Ita sei uza oportunidade neʼe atu hatudu agradese iha tempu Memoriál ka lae?
1. Memoriál fó ba ita oportunidade espesiál saida?
1 Memoriál neʼebé sei halaʼo iha loron 14 fulan Abríl fó oportunidade ba ita atu haburas no hatudu agradese ba Jeová nia laran-diʼak. Istória iha Lucas 17:11-18 hatudu oinsá Jeová no Jesus nia haree kona-ba hahalok agradese. Mane naʼin-10 neʼebé kona moras-lepra hetan isin-diʼak fali, maibé triste katak ida deʼit mak uza oportunidade atu fó agradese. Jesus nia moris nuʼudar sakrifísiu sei kura ita-nia moras hotu iha futuru, no ita sei moris ba nafatin! Iha tempu neʼebá, ita sei fó agradese ba Jeová loroloron tanba bensaun sira-neʼe. Maibé durante semana sira-neʼe, oinsá mak ita bele hatudu ita-nia agradese?
2. Oinsá mak ita bele haburas agradese ba Jesus nia sakrifísiu?
2 Haburas agradese: Kuandu ita sente agradese ba buat ruma, sentimentu neʼe mosu tanba buat neʼebé ita hanoin. Atu ajuda ita haburas ita-nia agradese ba Jesus nia sakrifísiu, ita bele tuir programa lee Bíblia nian ba tempu Memoriál. Programa neʼe bele hetan iha livru Buka-hatene Didiʼak Eskritura Loron-loron no mós iha ita-nia kalendáriu. Ita bele hanoin kona-ba informasaun neʼe hamutuk nuʼudar família ka lae? Halo ida-neʼe bele haburas ita-nia agradese ba Jesus nia sakrifísiu no sei kona ita-nia hahalok iha dalan neʼebé diʼak.—2 Korinto 5:14, 15; 1 João 4:11.
3. Iha dalan saida deʼit mak ita bele hatudu ita-nia agradese durante tempu Memoriál?
3 Hatudu agradese: Ita bele hatudu agradese liuhusi ita-nia hahalok. (Koloso 3:15) Mane neʼebé Jesus kura ninia moras-lepra, nia bá buka Jesus atu fó obrigadu. Klaru katak nia mós konta ho laran-manas ba ema seluk kona-ba oinsá nia hetan isin-diʼak. (Lucas 6:45) Ita-nia agradese ba Jesus nia sakrifísiu sei book ita hola parte ho laran-manas atu fahe konvite ba Memoriál ka lae? Ita mós bele hatudu ita-nia agradese hodi foti pioneiru estra ka aumenta ita-nia haklaken durante tempu Memoriál. Iha kalan neʼebé halaʼo Memoriál, ita-nia laran neʼebé agradese sei book ita atu fó benvindu ba bainaka sira no prontu atu hatán sira-nia pergunta sira.
4. Tanbasá mak oportunidade atu hatudu agradese mak espesiál tebes?
4 Tinan neʼe mak dala ikus neʼebé ita sei halaʼo Memoriál ka lae? (1 Korinto 11:26) Ita la hatene. Maibé se Memoriál ida-neʼe mak ba dala ikus karik, ita-nia oportunidade espesiál atu hatudu agradese la iha ona. Entaun, ita sei uza oportunidade neʼe ka lae? Ita hein katak ‘liafuan husi ita-nia ibun no hanoin iha ita-nia laran sai buat neʼebé monu loos ba Jeová’, ida-neʼebé hatudu laran-diʼak mai ita.—Salmo (Mazmur) 19:14.