Pergunta husi haklaken-naʼin

◼ Bele ka lae, atu basa liman depois rona tiha diskursu ruma iha Eskola Servisu Teokrátiku no Reuniaun Serbisu?

Bainhira Maromak Jeová, ita-nia Kriadór, foin halo mundu, “fitun dadeer nian haklalak hamutuk ho haksolok, no Maromak nia oan hotu haklalak hodi hahiʼi nia”. (Jó 38:7) Anju sira-neʼe nuʼudar Maromak nia oan, hakarak tebes atu hahiʼi Maromak Jeová, tanba nia kria buat neʼebé furak tebes, neʼebé hatudu ninia matenek, laran-diʼak, no forsa iha dalan neʼebé foun.

Diʼak atu ita hatudu agradese ba ita-nia irmaun sira neʼebé hakaʼas an atu prepara parte no mós ba informasaun neʼebé sira hatoʼo. Porezemplu, baibain, ita basa liman depois diskursu, esperiénsia, no drama kiʼik iha reuniaun boot sira. Atu prepara parte sira-neʼe, irmaun sira gasta tempu no forsa barak. Kuandu ita basa liman, ita hatudu katak ita fó-agradese laʼós deʼit ba irmaun sira neʼebé hatoʼo diskursu, maibé mós ba Maromak Jeová no ninia hanorin neʼebé ita simu liuhusi ninia Liafuan no organizasaun.​—Isa 48:17; Mt 24:45-​47.

Oinsá kona-ba basa liman ba parte iha Eskola Servisu Teokrátiku no Reuniaun Serbisu? Ita labele bandu ema atu basa liman kuandu sira hakarak, porezemplu estudante foun ida halaʼo ninia parte ba dala primeiru iha eskola. Maibé, basa liman bele sai nuʼudar toman neʼebé ladún iha folin. Tan neʼe, baibain ita la basa liman kuandu parte ida-idak ramata.

Maski ita la basa liman ba parte ida-idak iha Eskola Servisu Teokrátiku no Reuniaun Serbisu, ita iha dalan seluk atu hatudu katak ita agradese ba informasaun no mós ba irmaun sira neʼebé hatoʼo parte. Ita bele halo nuneʼe hodi see tilun ba irmaun sira neʼebé koʼalia daudauk iha programa. No depois reuniaun ramata, ita bele hakbesik ba irmaun sira-neʼe no fó-agradese ba sira-nia serbisu.​—Ef 1:​15, 16.