Reuniaun sira anima ita “atu hatudu domin no hahalok diʼak”

DURANTE tinan atus ba atus ona, Jeová nia povu halibur hamutuk iha reuniaun sira. Iha Izraél antigu, mane hotu halo viajen ba Jeruzalein hodi selebra festa boot tolu. (Deut 16:16) Iha apóstolu sira-nia tempu, kongregasaun Kristaun halibur hamutuk beibeik, dala barak iha ema ruma nia uma. (Flm 1, 2) Ohin loron, ita mós kontente atu tuir reuniaun, asembleia, no reuniaun boot sira. Tanbasá mak Maromak nia atan sira halibur hamutuk? Razaun primeiru mak ida-neʼe parte importante husi ita-nia adorasaun.​—Sal 95:6; Kol 3:16.

² Reuniaun sira mós lori benefísiu ba ema sira neʼebé asiste. Iha tempu antigu, tinan-tinan ema Izraél selebra Festa Barraka nian no kada tinan hitu durante Festa Barraka nian, Maromak fó mandamentu ba ema Izraél: “Halibur hamutuk povu, mane, feto, labarik no ema estranjeiru sira neʼebé hela iha imi-nia sidade sira, atu nuneʼe sira bele rona no aprende hodi hamtaʼuk Jeová, imi-nia Maromak, no halo tuir ho didiʼak liafuan hotu husi Ukun-Fuan neʼe.” (Deut 31:12) Klaru katak, razaun importante atu halibur hamutuk mak hodi simu ‘Jeová nia hanorin’. (Isa 54:13) Iha reuniaun sira, ita mós hetan oportunidade atu koñese malu liután, hetan laran-manas no hametin malu.

KONGREGASAUN NIA REUNIAUN SIRA

³ Depois loron Pentekostes tinan 33 EC, dixípulu sira neʼebé halibur hamutuk kontinua estuda didiʼak apóstolu sira-nia hanorin, no “loron ba loron, sira kontinua halibur iha templu ho hanoin ida deʼit”. (Após 2:42, 46) Liutiha tempu balu, bainhira ema Kristaun halibur hamutuk atu halo adorasaun, sira lee Maromak nia Liafuan, neʼe inklui mós karta husi apóstolu no dixípulu sira seluk. (1 Kor 1:1, 2; Kol 4:16; 1 Tes 1:1; Tgo 1:1) Sira mós halo orasaun hamutuk nuʼudar kongregasaun. (Após 4:24-29; 20:36) Dala ruma, sira konta esperiénsia husi misionáriu sira. (Após 11:5-18; 14:27, 28) Sira mós aprende doutrina husi Bíblia no estuda kona-ba profesia neʼebé sai loos ona. Sira simu matadalan kona-ba oinsá atu hatudu hahalok diʼak nuʼudar ema Kristaun no oinsá atu laran-metin ba Maromak. Sira hotu hetan laran-manas atu haklaken liafuan diʼak ho badinas.​—Rom 10:9, 10; 1 Kor 11:23-26; 15:58; Éf 5:1-33.

⁴ Ohin loron, ita halaʼo reuniaun Kristaun sira tuir buat neʼebé ema Kristaun sira halo iha tempu uluk. Ita halo tuir matadalan iha Ebreu 10:24, 25, neʼebé dehan: “Mai ita hanoin malu . . . , [no] keta haluha atu halibur hamutuk, no fó aten-brani ba malu, liuliu bainhira imi haree loron neʼe besik daudaun ona.” Durante loron ikus sira-neʼe neʼebé nakonu ho susar, ita presiza tuir reuniaun beibeik atu nuneʼe ita bele hetan anima no kontinua hametin ita-nia fiar no mós integridade. (Rom 1:11, 12) Ita moris iha ema aat sira-nia leet. Maibé nuʼudar ema Kristaun, ita la simu hahalok aat no hakarak mundu neʼe nian. (Flp 2:15, 16; Tito 2:12-14) Tuir loloos, ransu ho Jeová nia povu mak diʼak liu hotu. (Sal 84:10) Ita mós hetan benefísiu hodi estuda no koʼalia hamutuk kona-ba Bíblia. Hanoin toʼok kona-ba reuniaun oioin neʼebé Jeová nia organizasaun arranja ona ba ita-nia diʼak.

REUNIAUN IHA FINDESEMANA

⁵ Parte primeiru iha reuniaun findesemana nian mak diskursu neʼebé bazeia ba Bíblia. Diskursu neʼe prepara ba públiku. Karik ema balu neʼebé rona diskursu neʼe mak foin tuir reuniaun ba dala primeiru. Diskursu públiku mak importante tanba ajuda ema foun no mós haklaken-naʼin sira iha kongregasaun atu hametin sira-nia relasaun ho Maromak.​—Após 18:4; 19:9, 10.

⁶ Ohin loron, Jeová nia povu halaʼo reuniaun hanesan ho Kristu Jesus, apóstolu sira no ema Kristaun seluk halo iha tempu uluk. Ita la duvida katak Jesus mak oradór neʼebé diʼak liu hotu iha mundu. Ema koʼalia kona-ba Jesus, hodi dehan: “Seidauk iha ema ida mak koʼalia hanesan nia.” (João 7:46) Jesus koʼalia ho konfiansa tanba nia hetan podér husi Maromak no ninia rona-naʼin hakfodak ho dalan neʼebé nia hanorin. (Mt 7:28, 29) Ema sira neʼebé simu no halo tuir ninia mensajen, hetan benefísiu barak. (Mt 13:16, 17) Apóstolu sira halo tuir Jesus nia ezemplu. Iha Apóstolu 2:14-36, ita bele lee kona-ba Pedro nia diskursu kapás iha loron Pentekostes tinan 33 EC. Diskursu neʼe book ema rihun ba rihun atu halo tuir buat neʼebé sira rona. Liutiha tempu balu, ema seluk mós sai fiar-naʼin bainhira rona tiha Paulo nia diskursu iha Atenas.​—Após 17:22-34.

⁷ Nuneʼe mós ohin loron, semana-semana ema rihun ba rihun hetan benefísiu husi diskursu públiku neʼebé hatoʼo iha kongregasaun, no mós husi diskursu públiku neʼebé hatoʼo iha asembleia no reuniaun boot sira. Diskursu sira-neʼe ajuda ita atu kontinua halo tuir hanorin Kristaun sira no kontinua sai badinas atu halo serbisu neʼebé apoia Maromak nia Ukun. Bainhira ita konvida ema foun atu rona ba diskursu públiku, neʼe bele ajuda tebes nia atu aprende Bíblia nia hanorin báziku.

⁸ Iha tópiku oioin neʼebé hatoʼo iha diskursu públiku. Porezemplu, doutrina husi Bíblia, profesia sira, prinsípiu husi Bíblia, konsellu kona-ba moris família nian, moris kaben nian, problema neʼebé joven sira hasoru no mós kona-ba hahalok Kristaun. Diskursu balu esplika kona-ba Jeová nia kriasaun neʼebé furak. Diskursu balu tan fó sai ezemplu sira husi Bíblia kona-ba fiar, aten-brani, no integridade, no mós esplika oinsá ita bele halo tuir ezemplu sira-neʼe.

⁹ Atu hetan benefísiu husi diskursu públiku, importante atu tau atensaun, loke eskritura sira neʼebé oradór temi, no lee tuir husi ita-nia Bíblia bainhira oradór lee no esplika eskritura. (Lc 8:18) Neʼe sei hametin ita-nia fiar katak buat neʼebé oradór hatoʼo mak loos, no neʼe sei ajuda ita atu hanoin-hetan buat neʼebé ita aprende ona no mós aplika ida-neʼe.​—1 Tes 5:21.

¹⁰ Atu bele halaʼo diskursu públiku semana-semana, kongregasaun ida-idak bele arranja oradór husi sira-nia kongregasaun ka bele mós konvida oradór husi kongregasaun seluk neʼebé besik. Maski oradór mak uitoan deʼit, kongregasaun nafatin presiza halaʼo diskursu públiku beibeik se bele.

¹¹ Parte segundu iha reuniaun findesemana mak Estudu Livru Haklaken. Neʼe mak diskusaun ho pergunta no resposta hodi uza lisaun husi Livru Haklaken edisaun estudu nian. Jeová fó mai ita ai-han espirituál iha tempu neʼebé loos liuhusi Livru Haklaken.

¹² Lisaun estudu nian esplika beibeik kona-ba oinsá ita bele aplika Bíblia nia prinsípiu iha ita-nia moris loroloron. Lisaun sira-neʼe ajuda ema Kristaun atu kontra “espíritu mundu neʼe nian” no hasees an husi hahalok neʼebé la moos. (1 Kor 2:12) Livru Haklaken fó sai esplikasaun neʼebé klaru liután kona-ba hanorin no profesia husi Bíblia, atu nuneʼe ita hotu bele iha koñesimentu neʼebé foun liu kona-ba lia-loos no laʼo nafatin iha ema laran-loos nia dalan. (Sal 97:11; Prov 4:18) Hodi tuir no fó komentáriu durante Estudu Livru Haklaken, neʼe bele ajuda ita haksolok ho ita-nia esperansa kona-ba mundu foun. (Rom 12:12; 2 Ped 3:13) Ransu hamutuk ho maluk Kristaun ajuda ita haburas hahalok neʼebé mai husi espíritu santu no hametin ita-nia hakarak atu serbí Jeová ho laran-manas. (Gal 5:22, 23) Ida-neʼe ajuda ita atu bele tahan susar oioin, “harii fundasaun neʼebé diʼak ba futuru” no mós “kaer metin ba moris neʼebé loloos”.​—1 Tim 6:19; 1 Ped 1:6, 7.

¹³ Oinsá mak ita bele hetan benefísiu husi ai-han espirituál? Ita tenke prepara nanis ba lisaun sira. Ita bele prepara mesak ka hamutuk ho família. Diʼak atu lee eskritura sira neʼebé temi iha lisaun, no durante reuniaun koko atu fó komentáriu ho ita-nia liafuan rasik. Neʼe sei hametin ita-nia fiar ba lia-loos, no ema seluk mós sei hetan benefísiu husi ita-nia komentáriu. Hodi rona didiʼak ba ema seluk nia komentáriu, ita mós bele hetan benefísiu husi lisaun sira semana-semana.

REUNIAUN LORON BAILEET

¹⁴ Kongregasaun mós halibur hamutuk semana-semana iha Reuniaun-Fatin atu tuir Reuniaun Moris Kristaun no Haklaken. Reuniaun neʼe fahe ba parte tolu, no neʼe ‘ajuda ita sai haklaken-naʼin’ neʼebé diʼak. (2 Kor 3:5, 6) Programa no informasaun sei fó sai iha livru Moris Kristaun no Haklaken​—Programa no nota. Iha mós ezemplu balu kona-ba oinsá atu haklaken.

¹⁵ Parte primeiru husi reuniaun neʼe mak Rikusoin husi Bíblia. Neʼe ajuda ita atu komprende didiʼak informasaun no kontestu husi istória sira iha Bíblia, no aprende oinsá ita bele aplika ida-neʼe. Parte neʼe inklui diskursu, lee Bíblia, no diskusaun ho pergunta no resposta neʼebé bazeia ba programa atu lee Bíblia ba semana neʼe. Livru Moris Kristaun no Haklaken mós iha dezeñu no atividade oioin neʼebé bele ajuda ita komprende istória sira husi Bíblia. Estuda kleʼan Bíblia iha dalan hanesan neʼe bele lori benefísiu ba ita-nia moris no mós ajuda ita atu hanorin iha dalan neʼebé diʼak, atu nuneʼe ita “bele iha kbiit, no sai prontu hodi halo serbisu diʼak hotu”.​—2 Tim 3:16, 17.

¹⁶ Parte segundu husi reuniaun neʼe mak Treinu kona-ba Haklaken. Parte neʼe sei fó oportunidade ba ita atu aprende kona-ba oinsá atu haklaken, no aumenta ita-nia matenek atu haklaken no hanorin. Iha mós vídeo kona-ba ezemplu atu haklaken. Parte neʼe hanorin ita “oinsá atu koʼalia” hodi bele “hatán ho liafuan neʼebé loos”.​—Isa 50:4.

¹⁷ Parte terseiru husi reuniaun neʼe mak Moris nuʼudar Ema Kristaun. Parte neʼe hanorin ita oinsá atu aplika Bíblia nia prinsípiu iha ita-nia moris loroloron. (Sal 119:105) Parte importante husi ida-neʼe mak Estudu Bíblia iha Kongregasaun. Parte neʼe mak diskusaun ho pergunta no resposta atu hanesan ho Estudu Livru Haklaken.

¹⁸ Bainhira simu tiha livru Moris Kristaun no Haklaken neʼebé foun, koordenadór ba grupu katuas ka katuas neʼebé ajuda nia, sei haree didiʼak informasaun iha livru neʼe atu bele deside sé mak sei hatoʼo parte ida-idak. Semana-semana, katuas neʼebé iha ona esperiénsia atu hanorin no hetan ona aprova husi grupu katuas mak sei sai nuʼudar aprezentadór ba reuniaun neʼe. Ninia responsabilidade mak atu tau matan ba reuniaun atu komesa no remata tuir oras, no mós atu gaba no fó konsellu ba estudante sira neʼebé halaʼo knaar.

¹⁹ Se ita prepara, asiste no hola parte beibeik iha Reuniaun Moris Kristaun no Haklaken, ita sei aumenta ita-nia koñesimentu kona-ba Bíblia, komprende Bíblia nia prinsípiu sira, haklaken liafuan diʼak ho fiar an no sai matenek liután atu hanorin ema sai dixípulu. Se ema neʼebé seidauk hetan batizmu tuir reuniaun neʼe, sira mós bele hetan benefísiu hodi ransu hamutuk ho ema seluk no rona informasaun neʼebé hametin sira. Atu ajuda ita prepara ba reuniaun sira, ita bele uza JW Library^®, Watchtower BIBLIOTEKA ONLINE^™ (se neʼe fó sai ona iha Ita-nia língua), no mós uza biblioteka iha Reuniaun-Fatin. Biblioteka iha Reuniaun-Fatin iha livru oioin husi Testemuña ba Jeová, inklui Livru atu ajuda Testemuña ba Jeová buka informasaun, no mós iha tradusaun Bíblia oioin, disionáriu no referénsia seluk tan neʼebé diʼak. Ita hotu bele uza biblioteka neʼe antes no depois reuniaun sira.

REUNIAUN ATU ORGANIZA SERBISU HAKLAKEN

²⁰ Durante loron baileet no findesemana, haklaken-naʼin sira sei halibur hamutuk ba tempu uitoan nuʼudar grupu hodi tuir reuniaun atu organiza serbisu haklaken. Reuniaun neʼe baibain halaʼo iha uma privadu ka iha fatin seluk. Bele mós halaʼo reuniaun neʼe iha Reuniaun-Fatin. Bainhira haklaken-naʼin sira halibur hamutuk nuʼudar grupu kiʼik iha fatin oioin, neʼe halo fasil ba sira atu tuir reuniaun neʼe no mós bá haklaken-fatin. Neʼe mós halo fasil ba ema neʼebé dirije reuniaun neʼe atu organiza lalais haklaken-naʼin sira no bele bá kedas haklaken-fatin. No mós halo fasil ba katuas ba grupu haklaken atu tau matan didiʼak ba ema ida-idak iha ninia grupu. Maski diʼak ba grupu ida-idak atu halibur ketaketak, maibé dala ruma grupu balu presiza halibur hamutuk. Porezemplu, se haklaken-naʼin uitoan deʼit mak haklaken durante loron baileet, karik diʼak atu grupu balu ka grupu hotu halibur hamutuk iha Reuniaun-Fatin ka fatin seluk neʼebé diʼak. Hodi halo nuneʼe, haklaken-naʼin sira bele iha pár atu haklaken hamutuk. Kongregasaun mós bele uza Reuniaun-Fatin atu halibur hamutuk hodi bá haklaken durante loron-boot sira. Kongregasaun mós bele arranja atu grupu haklaken hotu halibur hamutuk hodi halaʼo reuniaun atu organiza serbisu haklaken depois Estudu Livru Haklaken remata.

²¹ Se grupu sira halibur ketaketak, katuas ba grupu haklaken ida-idak mak sei dirije reuniaun atu organiza serbisu haklaken. Dala ruma, katuas ba grupu haklaken bele fó knaar ba ninia asistente ka irmaun seluk neʼebé kumpre kritéria atu dirije reuniaun neʼe. Sira neʼebé dirije tenke prepara informasaun ruma neʼebé irmaun-irmán sira bele uza bainhira haklaken. Bainhira organiza hotu ona serbisu haklaken, ema ida husi grupu sei halo orasaun. Depois neʼe, ema hotu bele bá kedas haklaken-fatin. Reuniaun neʼe halaʼo ba minutu lima toʼo hitu, maibé baibain badak liu se ida-neʼe halaʼo depois reuniaun iha kongregasaun. Informasaun neʼebé hatoʼo iha reuniaun neʼe tenke anima no fó matadalan neʼebé ajuda irmaun-irmán sira atu bá haklaken. Haklaken-naʼin foun ka sira seluk neʼebé presiza ajuda bele haklaken hamutuk ho haklaken-naʼin sira neʼebé iha ona esperiénsia hodi bele hetan treinu.

ARRANJU KONA-BA REUNIAUN BA KONGREGASAUN FOUN KA KIʼIK

²² Tanba dixípulu aumenta ba beibeik, kongregasaun mós aumenta. Katuas área mak baibain hatama aplikasaun atu forma kongregasaun foun. Maibé iha situasaun balu, karik diʼak liu se grupu sira neʼebé kiʼik bele halibur hamutuk ho kongregasaun neʼebé besik liu.

²³ Dala ruma, kongregasaun kiʼik iha deʼit irmán sira. Se nuneʼe, irmán neʼebé halo orasaun iha kongregasaun ka dirije reuniaun sira tenke taka ninia ulun hodi tuir matadalan husi Bíblia. (1 Kor 11:3-16) Baibain, diʼak se irmán neʼe tuur no hateke ba rona-naʼin bainhira dirije reuniaun. Irmán sira labele hatoʼo diskursu iha reuniaun. Maibé sira bele lee informasaun neʼebé organizasaun prepara ona no fó komentáriu kona-ba neʼe, ka sira mós bele halo diskusaun ka halo aprezentasaun. Sukursál sei husu irmán ida atu tau matan ba karta sira neʼebé sukursál haruka ba kongregasaun no mós tau matan ba reuniaun sira. Maibé bainhira iha ona irmaun balu neʼebé kumpre kritéria atu halo knaar neʼe, sira mak sei tau matan ba knaar sira-neʼe.

ASEMBLEIA

²⁴ Tinan ida dala rua, kongregasaun sira husi área ida sei halibur hamutuk hodi tuir asembleia. Baibain asembleia sira halaʼo ba loron ida. Asembleia mak tempu neʼebé ksolok no fó oportunidade ba ema hotu atu ‘loke luan sira-nia laran’ hodi ransu ho maluk Kristaun. (2 Kor 6:11-13) Jeová nia organizasaun prepara programa ho tópiku oioin neʼebé bazeia ba Bíblia no parte oioin iha asembleia sira tuir kongregasaun sira-nia presiza. Parte sira-neʼe inklui diskursu oioin, aprezentasaun no entrevista. Informasaun hotu neʼebé hatoʼo iha asembleia hametin ema hotu neʼebé asiste. Asembleia sira-neʼe fó oportunidade ba dixípulu foun sira atu hetan batizmu hodi hatudu sai sira-nia dedikasaun ba Jeová.

REUNIAUN BOOT

²⁵ Tinan ida dala ida, sei halaʼo reuniaun boot. Baibain, reuniaun boot neʼe halaʼo ba loron tolu, no kongregasaun hotu husi área oioin sei tuir. Se territóriu neʼebé sukursál tau matan mak kiʼik deʼit, karik diʼak atu kongregasaun hotu iha territóriu neʼe halibur hamutuk iha fatin ida deʼit. Arranju atu halaʼo reuniaun boot iha rai ida-idak la hanesan, neʼe depende ba rai ida-idak nia situasaun ka matadalan husi organizasaun. Dala ruma organizasaun arranja reuniaun boot internasionál ka reuniaun boot espesiál iha rai balu hodi Testemuña rihun ba rihun husi rai oioin bele tuir. Tuir loloos, tinan-tinan ema barak aprende liafuan diʼak kona-ba Maromak nia Ukun liuhusi notísias neʼebé média sira fó sai kona-ba reuniaun boot sira-neʼe.

²⁶ Reuniaun boot sira mak tempu haksolok ba Jeová nia povu atu adora Jeová ho unidade. Iha reuniaun boot sira-neʼe, ita simu informasaun foun neʼebé ajuda ita atu komprende diʼak liután lia-loos husi Bíblia. Iha reuniaun boot balu, ita simu livru foun atu bele estuda mesak, atu estuda iha kongregasaun, ka uza iha serbisu haklaken. Reuniaun boot sira mós fó oportunidade ba ema atu hetan batizmu. Reuniaun boot sira mak importante tebes atu hametin liután ita-nia relasaun ho Maromak. Reuniaun boot sira mak evidénsia katak Jeová nia povu iha mundu tomak mak hanesan família Kristaun neʼebé iha unidade no hadomi malu. Ida-neʼe hatudu katak sira mak Jesus Kristu nia dixípulu neʼebé loos.​—João 13:35.

²⁷ Hodi tuir reuniaun sira iha kongregasaun, asembleia no reuniaun boot sira, neʼe sei ajuda ita atu halo Jeová nia hakarak. Neʼe mós ajuda ita atu proteje ita-nia an husi mundu nia influénsia neʼebé bele halo fraku ita-nia fiar. Reuniaun sira-neʼe hotu lori glória no hahiʼi ba Jeová. (Sal 35:18; Prov 14:28) Ita agradese tebes ba Jeová tanba iha loron ikus sira-neʼe, nia arranja reuniaun sira atu fó kmaan mai ita no hametin ita-nia relasaun ho nia.

NAʼI NIA HAN-KALAN

²⁸ Tinan ida dala ida, iha loron neʼebé Jesus mate, Testemuña ba Jeová iha mundu tomak komemora Jesus nia mate hodi tuir Memoriál ka Naʼi nia Han-Kalan. (1 Kor 11:20, 23, 24) Ba Jeová nia povu, neʼe mak reuniaun importante liu hotu. Jesus fó mandamentu neʼebé klaru ba ita kona-ba komemora Memoriál.​—Lc 22:19.

²⁹ Data ba Memoriál mak hanesan ho data ba Páskua neʼebé fó sai iha Bíblia. (Éx 12:2, 6; Mt 26:17, 20, 26) Páskua mak selebrasaun neʼebé uluk ema Izraél halaʼo tinan-tinan atu komemora tempu neʼebé sira sai husi rai-Ejitu iha tinan 1513 AEC. Iha tempu neʼebá, Jeová deside katak loron 14 iha fulan primeiru tuir sira-nia kalendáriu mak loron atu han naʼan husi bibi-oan Páskua nian no sai livre husi moris atan nian iha rai-Ejitu. (Éx 12:1-51) Atu hatene data neʼe monu iha loron saida tuir kalendáriu modernu, ita tenke sura loron 13 husi tempu neʼebé fulan-foun mosu besik ekinósiua iha fulan-Marsu iha Jeruzalein. Baibain Memoriál monu iha data neʼebé fulan nakonu ba dala primeiru depois tempu ekinósiu.

³⁰ Iha Mateus 26:26-28, Jesus esplika kona-ba dalan atu halaʼo Memoriál. Neʼe laʼós selebrasaun neʼebé lulik, maibé neʼe mak han-kalan simbóliku, no ema sira neʼebé Maromak hili atu ukun hamutuk ho Jesus Kristu iha lalehan mak hola parte. (Lc 22:28-30) Ema Kristaun hotu no ema seluk mós apoia arranju neʼe hodi tuir Naʼi nia Han-Kalan. Hodi tuir Memoriál, sira hatudu katak sira hafolin buat neʼebé Maromak Jeová halo ona ba ita hotu nia diʼak liuhusi ninia Oan-Mane Jesus Kristu. Antes Memoriál, iha diskursu espesiál ida neʼebé sei anima ema atu tuir Memoriál no book sira atu estuda Bíblia.

³¹ Testemuña ba Jeová hein namanas atu halibur hamutuk iha reuniaun “hodi fó laran-manas ba malu atu hatudu domin no hahalok diʼak”. (Ebr 10:24) Atan laran-metin no matenek sempre arranja reuniaun sira-neʼe tuir ita-nia presiza espirituál. Jeová nia atan hotu no mós ema foun presiza halibur hamutuk beibeik hodi bele hetan benefísiu husi arranju sira-neʼe. Bainhira ita hatudu agradese ba buat neʼebé Jeová fó liuhusi ninia organizasaun, ita hametin liután ita-nia unidade nuʼudar Maromak nia povu. Importante liu mak ita fó hahiʼi no glória ba Jeová.​—Sal 111:1.