Dalan oioin atu haklaken liafuan diʼak

JESUS haklaken liafuan diʼak ho laran-manas no nia hatudu ezemplu diʼak ba ninia dixípulu sira. Nia haklaken no hanorin ema iha sira-nia uma no iha fatin públiku. (Mt 9:35; 13:36; Lc 8:1) Jesus haklaken ba ema ida-idak, hanorin ninia dixípulu sira nuʼudar grupu, no hatoʼo diskursu ba ema rihun ba rihun. (Mc 4:10-13; 6:35-44; João 3:2-21) Nia aproveita oportunidade hotu atu fahe liafuan diʼak neʼebé anima no fó esperansa ba ema. (Lc 4:16-19) Dala ruma Jesus sente kole no presiza deskansa, maibé nia la husik liu deʼit oportunidade atu haklaken. (Mc 6:30-34; João 4:4-34) Bainhira ita lee kona-ba Jesus nia serbisu haklaken, neʼe book duni ita atu banati-tuir nia, hanesan ho buat neʼebé apóstolu sira halo iha tempu uluk.​—Mt 4:19, 20; Lc 5:27, 28; João 1:43-45.

² Ohin loron, ema Kristaun sira mós bele hola parte iha serbisu haklaken neʼebé Jesus Kristu mak hahú maizumenus tinan 2.000 liubá. Mai ita haree saida deʼit mak ita bele halo.

HAKLAKEN HUSI UMA BA UMA

³ Nuʼudar Testemuña ba Jeová, ita rekoñese katak haklaken liafuan diʼak husi uma ba uma mak importante. Ema barak koñese ita nuʼudar ema neʼebé sempre haklaken husi uma ba uma. Bainhira ita haklaken husi uma ba uma, ita bele koʼalia ho ema rihun ba rihun iha tempu badak nia laran no bele hetan rezultadu diʼak. Neʼe hatudu katak haklaken iha dalan hanesan neʼe mak diʼak duni. (Mt 11:19; 24:14) Hodi haklaken husi uma ba uma, ita bele hatudu ita-nia domin ba Jeová no ba ema seluk.​—Mt 22:34-40.

⁴ Haklaken husi uma ba uma laʼós dalan foun neʼebé Testemuña ba Jeová mak inventa. Apóstolu Paulo fó sai katak nia hanorin ema iha sira-nia uma. Bainhira Paulo konta ba katuas sira iha Éfeso kona-ba ninia serbisu haklaken, nia hatete: “Hahú husi loron primeiru neʼebé haʼu toʼo iha provínsia Ázia, . . . haʼu la dada an hodi fó-hatene imi buat hotu neʼebé diʼak ba imi no haʼu hanorin imi . . . husi uma ba uma.” Liuhusi dalan neʼe no dalan seluk tan mak Paulo “fó sasin ho didiʼak ba ema Judeu no ba ema Gregu katak sira tenke arrepende sira-nia sala hodi fila fali ba Maromak no tau fiar ba ita-nia Naʼi Jesus”. (Após 20:18, 20, 21) Iha Paulo nia tempu, ukun-naʼin Roma nian anima ema atu adora estátua, no ema barak “hamtaʼuk maromak sira”. Entaun, urjente tebes atu ajuda ema sira-neʼe buka “Maromak neʼebé kria mundu no buat hotu neʼebé iha mundu”, nia mak Maromak neʼebé “fó sai ba ema iha fatin hotu katak sira tenke arrepende sira-nia sala”.​—Após 17:22-31.

⁵ Ohin loron, urjente liután atu haklaken liafuan diʼak. Mundu aat neʼe nia rohan besik loos ona. Ida-neʼe book ita atu hakaʼas an liután hodi haklaken. No haklaken husi uma ba uma mak dalan neʼebé diʼak liu atu buka ema neʼebé hamlaha ba lia-loos. Ohin loron ita hetan rezultadu diʼak hodi haklaken husi uma ba uma hanesan iha Jesus no apóstolu sira-nia tempu.​—Mc 13:10.

⁶ Ita bele haklaken husi uma ba uma ho badinas ka lae? Se Ita halo nuneʼe, Ita bele fiar katak Jeová sei kontente ho Ita. (Eze 9:11; Após 20:35) Karik la fasil ba Ita atu haklaken husi uma ba uma. Karik Ita-nia saúde ladún diʼak, ka ema barak iha Ita-nia haklaken-fatin lakohi rona. Karik governu hanetik ita-nia serbisu haklaken. Karik Ita mak moedór no sente susar atu koʼalia ho ema oin-foun. Tan neʼe, Ita sente neon-susar bainhira haklaken husi uma ba uma. Maibé keta sai laran-kraik. (Éx 4:10-12) Irmaun-irmán iha fatin seluk mós hasoru situasaun neʼebé hanesan.

⁷ Jesus promete ba ninia dixípulu sira: “Haʼu sei hamutuk nafatin ho imi toʼo mundu neʼe nia rohan.” (Mt 28:20) Promesa neʼe hametin ita atu kontinua hanorin ema sai dixípulu. Ita sente hanesan apóstolu Paulo neʼebé hatete: “Iha situasaun hotu haʼu hetan forsa liuhusi nia neʼebé fó kbiit mai haʼu.” (Flp 4:13) Tan neʼe, aproveita kongregasaun nia arranju hotu kona-ba haklaken husi uma ba uma. Bainhira Ita haklaken hamutuk ho maluk Kristaun sira, Ita sei hetan ajuda no laran-manas. Halo orasaun hodi husu ajuda atu manán hasoru buat naran deʼit neʼebé hanetik Ita, no kontinua haklaken liafuan diʼak ho badinas.​—1 João 5:14.

⁸ Bainhira Ita haklaken liafuan diʼak ba ema seluk, Ita iha oportunidade atu esplika ‘razaun kona-ba Ita-nia esperansa’. (1 Ped 3:15) Ita sei haree ho klaru katak ema neʼebé iha esperansa tanba tau fiar ba Maromak nia Ukun la hanesan duni ho ema neʼebé la iha esperansa. (Isa 65:13, 14) Ita sei sente kontente tebes tanba hatene katak Ita halo tuir Jesus nia mandamentu atu ‘husik Ita-nia naroman nabilan’. No karik Ita bele iha oportunidade atu ajuda ema seluk hatene kona-ba Jeová no mós lia-loos neʼebé lori ba moris rohan-laek.​—Mt 5:16; João 17:3; 1 Tim 4:16.

⁹ Baibain kongregasaun halo arranju atu haklaken husi uma ba uma iha findesemana no mós iha loron baileet. Iha haklaken-fatin balu, susar atu hetan ema durante loron, tan neʼe kongregasaun balu halo arranju atu haklaken iha kalan. Karik ema balu gosta atu simu bainaka iha lokraik ka besik kalan duké iha dadeer.

BUKA EMA NEʼEBÉ MERESE ATU SIMU LIA-LOOS

¹⁰ Jesus haruka ninia dixípulu sira atu “buka ema neʼebé mak merese” atu simu lia-loos. (Mt 10:11) Jesus buka ema laran-loos, laʼós deʼit bainhira nia haklaken husi uma ba uma. Maibé nia fó sasin ba ema iha situasaun hotu, iha dalan formál no mós la formál. (Lc 8:1; João 4:7-15) Apóstolu sira mós haklaken ba ema iha fatin oioin.​—Após 17:17; 28:16, 23, 30, 31.

¹¹ Nuneʼe mós ohin loron, ita-nia objetivu mak atu haklaken ba ema hotu kona-ba Maromak nia Ukun. Ita halo nuneʼe hodi banati-tuir Jesus no ninia apóstolu sira-nia dalan atu hanorin ema sai dixípulu. No ita mós halo mudansa tuir situasaun neʼebé troka daudaun iha mundu no mós tuir ema nia situasaun iha ita-nia haklaken-fatin. (1 Kor 7:31) Porezemplu, haklaken-naʼin balu hetan susesu hodi haklaken ba ema iha fatin negósiu. Iha rai barak, irmaun-irmán sira hetan susesu hodi haklaken iha dalan, iha jardín, iha karreta ka motór nia para fatin, ka haklaken iha fatin seluk neʼebé iha ema barak. Kongregasaun balu uza meza, karrosa ka buat seluk atu amostra publikasaun sira iha fatin oioin iha sira-nia haklaken-fatin. Liután neʼe, dala ruma sukursál halo arranju espesiál atu haklaken iha sidade boot nia fatin públiku neʼebé ema barak laʼo bá-mai no konvida haklaken-naʼin husi kongregasaun oioin atu hola parte. Rezultadu mak ita bele haklaken ba ema neʼebé baibain ita labele hasoru iha uma.

¹² Bainhira ita hasoru ema iha fatin públiku no sira hatudu interese ba Bíblia nia mensajen, ita bele fahe publikasaun neʼebé tuir sira-nia presiza. Atu haburas ema nia interese ba Bíblia, Ita bele fó Ita-nia númeru kontaktu no arranja atu vizita fali sira, ka esplika kona-ba website jw.org, ka fó-hatene sira kona-ba fatin neʼebé besik sira-nia área neʼebé halaʼo reuniaun sira. Bainhira Ita haklaken iha fatin públiku, neʼe sei lori kontente mai Ita no ajuda Ita atu aumenta Ita-nia serbisu haklaken.

¹³ Maibé, ema Kristaun nia knaar laʼós deʼit atu haklaken liafuan diʼak. Se Ita hakarak ajuda ema seluk simu lia-loos neʼebé lori ba moris, Ita presiza vizita fali beibeik ema neʼebé hatudu interese ba Bíblia, atu nuneʼe sira bele laʼo ba oin no sai ema Kristaun neʼebé maduru.

VIZITA FALI EMA

¹⁴ Jesus hatete ba ninia dixípulu sira: “Imi sei sai haʼu-nia testemuña . . . toʼo rai sira neʼebé dook liu iha mundu.” (Após 1:8) Maibé nia mós hatete: “Laʼo bá no hanorin ema husi nasaun hotu atu sai haʼu-nia dixípulu . . . Hanorin sira atu halo tuir mandamentu hotu neʼebé haʼu fó ona ba imi.” (Mt 28:19, 20) Bainhira Ita halo vizita fali, neʼe bele aumenta Ita-nia ksolok atu halo Jeová nia serbisu. Ema neʼebé hatudu interese bainhira Ita hasoru ba dala primeiru, baibain sei kontente kuandu Ita vizita fali sira. Bainhira Ita fahe tan informasaun seluk husi Bíblia ba sira, Ita bele hametin sira-nia fiar ba Maromak no ajuda sira atu rekoñese katak sira presiza Maromak nia matadalan. (Mt 5:3) Se Ita prepara didiʼak no vizita fali ema tuir tempu neʼebé diʼak ba sira, karik Ita bele komesa atu estuda Bíblia ho sira. Neʼe mak Ita-nia objetivu kuandu vizita fali ema. Hodi halo nuneʼe, Ita kuda fini lia-loos nian no mós rega ida-neʼe.​—1 Kor 3:6.

¹⁵ Ita balu karik sente susar atu vizita fali ema. Karik Ita iha ona matenek atu koʼalia ho ema kuandu hasoru ba dala primeiru, no Ita gosta tebes atu haklaken iha dalan hanesan neʼe. Maibé Ita sente laran-susar atu vizita fali ema hodi esplika liután kona-ba Bíblia. Se Ita prepara didiʼak, neʼe bele ajuda Ita atu la sente taʼuk. Uza didiʼak sujestaun sira neʼebé Ita rona iha reuniaun loron baileet nian. Ita mós bele konvida haklaken-naʼin ida neʼebé iha esperiénsia atu akompaña Ita.

HALAʼO ESTUDU BÍBLIA

¹⁶ Dixípulu ida naran Filipe koʼalia ho mane ida neʼebé simu ona relijiaun Judeu nian, no mane neʼe lee daudaun Maromak nia Liafuan. Filipe husu ba nia: “[Ita] komprende buat neʼebé Ita lee ka lae?” Mane neʼe hatán: “Oinsá mak haʼu bele komprende se la iha ema ida mak esplika mai haʼu?” Apóstolu kapítulu 8 fó sai katak Filipe “fó sai liafuan diʼak kona-ba Jesus” hodi uza Eskritura neʼebé mane neʼe lee daudaun. (Após 8:26-36) Ita la hatene Filipe uza tempu hira hamutuk ho mane neʼe, maibé Filipe esplika liafuan diʼak iha dalan neʼebé book mane neʼe nia laran toʼo nia sai fiar-naʼin no husu atu hetan batizmu. Mane neʼe sai Jesus Kristu nia dixípulu.

¹⁷ Ohin loron ema barak ladún hatene Bíblia. Tan neʼe, ita presiza vizita fali sira no estuda Bíblia ho sira. Karik ita presiza halo nuneʼe ba fulan balu, ka tinan ida ka liu atu sira bele haburas fiar no kumpre kritéria atu hetan batizmu. Maibé se Ita hatudu domin no pasiénsia hodi ajuda ema laran-loos sai Jesus nia dixípulu, neʼe sei lori ksolok ba Ita, hanesan Jesus hatete: “Kontente liu atu fó duké simu.”​—Após 20:35.

¹⁸ Baibain Ita hakarak estuda Bíblia ho ema hodi uza publikasaun ida neʼebé ita-nia organizasaun prepara ona. Se Ita aplika matadalan neʼebé Ita simu iha reuniaun loron baileet nian no haklaken hamutuk ho irmaun ka irmán seluk neʼebé iha esperiénsia atu hanorin ema, neʼe sei ajuda Ita atu estuda Bíblia ho ema toʼo nia laʼo ba oin no sai Jesus Kristu nia dixípulu.

¹⁹ Se Ita presiza ajuda atu komesa no halaʼo estudu Bíblia, Ita bele koʼalia ho katuas ida ka maluk Kristaun ida neʼebé matenek atu estuda Bíblia ho ema. Sujestaun sira neʼebé hakerek iha livru Moris Kristaun no Haklaken no aprezentasaun sira iha reuniaun mós bele ajuda Ita. Sadere ba Jeová no halo orasaun ba nia hodi fó sai Ita-nia hakarak atu estuda Bíblia ho ema. (1 João 3:22) Se bele, hakaʼas an atu komesa estuda Bíblia ho ema seluk maski Ita estuda ona Bíblia ho Ita-nia família rasik. Bainhira Ita estuda Bíblia ho ema, Ita sei sente haksolok liután iha serbisu haklaken.

HANORIN EMA FOUN KONA-BA JEOVÁ NIA ORGANIZASAUN

²⁰ Bainhira estudante Bíblia koñese Maromak Jeová no sai Jesus Kristu nia dixípulu, sira sai parte ba kongregasaun. Bainhira estudante Bíblia rekoñese katak Jeová mak dirije ninia organizasaun no sira halo tuir matadalan husi organizasaun, neʼe sei ajuda sira laʼo ba oin no sai maduru. Tan neʼe, importante tebes atu hanorin sira kona-ba neʼe. Ita bele halo nuneʼe hodi uza vídeo sira no broxura Sé mak Halo Jeová nia Hakarak Ohin Loron? Informasaun balu iha Kapítulu 4 iha livru neʼe mós bele ajuda ita.

²¹ Bainhira Ita komesa estuda Bíblia ho ema ida, ajuda nia atu haree katak ohin loron Jeová uza organizasaun ida atu kumpre serbisu haklaken. Esplika ba nia katak publikasaun neʼebé Ita uza atu estuda Bíblia mak folin-boot, no katak organizasaun uza serbisu-naʼin voluntáriu sira atu halo no fahe publikasaun sira iha mundu tomak. Konvida estudante Bíblia atu tuir reuniaun hamutuk ho Ita iha Reuniaun-Fatin. Esplika ba nia kona-ba reuniaun sira halaʼo oinsá no fó koñese nia ba irmaun-irmán sira iha Reuniaun-Fatin. Ita mós bele fó koñese nia ba Testemuña seluk iha asembleia no reuniaun boot sira. Hodi tuir reuniaun sira no reuniaun boot sira, ema foun bele haree rasik oinsá Jeová nia povu hatudu domin ba malu. Domin mak sinál ba ema Kristaun loos. (João 13:35) Bainhira ema foun hafolin liután Jeová nia organizasaun, sira sei hakbesik liután ba Jeová.

UZA ITA-NIA PUBLIKASAUN SIRA

²² Ema Kristaun iha apóstolu sira-nia tempu haklaken Maromak nia Liafuan ho laran-manas. Sira halo kópia ba Eskritura sira ho liman atu bele uza mesak no estuda iha kongregasaun. Sira anima ema seluk atu aprende lia-loos husi Maromak nia Liafuan. Kópia neʼebé sira halo mak uitoan deʼit no neʼe folin-boot tebes. (Kol 4:16; 2 Tim 2:15; 3:14-17; 4:13; 1 Ped 1:1) Ohin loron, Testemuña ba Jeová uza mákina modernu atu print Bíblia no publikasaun rihun ba rihun neʼebé ema uza atu estuda Bíblia. Publikasaun sira-neʼe inklui panfletu, broxura, livru, no revista sira iha língua atus ba atus.

²³ Bainhira Ita haklaken liafuan diʼak ba ema seluk, uza didiʼak publikasaun sira neʼebé Jeová nia organizasaun prepara ona. Tanba Ita hetan ona benefísiu hodi lee no estuda publikasaun sira husi Testemuña ba Jeová, neʼe book Ita atu fahe mós publikasaun sira-neʼe ba ema seluk.​—Ebr 13:15, 16.

²⁴ Ohin loron, ema barak liután buka informasaun iha internét. Tan neʼe, Jeová nia organizasaun halo publikasaun sira no mós halo website ofisiál, jw.org. Website neʼe ajuda ita atu habelar liafuan diʼak. Ema iha mundu tomak bele uza komputadór atu lee ka rona ba gravasaun oioin iha língua atus ba atus, hanesan gravasaun ba Bíblia no publikasaun sira kona-ba Bíblia. Iha ema balu neʼebé dada an atu koʼalia ho ita bainhira ita haklaken ka hela iha fatin neʼebé ladún iha Testemuña ba Jeová. Ema sira-neʼe bele buka-hatene kona-ba ita-nia fiar hodi loke jw.org iha sira-nia uma rasik.

²⁵ Tan neʼe, ita hakarak fó sai kona-ba jw.org ba ema barak. Se uma-naʼin husu pergunta kona-ba ita-nia fiar, ita bele uza telemovel ka tablet atu hatudu ba nia resposta husi ita-nia website. Se ita hasoru ema ida neʼebé koʼalia língua seluk, inklui língua jestual, ita bele hatudu ita-nia website ba nia atu nia bele hetan Bíblia ka publikasaun iha ninia língua rasik. Haklaken-naʼin barak uza ona vídeo sira husi ita-nia website atu komesa koʼalia ho ema kona-ba Bíblia.

HAKLAKEN IHA DALAN LA FORMÁL

²⁶ Jesus hatete ba ema neʼebé rona ba nia: “Imi mak naroman ba mundu. . . . Husik imi-nia naroman nabilan iha ema nia oin, atu sira bele haree imi-nia hahalok diʼak no fó hahiʼi ba imi-nia Aman neʼebé iha lalehan.” (Mt 5:14-16) Dixípulu sira-neʼe haleno Maromak nia hahalok hodi banati-tuir Jesus. Jesus esplika kona-ba ninia an rasik, hodi hatete: “Haʼu mak naroman ba mundu.” Jesus sai nuʼudar ezemplu ba ema Kristaun kona-ba haleno “naroman neʼebé fó moris” liuhusi ajuda ema hotu neʼebé hakarak rona ba liafuan diʼak.​—João 8:12.

²⁷ Apóstolu Paulo mós hatudu ezemplu diʼak ba ita. (1 Kor 4:16; 11:1) Bainhira iha sidade Atenas, loroloron Paulo haklaken ba ema neʼebé nia hasoru iha merkadu. (Após 17:17) Ema Kristaun iha sidade Filipe halo tuir ninia ezemplu. Tan neʼe, Paulo hakerek ba sira katak maski sira hela iha “jerasaun aat no kleʼuk nia leet”, maibé sira “sai hanesan ahi-oan hodi fó naroman iha mundu”. (Flp 2:15) Ohin loron, ita mós sai hanesan naroman ba mundu hodi fó sasin kona-ba Maromak nia Ukun liuhusi ita-nia liafuan no hahalok. Bainhira ita hatudu hahalok diʼak no laran-moos, ema sei nota katak ita la hanesan ho mundu neʼe. Bainhira ita haklaken liafuan diʼak, ema sei hatene tanbasá ita la hanesan.

²⁸ Testemuña barak haklaken ba ema iha serbisu-fatin, eskola, transporte públiku, ka fatin seluk bainhira halaʼo sira-nia atividade. Bainhira halo viajen, karik ita bele koʼalia ho ema neʼebé mós halo viajen. Ita ida-idak tenke aproveita oportunidade atu haklaken bainhira ita koʼalia ho ema seluk kuandu halo atividade oioin. Sai prontu atu koʼalia ho ema seluk iha situasaun hotu.

²⁹ Kuandu ita hanoin-hetan nafatin katak haklaken lori hahiʼi ba ita-nia Kriadór no lori glória ba ninia naran, neʼe sei book ita atu haklaken beibeik. Liután neʼe, karik ita bele ajuda ema laran-loos atu hatene Jeová, hodi nuneʼe sira mós bele serbí nia no iha esperansa atu moris ba nafatin tanba tau fiar ba Jesus Kristu. Jeová kontente tebes atu haree ita-nia hakaʼas an no nia haree ida-neʼe nuʼudar serbisu sagradu.​—Ebr 12:28; Apok 7:9, 10.

HAKLAKEN-FATIN

³⁰ Jeová hakarak ema atu haklaken mensajen kona-ba ninia Ukun iha mundu tomak, neʼe katak haklaken iha sidade sira no iha fatin izoladu. Tan neʼe, sukursál mak fahe haklaken-fatin ba kongregasaun sira no mós ba irmaun-irmán sira neʼebé serbí iha fatin izoladu. (1 Kor 14:40) Neʼe tuir arranju neʼebé Maromak halo iha apóstolu sira-nia tempu. (2 Kor 10:13; Gal 2:9) Serbisu haklaken aumenta lalais iha loron ikus sira-neʼe. Tan neʼe, kongregasaun sira presiza organiza didiʼak dalan neʼebé sira haklaken atu bele lori rezultadu diʼak.

³¹ Koordenadór ba serbisu haklaken mak tau matan ba arranju neʼe. Atan ba kongregasaun bele halaʼo knaar atu fahe mapa ba haklaken-naʼin sira. Mapa ba haklaken-fatin bele uza iha dalan rua, mapa neʼebé uza nuʼudar grupu no mós mapa pesoál. Se kongregasaun iha mapa uitoan deʼit, katuas ba grupu haklaken mak sei kaer mapa no haklaken-naʼin sira sei haklaken hamutuk nuʼudar grupu hodi uza mapa sira-neʼe. Maibé se mapa mak barak, haklaken-naʼin sira bele hetan mapa pesoál.

³² Bainhira haklaken-naʼin iha mapa pesoál, nia bele uza mapa neʼe maski la iha reuniaun atu organiza serbisu haklaken ka bainhira nia labele tuir reuniaun neʼe. Porezemplu, haklaken-naʼin balu husu mapa neʼebé besik sira-nia serbisu-fatin, no sira uza mapa neʼe atu haklaken durante tempu han-meiudia ka depois oras serbisu. Família balu husu mapa pesoál neʼebé besik sira-nia hela-fatin, no sira uza mapa neʼe atu haklaken iha kalan. Se haklaken-naʼin sira iha mapa pesoál ba haklaken-fatin neʼebé besik, neʼe bele ajuda sira atu uza sira-nia tempu barak liután atu haklaken. Tuir loloos, mapa pesoál neʼebé ema ida foti mós bele uza kuandu haklaken nuʼudar grupu. Se Ita hakarak atu kaer mapa rasik, Ita bele husu irmaun neʼebé tau matan ba mapa haklaken sira.

³³ Ema hotu neʼebé kaer mapa haklaken nian tenke hakaʼas an atu haklaken ba ema iha uma ida-idak, maski neʼe mak mapa neʼebé katuas ba grupu haklaken mak kaer ka mapa pesoál. Bainhira ita haklaken, ita mós presiza halo tuir lei kona-ba proteje dadus pesoál. Katuas ba grupu haklaken ka haklaken-naʼin ida neʼebé kaer mapa presiza hakaʼas an atu haklaken ba ema iha uma hotu iha mapa neʼe iha fulan haat nia laran. Bainhira haklaken hotu ona iha mapa neʼe, nia presiza fó-hatene ba irmaun neʼebé tau matan ba mapa haklaken sira. Situasaun iha kongregasaun ida-idak la hanesan, karik katuas ba grupu haklaken ka haklaken-naʼin bele kaer nafatin mapa neʼe hodi haklaken fali ka bele fó fali ba irmaun neʼebé tau matan ba mapa haklaken sira.

³⁴ Bainhira ema hotu iha kongregasaun apoia malu, sira bele haklaken ba ema iha uma hotu iha sira-nia haklaken-fatin no mós kuidadu katak haklaken-naʼin rua ka liu la haklaken ba uma neʼebé hanesan iha área ida, tanba neʼe bele halo uma-naʼin sai hirus. Hodi halo nuneʼe, ita hatudu katak ita hanoin ita-nia irmaun-irmán sira no mós ema iha ita-nia haklaken-fatin.

APOIA MALU ATU HAKLAKEN BA EMA HUSI LÍNGUA OIOIN

³⁵ Ema hotu presiza aprende kona-ba Maromak Jeová, ninia Oan-Mane, no ninia Ukun. (Apok 14:6, 7) Ita hakarak tebes atu ajuda ema husi língua oioin atu bolu Jeová nia naran hodi bele hetan salvasaun no atu haburas hahalok Kristaun. (Rom 10:12, 13; Kol 3:10, 11) Susar saida deʼit mak ita bele hasoru bainhira haklaken iha fatin neʼebé ema koʼalia língua oioin? Oinsá mak ita bele ajuda ema barak atu rona ba liafuan diʼak kona-ba Maromak nia Ukun iha língua neʼebé sira bele komprende?​—Rom 10:14.

³⁶ Haklaken-fatin neʼebé sukursál fahe ba kongregasaun ida-idak mak tuir língua neʼebé haklaken-naʼin sira uza. Tan neʼe, iha fatin neʼebé ema koʼalia língua oioin, irmaun-irmán husi kongregasaun oioin sei haklaken iha fatin neʼebé hanesan. Iha situasaun neʼe, diʼak atu haklaken-naʼin husi kongregasaun ida-idak tau fokus atu haklaken deʼit ba ema neʼebé koʼalia sira-nia língua. Ita mós presiza halo tuir matadalan neʼe bainhira halaʼo kampaña tinan-tinan atu fahe konvite. Maibé haklaken-naʼin sira bele koʼalia ho ema hotu no fahe publikasaun iha língua naran deʼit bainhira haklaken iha dalan la formál ka iha fatin públiku.

³⁷ Dala ruma, kongregasaun neʼebé koʼalia língua seluk labele haklaken beibeik iha sira-nia haklaken-fatin neʼebé dook liu. Iha situasaun hanesan neʼe, koordenadór ba serbisu haklaken husi kongregasaun sira tenke koʼalia ba malu atu halo arranju hodi bele haklaken ba ema hotu iha fatin neʼe. Ida-neʼe sei fó oportunidade ba ema hotu atu rona mensajen kona-ba Maromak nia Ukun, no mós irmaun-irmán sira husi kongregasaun oioin la haklaken ba ema iha uma neʼebé hanesan.​—Prov 15:22.

³⁸ Saida mak ita presiza halo se uma-naʼin koʼalia língua seluk? Ita labele husik deʼit no hanoin katak haklaken-naʼin seluk neʼebé koʼalia ninia língua mak sei haklaken ba nia. Haklaken-naʼin balu aprende dalan simples oinsá atu haklaken hodi uza língua husi ema neʼebé sira hasoru beibeik iha sira-nia haklaken-fatin. Ita bele hatudu ba ema oinsá nia bele lee ka download publikasaun sira iha ninia língua rasik husi jw.org, ka ita bele oferese atu lori ba nia publikasaun iha ninia língua.

³⁹ Se ema ida hatudu interese, ita presiza hakaʼas an atu buka haklaken-naʼin ida neʼebé hatene koʼalia ema neʼe nia língua atu bele vizita nia. Ita mós bele fó-hatene nia kona-ba reuniaun sira neʼebé halaʼo besik ninia uma no uza ninia língua. Se nia hakarak haklaken-naʼin ruma neʼebé koʼalia ninia língua atu vizita nia, ita bele hatudu ba nia oinsá atu prenxe formuláriu iha jw.org. Tuirmai, sukursál sei hakaʼas an atu buka-hetan haklaken-naʼin ida, grupu ida, ka kongregasaun neʼebé besik ninia fatin atu bele ajuda nia.

⁴⁰ Diʼak se ita kontinua vizita ema neʼebé hatudu interese toʼo nia fó-hatene ita katak haklaken-naʼin neʼebé koʼalia ninia língua vizita ona nia. Dala ruma, sukursál sei fó-hatene katuas sira katak sukursál la hetan irmaun ka irmán ida neʼebé koʼalia língua neʼe. Se ida-neʼe akontese, ita presiza hakaʼas an atu kontinua haburas uma-naʼin nia interese kona-ba Bíblia. Se bele, diʼak atu estuda Bíblia ho nia hodi uza publikasaun iha ninia língua. Se ita uza dezeñu sira ho didiʼak no husu nia lee eskritura neʼebé hakerek iha publikasaun laran, nia bele hetan koñesimentu báziku kona-ba Bíblia. Karik ninia família ida neʼebé hatene ninia língua no ita-nia língua bele ajuda atu tradús.

⁴¹ Atu bele ajuda ema foun hakbesik ba Maromak nia organizasaun, ita presiza konvida nia atu tuir reuniaun maski karik nia sei la komprende informasaun hotu neʼebé nia rona iha reuniaun. Kuandu oradór lee eskritura ruma, ita bele ajuda ema foun neʼe buka-hetan eskritura iha Bíblia iha ninia língua rasik. Bainhira nia halibur hamutuk ho ema seluk iha kongregasaun, neʼe bele fó laran-manas no ajuda nia atu laʼo ba oin.

⁴² Pré-grupu: Bainhira haklaken-naʼin balu haklaken iha língua neʼebé la hanesan ho língua neʼebé kongregasaun uza, sira bele forma pré-grupu maski la iha katuas ka atan ba kongregasaun atu halaʼo reuniaun semana-semana iha língua neʼe. Sukursál bele fó lisensa ba kongregasaun atu tau matan ba pré-grupu ida se kumpre kritéria tuirmai:

1. (1) Iha kongregasaun nia haklaken-fatin, iha ema barak neʼebé koʼalia língua neʼebé la hanesan ho língua neʼebé kongregasaun uza.

2. (2) Iha haklaken-naʼin balu neʼebé hatene atu koʼalia língua neʼe ka sira prontu atu aprende língua neʼe.

3. (3) Grupu katuas prontu atu organiza no dirije serbisu haklaken iha língua neʼe.

Se grupu katuas hakarak atu tau matan ba pré-grupu ida, sira presiza koʼalia ba katuas área. Karik katuas área hatene kongregasaun seluk neʼebé mós koko atu haklaken ba ema neʼebé koʼalia língua neʼe no karik nia bele fó informasaun neʼebé bele ajuda atu foti desizaun kona-ba kongregasaun ida-neʼebé mak bele tau matan ba pré-grupu neʼe. Bainhira deside ona kongregasaun ida-neʼebé mak bele tau matan ba pré-grupu, katuas sira sei haruka karta ba sukursál hodi husu lisensa.

⁴³ Grupu: Sukursál bele fó lisensa ba kongregasaun atu tau matan ba grupu ida se kumpre ona kritéria tuirmai:

1. (1) Ema barak neʼebé koʼalia língua neʼe hatudu interese ba lia-loos no karik sei iha ema barak tan mak hatudu interese.

2. (2) Iha haklaken-naʼin balu neʼebé hatene koʼalia língua neʼe ka aprende daudaun língua neʼe.

3. (3) Iha katuas ida ka atan ba kongregasaun neʼebé bele dirije reuniaun maizumenus dala ida semana-semana hodi uza língua neʼe, ka semana-semana bele dirije deʼit parte ida husi reuniaun sira, hanesan diskursu públiku ka Estudu Livru Haklaken iha língua neʼe.

Se kritéria sira-neʼe mak kumpre ona iha dalan neʼebé diʼak tuir situasaun, grupu katuas sei haruka karta ba sukursál no fó sai informasaun neʼebé kompletu hodi husu lisensa atu kongregasaun bele tau matan ba grupu ida. Katuas ka atan ba kongregasaun neʼebé dirije no tau matan ba grupu neʼe sei sai nuʼudar “katuas ba grupu” ka “atan ba grupu”.

⁴⁴ Bainhira sukursál fó ona lisensa, grupu katuas husi kongregasaun sei tau matan ba arranju reuniaun nian ba grupu neʼe. Porezemplu, sira bele deside atu halaʼo tan parte balu iha reuniaun ka atu halaʼo reuniaun dala hira durante fulan ida. Kongregasaun mós bele arranja reuniaun atu organiza serbisu haklaken ba grupu neʼe. Grupu katuas mak tau matan ba ema iha grupu neʼe. Katuas sira presiza fó matadalan neʼebé diʼak no hakaʼas an atu tau matan ba grupu neʼe nia presiza. Katuas área sei haklaken hamutuk ho grupu neʼe durante semana neʼebé nia vizita kongregasaun. Nia mós sei haruka relatóriu badak ba sukursál kona-ba grupu neʼe no fó sai buat espesífiku ruma neʼebé grupu neʼe presiza. Karik ikusmai grupu neʼe bele sai kongregasaun ida. Se ema hotu halo tuir matadalan husi Maromak nia organizasaun, Jeová sei sente kontente.​—1 Kor 1:10; 3:5, 6.

HAKLAKEN NUʼUDAR GRUPU

⁴⁵ Ema Kristaun ida-idak iha responsabilidade atu fahe liafuan diʼak ba ema seluk. Iha dalan oioin atu halo ida-neʼe, no ita barak gosta tebes atu bá haklaken hamutuk ho ema seluk. (Lc 10:1) Tan neʼe, kongregasaun halibur hamutuk iha findesemana no mós durante loron baileet atu bá haklaken. Loron-boot sira mós fó oportunidade ba ita atu haklaken hamutuk, tanba irmaun-irmán barak la tama serbisu. Komisaun Administrasaun ba Kongregasaun mak arranja reuniaun atu organiza serbisu haklaken iha tempu no fatin neʼebé diʼak ba ema barak durante loron no mós kalan.

⁴⁶ Bainhira ita haklaken hamutuk nuʼudar grupu, neʼe fó oportunidade ba ita atu “anima no hametin malu”. (Rom 1:12) Haklaken-naʼin foun bele simu treinu liután hodi haklaken hamutuk ho sira neʼebé iha esperiénsia. Iha fatin balu neʼebé la seguru, diʼak atu ema naʼin-rua ka liu mak haklaken hamutuk. Maski karik ita hakarak haklaken mesak deʼit, maibé ita bele anima malu hodi tuir reuniaun atu organiza serbisu haklaken. Hodi hatene katak ema seluk mós haklaken iha tempu neʼebé hanesan ho ita, neʼe bele halo ita sente fiar an. Pioneiru no ema seluk la presiza sente katak sira tenke tuir reuniaun hotu neʼebé kongregasaun arranja atu organiza serbisu haklaken, liuliu se ida-neʼe halaʼo loroloron. Maibé, diʼak atu apoia reuniaun sira-neʼe dala balu semana-semana.

⁴⁷ Mai ita hotu halo tuir Jesus no ninia apóstolu sira-nia ezemplu! Ita bele fiar katak Jeová sei haraik bensaun ba ita-nia hakaʼas an atu hola parte iha serbisu importante hodi haklaken liafuan diʼak kona-ba Maromak nia Ukun.​—Lc 9:57-62.