Hatudu agradese ba Maromak Ita sei komemora Memoriál iha 17 Abríl
1. Hanesan ema neʼebé hakerek salmu ida, ita sente oinsá durante tempu Memoriál?
1 Tanba Maromak Jeová dala barak hatudu laran-sadiʼa hodi salva nia, ema neʼebé hakerek salmu ida husu: “Saida mak haʼu bele fó ba Jeová ba buat diʼak hotu neʼebé nia halo mai haʼu?” (Sal 116:12) Ohin loron, Maromak nia atan sira iha razaun liután atu hatudu agradese. Tinan atus ba atus liutiha depois hakerek salmu neʼe, Maromak Jeová fó ba ema hotu ninia prezente boot liu hotu, neʼe mak Jesus nia moris nuʼudar sakrifísiu. Nuʼudar ita prepara an atu komemora Kristu nia mate iha loron 17 Abríl, ita iha razaun diʼak atu hatudu agradese.—Kol 3:15.
2. Ita iha razaun saida deʼit atu hatudu agradese ba Jesus nia sakrifísiu?
2 Bensaun husi sakrifísiu: Liuhusi Jesus nia sakrifísiu, ita bele hetan “perdua ba ita-nia sala”. (Kol 1:13, 14) Ita bele adora Maromak Jeová ho laran neʼebé moos. (Ebr 9:13, 14) No ita mós haksolok tanba ita bele koʼalia nakloke ho Maromak Jeová iha orasaun. (Ebr 4:14-16) Sira neʼebé tau fiar ba sakrifísiu neʼe iha esperansa atu moris ba nafatin!—Joao 3:16.
3. Oinsá mak ita bele hatudu agradese ba Maromak Jeová hodi fó Jesus nuʼudar sakrifísiu?
3 Hatudu agradese: Dalan ida neʼebé ita bele hatudu agradese mak hodi lee no hanoin kleʼan programa lee Bíblia nian ba Memoriál. Informasaun ho títulu “Ita prepara an atu komemora loron neʼebé importante liu ka lae?” husi Livru Haklaken Abríl-Juñu 2011 bele ajuda ita atu halo ida-neʼe. Ita mós bele fó-hatene ba Maromak Jeová liuhusi orasaun katak ita hafolin tebes Jesus nia sakrifísiu. (1 Tes 5:17, 18) Ita mós hatudu agradese hodi halo tuir Jesus nia mandamentu atu komemora ninia mate. (1 Kor 11:24, 25) Liután neʼe, ita bele banati-tuir Maromak Jeová nia domin boot hodi konvida ema barak atu tuir Memoriál hamutuk ho ita.—Isa 55:1-3.
4. Saida mak ita hakarak halo?
4 Maromak Jeová nia atan sira la haree Memoriál nuʼudar reuniaun neʼebé baibain deʼit. Sira haree Memoriál nuʼudar reuniaun neʼebé importante liu hotu iha tinan ida nia laran! Nuneʼe, nuʼudar Memoriál sai besik daudauk, mai ita halo hanesan ema neʼebé hakerek salmu ida halo, nia hatete: “Oh, haʼu-nia moris, hahiʼi Jeová bá, no keta haluha ninia hahalok sira.”—Sal 103:2.