Hatudu agradese ba prezente diʼak liu hotu neʼebé Maromak fó
1. Tansá mak ita agradese loos ba Maromak Jeová?
1 Maromak Jeová fó prezente diʼak barak. Maibé prezente neʼebé ‘diʼak liu’ mak hodi fó nia Oan, neʼebé nia hadomi tebes, nuʼudar sakrifísiu. (Tgo 1:17) Ida-neʼe loke dalan ba ita atu hetan bensaun barak, neʼe inklui hetan perdua ba ita-nia sala. (Ef 1:7) Tan neʼe, ita hakarak nafatin hatudu agradese ba Maromak. Durante tempu Memoriál, diʼak atu ita buka tempu atu hanoin kleʼan kona-ba prezente furak ida-neʼe.
2. Oinsá mak Ita bele ajuda família no Ita rasik atu hafolin liután Jesus nia sakrifísiu?
2 Hafolin liután Maromak nia prezente: Atu ajuda Ita-nia família atu halo ida-neʼe, iha semana antes Memoriál iha 30 Marsu, diʼak atu uza ita-nia tempu ba Adorasaun Família nian hodi hanoin fali informasaun kona-ba Jesus nia sakrifísiu. No mós diʼak atu família tomak, loron-loron lee no hanoin kleʼan kona-ba programa lee Bíblia ba Memoriál nian. Ita ida-idak bele hanoin fali kona-ba oinsá Jesus nia sakrifísiu kona Ita-nia moris, oinsá mak Maromak Jeová nia haree kona-ba Ita, ema seluk no kona-ba futuru. Liután neʼe, diʼak atu treinu kanta knananuk rua foun neʼebé sei uza iha Memoriál, knananuk númeru 8 no 109.—Sal 77:12.
3. Oinsá mak ita bele hatudu agradese ba Maromak durante tempu Memoriál?
3 Oinsá ita bele hatudu agradese: Hodi hafolin liután Jesus nia sakrifísiu, ida-neʼe sei book ita atu fó-hatene ema seluk kona-ba Maromak Jeová no nia domin boot hodi haruka nia Oan. (Sal 145:2-7) Durante fulan-Marsu, Abríl, no Maiu, família balu hatudu sira-nia agradese hodi apoia ema ida iha sira-nia família atu nia bele serbí nuʼudar pioneiru ausiliár. Se ita la bele halo ida-neʼe, ita bele ka lae, aumenta liután tempu neʼebé ita uza iha serbisu haklaken? (Ef 5:16) Tan ita agradese ba Maromak, ida-neʼe mós bele book ita atu ajuda ema seluk atu tuir Memoriál hamutuk ita. (Apok 22:17) Ita bele hahú halo lista ba sira neʼebé ita hakarak konvida, hanesan vizita fali, estudante Bíblia, família, maluk serbisu, no viziñu, no mós halo planu atu uza tempu barak liu hodi tuir kampaña espesiál atu fahe konvite Memoriál.
4. Oinsá mak ita bele uza ho matenek tempu Memoriál?
4 Tempu Memoriál fó ita oportunidade diʼak atu hatudu katak ita hafolin tebes prezente neʼebé Maromak Jeová fó ba ita ema. Mai ita uza tempu neʼe no hatudu ita-nia agradese ba Jesus nia sakrifísiu no “Kristu nia rikusoin waʼin” hotu.—Ef 3:8.