Objetivu ba grupu haklaken nian
1. Grupu ba haklaken nia objetivu mak saida?
1 Iha tempu ida, Jesus halibur hamutuk ho ninia dixípulu naʼin-70, antes sira atu sai bá haklaken. (Lucas 10:1-11) Jesus fó anima sira katak sira la laʼo mesak deʼit, tanba Jeová, “toʼos naʼin” mak sei dirije sira-nia serbisu. Jesus mós fó matadalan hodi prepara didiʼak sira atu sira bele halaʼo serbisu neʼe, no tuirmai, nia organiza sira ba ema naʼin “rua-rua”. Ohin loron, reuniaun neʼebé ita halaʼo antes atu sai bá haklaken mós iha objetivu neʼebé hanesan, neʼe mak atu fó anima, prepara didiʼak haklaken-naʼin sira, no atu organiza ita ho didiʼak.
2. Tenke uza minutu hira atu halaʼo grupu haklaken?
2 Baibain ita uza minutu 10 toʼo 15 hodi bele halaʼo grupu, organiza grupu, fahe mapa, no halo orasaun. Maibé agora iha mudansa balu. Komesa husi fulan-Abríl, grupu haklaken nian halaʼo deʼit iha minutu 5 toʼo 7 nia laran. Se reuniaun kongregasaun hotu tiha mak ita halaʼo grupu, neʼe tenkesér halo badak liután, tanba ita foin tuir reuniaun no rona ona informasaun barak husi Eskritura sira. Grupu neʼebé badak bele fó ita tempu barak liután atu haklaken ba ema. No ida-neʼe mós la atrapalla pioneiru ka haklaken-naʼin sira-nia tempu se sira komesa haklaken tiha ona antes grupu hahú.
3. Halaʼo grupu haklaken iha dalan saida mak bele ajuda haklaken-naʼin sira?
3 Grupu haklaken nian tenkesér fó ajuda ba haklaken-naʼin sira. Iha kongregasaun barak, sira organiza grupu ida-idak hodi bá haklaken duké kongregasaun tomak halibur iha fatin ida deʼit. Neʼe bele halo fasil ba ema atu tuir grupu. Grupu mós bele organiza ho lalais no katuas neʼebé tau matan ba grupu mós bele tau matan didiʼak ba ema ida-idak iha ninia grupu laran. Grupu katuas nian bele koʼalia hamutuk hodi haree toʼok saida mak diʼak liu ba kongregasaun ida-idak. Antes atu remata ho orasaun, ema ida-idak tenkesér hatene ona nia atu bá haklaken iha neʼebé no atu haklaken ho sé.
4. Tanbasá mak ita la bele hanoin katak grupu haklaken ladún importante?
4 Importante hanesan kongregasaun nia reuniaun sira seluk: Tanba ema neʼebé atu bá haklaken deʼit mak tuir grupu, neʼe la dehan katak se kompara ho reuniaun kongregasaun nian, grupu haklaken ladún importante. Hanesan ho reuniaun sira seluk, grupu haklaken mós mai husi Jeová hodi ita bele ajuda malu, hatudu domin ho hahalok diʼak. (Ebreu 10:24, 25) Tan neʼe mak ema neʼebé tau matan ba grupu tenke prepara didiʼak hodi informasaun neʼebé nia hatoʼo ba grupu hatudu respeitu ba Jeová no fó ajuda mós ba ema sira neʼebé tuir grupu. Se bele, haklaken-naʼin sira neʼebé atu bá haklaken tenkesér tuir uluk grupu.
5. (a) Katuas haklaken nian iha knaar saida kona-ba halo arranju ba grupu haklaken nian? (b) Oinsá mak irmán ida dirije grupu?
5 Preparasaun husi ema neʼebé dirije grupu: Iha reuniaun sira, se ema ida atu hatoʼo diskursu ida ho didiʼak, nia tenkesér hatene ona katak nia iha knaar neʼe. Hanesan neʼe mós ho ema neʼebé tau matan ba grupu. Iha grupu ida-idak, grupu nia ulun ka ninia asistente mak sei halaʼo grupu neʼe. Maibé, se kongregasaun ida mak halibur hamutuk deʼit atu bá haklaken, katuas haklaken nian mak sei hili ema ida atu tau matan ba grupu haklaken. Katuas haklaken balu halo oráriu ida hodi fó ba ema sira neʼebé atu dirije no nia mós taka oráriu neʼe iha Reuniaun-Fatin nia kuadru. Katuas haklaken nian tenkesér uza matenek bainhira atu hili ema sira-neʼe, tanba dalan neʼebé ema neʼe hanorin, matenek ka lae atu organiza grupu bele fó impaktu ba grupu neʼe. Se irmaun katuas la iha, atan ba kongregasaun ka irmaun neʼebé hetan ona batizmu ho lalaʼok diʼak mós bele uza hodi halaʼo grupu neʼe iha loron balun. Katuas haklaken nian mós bele uza irmán neʼebé hetan ona batizmu ho lalaʼok diʼak atu halaʼo grupu.—Haree “Se irmán ida mak tenke dirije.”
6. Tanbasá mak ema neʼebé dirije grupu tenke prepara ho didiʼak?
6 Bainhira ita simu knaar ida atu hatoʼo diskursu iha Eskola Serbisu Kristaun ka Reuniaun Serbisu nian, ita sempre prepara uluk ho laran. Karik ema balu deʼit mak hakarak hein toʼo atu bá reuniaun ona mak iha dalan foin prepara atu koʼalia saida. Ita mós tenkesér prepara diʼak uluk ona antes atu bá halaʼo grupu haklaken nian. Sá tan agora grupu neʼe habadak liután, importante tebes atu prepara ho didiʼak hodi grupu neʼe diʼak ba ema hotu. Prepara uluk mós atu hetan mapa ba haklaken nian.
7. Ema neʼebé dirije grupu bele koʼalia kona-ba informasaun saida deʼit?
7 Atu koʼalia saida: Tanba haklaken fatin ida-idak la hanesan, nuneʼe mak atan laran-metin la fó matadalan ida-idak ba grupu haklaken nian. Kaixa “Saida mak ita bele koʼalia iha grupu haklaken” fó matadalan balu neʼebé ita bele uza. Baibain, grupu neʼe halaʼo iha dalan neʼebé ita husu pergunta ba malu. Dala ruma bele mós halo drama ida neʼebé prepara diʼak tiha ona ka hatudu matadalan balu husi vídeo neʼebé hetan husi jw.org. Bainhira atu prepara ba reuniaun neʼe, ema neʼebé dirije grupu tenkesér hanoin kona-ba saida mak bele anima ka ajuda haklaken-naʼin prepara didiʼak atu bá haklaken iha loron neʼe.
8. Saida mak diʼak atu koʼalia iha grupu haklaken iha loron-sábadu no domingu?
8 Iha sábadu-sábadu, baibain haklaken-naʼin sira fahe revista sira. Karik balu haluha tiha ona atu koʼalia buat sira neʼebé sira prepara husi tempu Adorasaun Família nian. Tan neʼe mak diʼak ba ema neʼebé dirije grupu atu haree fali ba ezemplu oinsá atu fahe revista sira husi Ita-nia Serbisu Kristaun nia kotuk. Buat seluk neʼebé bele halo mak koʼalia kona-ba notísias husi telejornál ruma, ka akontesimentu ruma. Liga informasaun sira-neʼe ba ita-nia revista sira ka koʼalia oinsá bele uza informasaun sira-neʼe hodi loke dalan atu halo vizita fali. Se ema balu fahe tiha daudauk ona revista sira-neʼe, bele husu sira atu fó sujestaun ruma kona-ba sira koʼalia saida ka husu sira konta esperiénsia diʼak ruma husi sira-nia haklaken. Iha loron-domingu, ema neʼebé dirije grupu mós bele uza sujestaun neʼe atu koʼalia kona-ba livru neʼebé fahe daudaun ba fulan neʼe. Ita bele fahe livru sira neʼebé uza ba estuda ho ema hanesan Liafuan Diʼak, Rona ba Maromak, ka Bíblia Hanorin iha tempu naran deʼit, entaun, bele mós koʼalia uitoan kona-ba livru sira-neʼe iha grupu haklaken nian.
9. Se halaʼo hela kampaña iha loron sábadu no domingu, iha grupu bele koʼalia kona-ba saida deʼit?
9 Se kongregasaun mak halaʼo hela kampaña espesiál iha sábadu no domingu, ema neʼebé dirije grupu bele koʼalia kona-ba oinsá mak bele fahe revista sira hamutuk ho konvite ka tratu sira, ka saida mak ita bele halo se uma-naʼin ida hatudu interese. Karik bele mós hatoʼo esperiénsia diʼak ruma neʼebé hatudu katak kampaña espesiál iha folin duni.
10, 11. Tanbasá mak haklaken-naʼin prepara didiʼak mós bele apoia grupu haklaken laʼo ho diʼak?
10 Preparasaun husi haklaken-naʼin: Haklaken-naʼin mós bele apoia hodi grupu haklaken nian laʼo ho diʼak. Imi bele prepara uluk, karik halo ida-neʼe iha tempu halaʼo adorasaun família nian, depois, fahe buat neʼebé imi aprende ho irmaun-irmán seluk. Preparasaun neʼebé diʼak inklui arranja atu hetan revista no livru seluk antes atu bá tuir grupu, atu nuneʼe la bele halo demora hodi bá kedas haklaken fatin.
11 Importante atu toʼo sedu antes grupu ida hahú. Hanesan mós ho reuniaun sira seluk, ita lakohi atu toʼo tarde. Se ita mak toʼo tarde iha grupu haklaken, neʼe bele farigadu ema hotu nia planu. Tanbasá? Tanba irmaun neʼebé dirije grupu presiza hanoin kona-ba buat barak antes nia halaʼo grupu haklaken nian. Porezemplu, se iha grupu mak haklaken-naʼin uitoan deʼit, karik nia haruka ona sira bá haklaken iha fatin neʼebé uluk haklaken ona parte balu. Se balu karreta la iha, karik nia arranja ona sira atu bá ho ema neʼebé lori karreta. Se haklaken fatin mak ladún seguru, karik nia arranja ona irmaun atu haklaken ho irmán ka haklaken besik irmán sira. Karik nia mós arranja ona atu irmaun-irmán neʼebé laʼo ladún diʼak atu haklaken iha fatin tetuk ka bá haklaken iha fatin neʼebé la iha eskada sira. Karik nia arranja ona haklaken-naʼin foun haklaken ho sira neʼebé kleur ona. Maibé, kuandu haklaken-naʼin sira mak toʼo tarde, baibain tenke halo arranju foun fali hodi sira neʼebé tarde mós bele tuir. Dala ruma karik ho razaun diʼak mak ita tarde. Maibé, se tanba toman mak ita tarde, karik diʼak atu husu ba ita-nia an, neʼe tanba ita ladún hafolin arranju neʼe ka tanba ita mak ladún organiza didiʼak ita-nia tempu.
12. Se ita iha toman atu halo arranju rasik, karik diʼak atu hanoin kona-ba saida?
12 Haklaken-naʼin neʼebé bá tuir grupu bele halo arranju nanis atu haklaken ho sé, ka hein toʼo irmaun neʼebé dirije grupu mak fahe. Se ita mak iha toman sempre halo arranju rasik, karik diʼak atu ‘loke luan ita-nia laran’ hodi bele haklaken ho ema hotu duké ho ita-nia kolega diʼak deʼit. (2 Korinto 6:11-13) Ita bele ka lae kleur-kleur halo arranju atu haklaken ho haklaken-naʼin foun hodi ajuda sira-nia matenek oinsá atu hanorin ema? (1 Korinto 10:24; 1 Timóteo 4:13, 15) Rona didiʼak ba matadalan neʼebé irmaun hatoʼo iha grupu, hanesan atu hahú haklaken husi neʼebé. Bainhira grupu remata ona, keta halo tan arranju foun hodi troka fali arranju neʼebé halo tiha ona. Bá kedas ita-nia haklaken fatin.
13. Se ita ida-idak kaer ita-nia responsabilidade didiʼak, oinsá mak grupu haklaken nian bele lori rezultadu neʼebé diʼak?
13 Fila husi haklaken, dixípulu naʼin-70 neʼebé Jesus organiza “fila ho haksolok”. (Lucas 10:17) Ita bele fiar katak grupu neʼebé Jesus halaʼo ho sira antes bá haklaken mak halo sira bele haklaken ho susesu. Ohin loron, grupu haklaken mós bele lori rezultadu neʼebé hanesan. Se ita ida-idak kaer ita-nia responsabilidade didiʼak, grupu haklaken bele fó anima ba ita, prepara ita ba haklaken, no organiza ita ho diʼak hodi ita bele kumpre ita-nia knaar atu fó “sasin ba nasaun hotu”.—Mateus 24:14.
[Liafuan neʼebé foti husi pájina 8]
Grupu haklaken mós importante hanesan reuniaun kongregasaun sira seluk
[Liafuan neʼebé foti husi pájina 9]
Bainhira atu prepara ba grupu, ema neʼebé dirije tenkesér hanoin kona-ba saida mak bele anima ka ajuda haklaken-naʼin prepara didiʼak atu bá haklaken iha loron neʼe
[Kaixa iha pájina 10]
Se irmán ida mak tenke dirije
Irmán ida neʼebé dirije grupu tenkesér tuur no taka ninia ulun. Informasaun nia hili atu uza ba grupu hanesan deʼit ho informasaun neʼebé irmaun sira uza. Karik nia bele konvida ema fó komentáriu iha grupu hodi la haree hanesan nia hanorin. Se nia husu irmán ida neʼebé hetan ona batizmu atu halo orasaun, irmán neʼe mós tenke taka ulun. Se grupu neʼe toʼo tiha klaran mak irmaun ida neʼebé hetan batizmu ona mosu mai, baibain irmán neʼe husu irmaun neʼe mak simu dirije fali grupu toʼo remata. Katuas haklaken nian tenkesér fó matadalan uluk kona-ba situasaun balu neʼebé bele mosu iha grupu. Porezemplu, irmaun labarik ida neʼebé hetan ona batizmu mai tuir grupu, maibé katuas sira hanoin irmaun neʼe seidauk bele dirije grupu. Se hanesan neʼe, katuas haklaken nian tenke fó-hatene uluk ba irmán no irmaun neʼe katak irmán neʼe mak sei halaʼo grupu, depois mak irmaun kiʼik neʼe taka ho orasaun, se katuas sira hanoin irmaun neʼe bele ona hatoʼo orasaun. Ka karik irmaun boot ida mak tuir grupu, maibé, tanba razaun balu katuas sira bandu hela nia atu la bele kaer knaar ruma, hanesan dirije grupu ka reprezenta kongregasaun atu hatoʼo orasaun. Iha situasaun hanesan neʼe, katuas sira la fó-hatene ba irmán sira tanbasá mak katuas sira bandu irmaun neʼe, maibé, fó-hatene deʼit ba irmán sira neʼebé dirije grupu katak irmán sira deʼit mak bele dirije ka hatoʼo orasaun iha grupu haklaken nian, labele uza irmaun neʼe. Katuas sira mós bele fó-hatene nanis ba irmaun neʼe loron saida deʼit mak irmán sira dirije grupu.
[Kaixa iha pájina 10]
Saida mak ita bele koʼalia iha grupu haklaken:
• Ezemplu oinsá atu fahe revista sira husi Ita-nia Serbisu Kristaun.
• Hatudu vídeo neʼebé hetan husi jw.org.
• Dalan haklaken neʼebé diʼak, hanesan dalan atu komesa koʼalia ho ema, dalan atu arranju halo vizita fali, ka oinsá atu temi kona-ba kontribuisaun se ema simu ita-nia livru ruma.
• Eskritura ida neʼebé fó anima ka ajuda haklaken-naʼin sira ba sira-nia serbisu haklaken.
• Esperiénsia ida husi irmaun-irmán sira ka bele foti husi livru sira.
• Informasaun husi Ita-nia Serbisu Kristaun.
• Informasaun balu husi Reuniaun Serbisu foin daudauk.
• Pontu balu husi Livru Haklaken neʼebé kona haklaken nian.
• Informasaun balu kona-ba haklaken nian husi livru Eskola Serbisu Kristaun ka husi livru “Mai Tuir Haʼu”.
• Parte balu husi jw.org neʼebé ita bele uza ba haklaken.
• Pontu balu husi Aprende kona-ba Maromak nia Liafuan no Informasaun neʼebé ajuda ita atu komprende Bíblia.
• Oinsá atu hahú koʼalia ho ema neʼebé ita hasoru iha haklaken fatin, ema hanesan la fiar ba Maromak, fiar ba evolusaun, ema indú, ka ema Buda ida.
• Saida mak ita bele halo se ema ida lakohi rona.
• Oinsá atu bele ajuda ita-nia pár iha haklaken hodi nia bele haklaken ho diʼak liután.
• Ita bele halo saida se ita hasoru ema neʼebé koʼalia língua seluk.
• Se ema ruma atu bá haklaken iha dalan hanesan uma ba uma, uza telefone, haklaken públiku nian, halo vizita fali, ka atu ba estuda Bíblia ho ema, koʼalia kona-ba oinsá mak ita bele halo buat sira-neʼe ho didiʼak.
• Fó-hanoin kona-ba seguransa, hatudu maneiras diʼak, hatudu atitude diʼak, no buat seluk tan.