-diʼak ba ema moras-lepra naʼin-sanulu, sira ida deʼit mak fila mai atu fó-agradese ba Jesus. Jesus husu: “Laʼós ema naʼin-sanulu mak sai moos? Sira naʼin-sia iha neʼebé?” (Lc 17:11-19) Nuneʼe, importante tebes atu fó obrigadu no hatudu agradese ba prezente diʼak hotu neʼebé mai husi ita-nia Aman Jeová iha lalehan, neʼebé iha domin no laran-luak mai ita!—Kol 3:15; Tgo 1:17.
2 Ita presiza fó-agradese ba Maromak Jeová kona-ba saida deʼit? Ita fó-agradese ba Maromak Jeová tanba nia fó ninia Oan Jesus nia moris nuʼudar sakrifísiu, ida-neʼe mak prezente boot liu neʼebé ita simu. (Joao 3:16) Ita mós fó-agradese tanba Maromak Jeová dada ita atu hakbesik ba nia. (Joao 6:44) Buat seluk tan neʼebé halo ita fó-agradese mak ita iha maluk kristaun iha mundu tomak neʼebé adora Maromak hamutuk ho laran ida deʼit. (Sal 133:1-3) Karik, Ita mós bele hanoin kona-ba prezente barak seluk tan neʼebé Maromak Jeová fó mai ita. Ita lakohi sai hanesan ema Izraél sira-neʼebé la fó-agradese hodi haluha buat hotu neʼebé Maromak Jeová halo ba sira!—Sal 106:12, 13.
3 Hatudu agradese: Maski ema moras-lepra naʼin-sanulu hotu karik hafolin buat neʼebé Jesus halo ba sira, sira ida deʼit mak hatudu agradese. (Lc 17:15) Hanesan neʼe mós, ita hatudu agradese hodi halaʼo ita-nia serbisu haklaken ho laran-manas. Se ita agradese duni ba buat hotu neʼebé ita-nia Aman iha lalehan halo mai ita, ida-neʼe sei book ita-nia laran atu halo tuir ninia domin no laran-luak hodi koʼalia ba ema seluk kona-ba nia. (Lc 6:45) Nuneʼe, bainhira ita koʼalia ba ema seluk kona-ba Maromak Jeová nia ‘serbisu neʼebé furak no ninia hanoin mai ita’, ita-nia domin no agradese ba Maromak Jeová sei aumenta liután.—Sal 40:5.
4 Ajuda ema seluk atu fó-agradese: Ita presiza buka oportunidade atu ajuda ita-nia oan no estudante Bíblia atu aumenta sira-nia agradese ba Maromak. Inan-aman iha oportunidade barak atu halo nuneʼe, hanesan bainhira haree Maromak Jeová nia kriasaun hamutuk ho sira-nia oan sira. (Rom 1:20) Kuandu ita halaʼo estudu Bíblia, ita bele husu ba estudante: “Saida mak ida-neʼe hatudu mai ita kona-ba Maromak Jeová nia hahalok?” Bainhira estudante hafolin liután buat neʼebé Maromak halo, ninia domin ba Maromak sei aumenta liután, no nia sei hakarak liután atu halo kontente Maromak.
5 Durante loron ikus sira-neʼe, iha ema barak neʼebé la hatene fó-agradese. (2 Tim 3:1, 2) Maromak Jeová sente kontente tebes bainhira nia haree katak ninia atan sira hatudu agradese hodi halaʼo sira-nia serbisu haklaken ho laran-manas!—Tgo 1:22-25.