Ita bele simu rikusoin barak!
1. Tanbasá mak diʼak atu hanoin kona-ba serbisu nuʼudar pioneiru regulár?
1 Ita hakarak sai kontente liután ka lae? Ita gosta atu ajuda ema seluk ka lae? Ita hakarak aumenta ita-nia serbisu ba Maromak Jeová ka lae? Se Ita hatán sin ba pergunta sira-neʼe ida, karik diʼak ba Ita atu halo serbisu nuʼudar pioneiru regulár. Se nuneʼe, ita tenke hanoin kona-ba ita-nia responsabilidade atu tau matan ba família, ka responsabilidade seluseluk neʼebé tuir Bíblia, no mós kona-ba ita-nia saúde diʼak ka lae.
2. Konta toʼok rikusoin espirituál balu neʼebé pioneiru regulár sira hetan.
2 Iha Bíblia laran, Salomão hakerek katak Maromak Jeová haraik bensaun hodi fó rikusoin. (Prov 10:22) Tempu agora, Maromak Jeová haraik bensaun mai ita liuliu hodi fó rikusoin espirituál. No pioneiru regulár sira simu rikusoin barak hanesan neʼe. Porezemplu, sira sente laran-kontente tanba sira fahe lia-loos ba ema seluk hodi ‘uza ba diʼak sira-nia tempu’ neʼebé karik sira bele uza ba sira rasik nia diʼak. (Kol 4:5; Apos 20:35) Maromak Jeová hatene no hafolin serbisu neʼebé sira halo ho domin. “Rikusoin iha lalehan” hanesan neʼe sei la lakon. (Mt 6:20; Ebr 6:10) Liután neʼe, pioneiru sira iha matan neʼebé simples no fiar ba Maromak Jeová atu tau matan ba sira-nia presiza, no hodi halo nuneʼe relasaun entre sira ho Maromak Jeová sai metin liután.—Mt 6:22, 25, 32; Ebr 13:5, 6.
3. Buka rikusoin espirituál no buka rikusoin mundu nian, oinsá mak lahanesan?
3 Buka rikusoin mundu nian bele lori “hakarak beik no perigozu oioin”. (1 Tim 6:9, 10; Tgo 5:1-3) Maibé, ida-neʼe nunka sei mosu kuandu buka bensaun husi Maromak Jeová. Uza tempu barak iha serbisu haklaken ajuda pioneiru regulár sira atu halo desizaun neʼebé matenek hodi hatene momoos buat neʼebé importante liu. (Flp 1:10) Irmaun ida uluk gasta tempu barak atu serbisu nuʼudar enjeñeiru, maibé husik tiha serbisu neʼe atu halaʼo serbisu pioneiru. Nia hatete: “Uluk haʼu-nia serbisu halo haʼu estrese tebes. Maibé, kuandu halaʼo serbisu nuʼudar pioneiru, haʼu ladún sente estrese. Agora, haʼu bele ajuda ema no hanorin lia-loos ba sira. Serbisu neʼe halo haʼu kontente no haʼu gosta atu buka dalan oioin hodi ajuda ema atu simu lia-loos.”
4. Oinsá mak pioneiru regulár sira simu bensaun?
4 Bensaun ba ema seluk: Ohin loron, ita hotu hasoru “susar barak”. (2 Tim 3:1) Ema iha fatin hotu-hotu presiza duni atu iha esperansa. Pioneiru sira sente laran-haksolok tanba sira bele ajuda ema neʼebé triste hela hatudu fali oin-midar hodi simu lia-foun diʼak Reinu nian. Tinan-tinan, pioneiru regulár ida-idak gasta oras 800 liu atu halaʼo serbisu neʼebé salva ema nia moris no ida-neʼe halo sira sente haksolok tebes!—1 Tim 4:16.
5, 6. Saida deʼit mak Ita bele halo atu sai pioneiru regulár?
5 Ita hanoin ona atu halo serbisu nuʼudar pioneiru regulár ka lae? Atu sai pioneiru ida, Ita presiza duni atu halaʼo “moris . . . hanesan ema matenek” hodi husik buat neʼebé ladún importante iha Ita-nia moris. (Ef 5:15, 16) Ema barak halo tiha ona hanesan neʼe no halo sira-nia moris sai simples, atu nuneʼe sira bele hamenus sira-nia serbisu mundu nian no uza tempu barak liután ba serbisu Reinu nian. Ita mós bele halo planu atu sai pioneiru ka lae?
6 Husu ba Maromak Jeová atu fó matenek ba Ita atu uza Ita-nia tempu didiʼak hodi bele sai pioneiru ida. (Tgo 1:5) Bensaun saida deʼit mak Ita bele simu? Rikusoin espirituál neʼebé barak tebes! Maromak Jeová mós sei haraik bensaun hodi fó buat neʼebé ita presiza atu moris. (Mt 6:33) Sira neʼebé koko Maromak Jeová nia laran-diʼak kona-ba neʼe sei simu “bensaun toʼo la kuran buat ida tan”.—Mal 3:10.