Reuniaun atu bá haklaken

1. Tansá mak importante atu organiza serbisu haklaken iha dalan neʼebé diʼak?

¹ Jesus fó ezemplu kona-ba oinsá atu tau matan ba serbisu haklaken iha dalan neʼebé diʼak. Ohin loron, sira neʼebé tau matan ba serbisu haklaken iha mundu tomak mós hakarak serbisu neʼe atu laʼo ho didiʼak. Tan neʼe, kongregasaun sira iha mundu tomak iha reuniaun haklaken nian hodi organiza haklaken-naʼin sira atu halo sira-nia serbisu.—Mt 24:45-47; 25:21; Lc 10:1-7.

2. Oinsá mak reuniaun atu bá haklaken ajuda ita?

² Arranju neʼebé diʼak: Reuniaun atu bá haklaken fó laran-manas, ajuda, no matadalan ba sira neʼebé atu bá haklaken. Iha reuniaun neʼe, bele koʼalia kona-ba eskritura loroloron nian, se informasaun neʼe kona serbisu haklaken. Dala ruma bele uza informasaun husi Ita-nia Serbisu Reinu nian, livru Bertukar Pikiran, ka Sekolah Pelayanan hodi ajuda irmaun-irmán sira neʼebé atu bá haklaken. Karik bele halo drama kiʼik kona-ba oinsá atu fahe livru neʼebé sei fahe iha fulan neʼe nia laran. Irmaun-irmán sira tenke hatene ona kona-ba sé mak haklaken ho sé no sira sei haklaken iha neʼebé, antes ramata reuniaun neʼe ho orasaun. Reuniaun neʼe labele liu minutu 15, no diʼak se irmaun-irmán sira la demora atu bá haklaken-fatin.

3. Sé mak iha responsabilidade atu organiza reuniaun sira atu bá haklaken?

³ Sé mak organiza reuniaun atu bá haklaken? Katuas haklaken nian, mak iha responsabilidade atu halo arranju kona-ba reuniaun atu bá haklaken. Katuas grupu nian no ninia asistente mak iha responsabilidade atu lori sira-nia grupu atu bá haklaken iha findesemana. Katuas grupu no katuas haklaken nian tenke haree didiʼak katak grupu ida-idak iha fatin atu haklaken. Iha semana nia laran, karik katuas ka atan ministeriál bele lori grupu, no katuas haklaken nian sei tau matan ba arranju sira-neʼe.

4-6. (a) Importante atu hanoin kona-ba saida deʼit kuandu organiza reuniaun atu bá haklaken? (b) Saida deʼit mak bele ajuda katuas sira kuandu arranja reuniaun haklaken nian?

⁴ Iha neʼebé no sá oras mak reuniaun sira-neʼe sei halaʼo? Duké kongregasaun tomak hasoru malu iha fatin ida deʼit, diʼak liu se reuniaun atu bá haklaken arranja iha fatin oioin. Dala ruma uza Salaun Reinu, irmaun nia uma, ka fatin seluk neʼebé besik haklaken-fatin. Kongregasaun barak uza Salaun Reinu atu halaʼo reuniaun haklaken depois sira-nia reuniaun domingu nian hotu. Diʼak se irmaun sira organiza haklaken-fatin neʼebé besik, hodi irmaun-irmán sira la gasta tempu barak atu bá haklaken iha fatin dook. Dala ruma katuas sira iha kongregasaun bele haree fali arranju kona-ba fatin reuniaun haklaken nian. Sira halo nuneʼe hodi haree katak arranju neʼe diʼak nafatin ba irmaun-irmán sira, no mós diʼak atu haklaken ba ema hotu iha kongregasaun nia haklaken-fatin.

⁵ Atu hatene kona-ba tempu neʼebé diʼak atu halaʼo reuniaun haklaken nian no dala hira iha semana ida nia laran, katuas sira tenke haree didiʼak kongregasaun nia haklaken-fatin. Pergunta tuirmai bele uza nuʼudar matadalan atu hatene sá oras no iha neʼebé mak fatin diʼak atu halaʼo reuniaun haklaken nian.

⁶ Fatin ida neʼebé mak ita tenke fó atensaun liu? Bainhira mak tempu diʼak atu haklaken uma ba uma? Bele arranja grupu iha tuku lima ka neen lokraik atu halo vizita fali ka haklaken uma ba uma ka lae? Programa ba serbisu haklaken nian tenkesér taka iha kuadru avizu nian. Ita hotu hakarak haklaken ba ema hotu iha ita-nia haklaken-fatin, hodi ita bele dehan hanesan apóstolu Paulo: “Haʼu la bele halo tan buat ida iha fatin neʼe.”—Rom 15:23.

7. Irmaun neʼebé hetan knaar atu dirije reuniaun haklaken nian iha responsabilidade saida deʼit?

⁷ Oinsá atu halaʼo reuniaun haklaken nian: Irmaun neʼebé hetan knaar atu dirije reuniaun haklaken nian bele hatudu respeitu ba arranju neʼe hodi prepara didiʼak. Reuniaun sira-neʼe tenkesér komesa iha tempu neʼebé loos no fó matadalan neʼebé badak deʼit hodi labele liu minutu 15. Antes reuniaun komesa, irmaun neʼe mós presiza hatene ona kona-ba haklaken-fatin iha neʼebé. Maski ita la presiza hein irmaun-irmán sira neʼebé mai reuniaun tarde, diʼak atu husik hela karta badak kona-ba fatin haklaken nian. Depois reuniaun hotu, diʼak atu bá kedan fatin neʼebé hili ona atu haklaken. Reuniaun haklaken nian neʼebé prepara didiʼak bele ajuda irmaun-irmán sira neʼebé tuir reuniaun neʼe atu halaʼo sira-nia knaar ho didiʼak.—Prov 11:14.

8. Iha dalan saida deʼit mak haklaken-naʼin sira bele apoia irmaun neʼebé dirije reuniaun haklaken nian?

⁸ Tuir reuniaun atu bá haklaken: Hola parte importante. (Ebr 13:17) Irmaun neʼebé organiza grupu sei ajuda sira neʼebé laiha maluk atu bá haklaken. Entaun, diʼak se haklaken-naʼin sira neʼebé iha esperiénsia ona tuir reuniaun neʼe hodi sira bele ajuda haklaken-naʼin foun. Kuandu haklaken-naʼin sira prontu atu serbisu hamutuk ho irmaun-irmán naran deʼit, sira bele ajuda malu. (Prov 27:17; Rom 15:1, 2) Ita hatudu respeitu ba arranju neʼe no hatudu katak ita hanoin ita-nia irmaun-irmán sira hodi hakaʼas an atu toʼo reuniaun fatin sedu.—2 Kor 6:3, 4; Flp 2:4.

9. Iha dalan saida deʼit mak pioneiru sira bele apoia reuniaun haklaken nian?

⁹ Apoiu husi pioneiru sira: Apoiu husi pioneiru sira importante tebes no bele fó laran-manas ba ema seluk. Ita hatene katak pioneiru sira iha responsabilidade barak. Porezemplu, sira tenke halaʼo estudu Bíblia, halo vizita fali, no karik sira iha família neʼebé sira presiza tau matan, ka tenke serbisu atu buka osan. Tan neʼe, pioneiru sira la presiza sente katak sira tenke tuir reuniaun haklaken nian hotu neʼebé kongregasaun organiza, liuliu se reuniaun haklaken nian iha loron-loron. Maibé, karik pioneiru sira bele tuir reuniaun haklaken nian balu iha semana ida nia laran. Tanba reuniaun sira-neʼe fó treinu ba haklaken-naʼin hotu no pioneiru sira-nia esperiénsia kona-ba serbisu haklaken mós ajuda haklaken-naʼin seluk. Pioneiru sira-nia ezemplu kona-ba hola parte iha serbisu haklaken ho laran-manas, diʼak ba ita hotu atu halo tuir. No ita kontente ho ita-nia pioneiru sira neʼebé hakaʼas an atu tuir reuniaun atu bá haklaken.

10. Tansá mak importante ba haklaken-naʼin hotu atu apoia reuniaun haklaken nian?

¹⁰ Jesus no nia dixípulu sira uza tempu barak atu haklaken, liuliu hodi haklaken uma ba uma. Ohin loron, ita mós halo hanesan. Reuniaun haklaken sira fó laran-manas ba ita no ajuda ita atu halaʼo serbisu neʼe. Arranju neʼe mai husi Maromak, tan neʼe importante ba haklakennaʼin hotu atu apoia se sira bele. (Apos 5:42; 20:20) Mai ita hotu hakaʼas an atu apoia reuniaun haklaken nian ho laran tomak. Hodi halo nuneʼe, ita bele fiar katak Maromak sei haraik nia bensaun ba ita. No mós, ita sei halo ita-nia Liurai, Jesus Kristu nia laran kontente.—Mt 25:34-40; 28:19, 20.