Antes haklaken, ulukliu ita presiza buka
1. Tanbasá mak kongregasaun sira hetan knaar atu haklaken iha fatin neʼebé iha língua oioin?
1 Iha loron Pentekostes 33, kuandu Jesus nia dixípulu sira simu tiha espíritu santu, sira “hahú koʼalia lia oioin” ba ema neʼebé mai husi rai oioin. (Apos 2:4) Rezultadu mak maizumenus ema naʼin-3.000 hetan batizmu. Klaru katak, ema barak neʼebé mai iha fatin neʼe hatene ona língua neʼebé ema baibain koʼalia, hanesan lia-ebreu ka gregu. Maski nuneʼe, Maromak Jeová hili atu haklaken liafuan Reinu nian ba sira iha sira-nia língua rasik. Karik razaun ida mak dala barak ema prontu atu simu lia-foun diʼak kuandu sira rona iha sira-nia língua rasik. Tan neʼe, ohin loron, kongregasaun sira mós hetan knaar atu haklaken iha fatin sira neʼebé ema koʼalia língua oioin.—Haree livru Diorganisasi, p. 107, par. 2-3.
2. Oinsá mak ita bele hatene katak iha mós ema neʼebé koʼalia língua seluk iha ita-nia área?
2 Se ita hela iha fatin neʼebé ema barak koʼalia língua ida deʼit, karik ita bele haklaken husi uma ida ba uma seluk. Maibé, keta haluha katak karik iha mós ema neʼebé koʼalia língua seluk neʼebé hela iha ita-nia área. Tan neʼe ita presiza buka ema sira-neʼe. Entaun, oinsá mak ita bele buka sira?
3. Tempu hira mak ita bele uza atu buka ema neʼebé koʼalia língua seluk?
3 Oinsá atu buka: Tuir loloos, tempu neʼebé ita bele uza atu buka ema neʼebé koʼalia língua seluk, neʼe depende ba situasaun. Porezemplu, ema naʼin-hira mak koʼalia língua neʼe? Haklaken-naʼin hira mak hatene língua neʼe? Tan neʼe, ita presiza duni halo arranju didiʼak atu buka ema sira-neʼe hodi bele fó sira oportunidade atu bolu Jeová nia naran.—Rom 10:13, 14.
4. (a) Sujestaun saida deʼit mak haklaken-naʼin presiza halo tuir? (b) Saida mak ita bele hatete kuandu ita hetan ema?
4 Kuandu ita hola parte atu buka ema neʼebé koʼalia língua seluk, ita presiza iha planu neʼebé diʼak. Tanba ida-neʼe mak parte husi ita-nia serbisu ba Maromak, entaun ita presiza hatais iha dalan neʼebé diʼak. Haklaken-naʼin balu sente katak treinu kona-ba oinsá atu koʼalia ba uma-naʼin no koʼalia língua neʼe nuʼudar ita hola parte atu buka ema, neʼe bele halo sira nafatin laran-manas no aumenta sira-nia matenek kona-ba língua. Ita bele sura oras neʼebé ita uza atu buka ema, maibé la sura oras neʼebé ita prepara mapa ka lista. Kuandu ita hetan ema neʼebé koʼalia língua neʼe, ita tenke hakaʼas an atu haklaken lia-foun diʼak ba sira no tuirmai fó-hatene ba katuas serbisu nian iha ita-nia kongregasaun ka ema seluk neʼebé nia hili atu hakerek informasaun kona-ba neʼe. Ita presiza halo ida-neʼe maski ema neʼe iha interese ka lae. Maski serbisu atu buka ema neʼebé koʼalia língua seluk mak importante, maibé ita mós presiza tetu didiʼak kona-ba hola parte atu haklaken husi uma ba uma.—Haree kaixa “Saida mak ita bele hatete kuandu buka ema.”
5. Tanbasá mak la fasil atu buka ema tilun-diuk?
5 Buka ema tilun-diuk: La fasil atu buka ema tilun-diuk. Ita presiza hakaʼas an no la para atu buka beibeik. Ita la bele hetan ema tilun-diʼak se ita haree deʼit ba sira-nia naran, sira-nia oin ka hatais. Liután neʼe, família husi ema tilun-diuk karik proteje sira no ladún gosta atu fó sai informasaun barak kona-ba ema neʼe. Sujestaun balu iha kraik kona-ba buka ema tilun-diuk bele mós uza atu buka ema neʼebé koʼalia língua seluk.
6. (a) Ita bele halo saida atu buka-hatene se ema tilun-diuk hela iha área ida? (b) Oinsá mak ita bele halo uma-naʼin sente kalma?
6 Kongregasaun balu neʼebé tau matan ba grupu tilun-diuk hetan susesu hodi husu informasaun iha área neʼebé ema hela. Karik sira husu uma-naʼin se nia haree ninia viziñu sira, kolega serbisu, kolega eskola uza língua tilun-diuk nian. Karik ema neʼe iha família neʼebé tilun-diuk. Maski nuneʼe, hanoin-hetan katak karik uma-naʼin laran-rua kona-ba ita-nia vizita. Maibé, ita bele halo uma-naʼin sente kalma se ita koʼalia ho laran-diʼak, la koʼalia naruk, hatudu laran-moos no respeitu. Haklaken-naʼin balu hetan rezultadu diʼak hodi hatudu Bíblia ka DVD kuandu sira husu informasaun ba uma-naʼin kona-ba ema tilun-diuk. Tuirmai, karik haklaken-naʼin sira-neʼe fó sai katak sira hakarak atu fahe esperansa husi Bíblia ba ema tilun-diuk. Maski uma-naʼin ladún hakarak atu fó informasaun, maibé karik nia prontu atu simu se ita rai hela ita-nia númeru telefone ka konvite reuniaun nian hodi fó ba ninia família ka belun neʼebé tilun-diuk.
7. Iha fatin saida deʼit mak ita bele hetan ema tilun-diuk? Saida mak ita presiza halo?
7 Ita mós bele buka ema tilun-diuk iha fatin neʼebé sira halibur ka ransu hamutuk ka iha sira-nia eskola. Haklaken-naʼin sira presiza hatais iha dalan neʼebé hatudu respeitu no tuir situasaun. Karik uza matenek hodi koʼalia deʼit ba ema naʼin-ida ka rua duké koʼalia ba ema hotu iha grupu ida. Se ema neʼe interese karik ita bele husu kona-ba ninia hela-fatin ka oinsá atu hetan fali nia. Ka se ita hetan ema tilun-diuk iha eskola, karik ita bele fó ita-nia DVD atu rai iha sira-nia biblioteka.
8. Tanbasá buka ema mak parte importante iha ita-nia serbisu haklaken?
8 Serbisu neʼebé importante: Karik ita presiza uza tempu barak atu buka uma-naʼin neʼebé koʼalia língua seluk. Liután neʼe, ema neʼebé hela iha área ida sempre muda, tan neʼe susar atu rai hela informasaun kona-ba sira. Maski nuneʼe, hodi buka ema mak parte importante iha ita-nia serbisu haklaken. Jeová, ida neʼebé fó ita knaar atu haklaken, mak Maromak neʼebé la todan ba sorin ka la fihir ema. (Apos 10:34) No “nia hakarak katak ema hotu hetan maksoin no simu matenek kona-ba lia-loos”. (1 Tim 2:3, 4) Tan neʼe, mai ita apoia Jeová no apoia malu hodi buka ema laran-diʼak sira neʼebé koʼalia língua seluk.—Lc 8:15.
[Kaixa iha pájina 5]
Oinsá mak ita bele hetan ema neʼebé koʼalia língua seluk?
• Husu ema seluk, hanesan estudante Bíblia, família, no kolega serbisu.
• Uza lista telefone nian hodi haree naran sira neʼebé tuir língua neʼebé ita buka.
• Karik bele husu ba ema iha governu, ka iha eskola.
• Vizita loja ka fatin sira neʼebé iha ema neʼebé koʼalia língua seluk
[Kaixa iha pájina 6]
Saida mak ita bele hatete kuandu buka ema
Koʼalia ho laran-diʼak no laran-moos bele halo uma-naʼin la laran-rua kona-ba ita. Dala barak diʼak atu hatudu uluk livru iha sira-nia língua.
Depois fó tiha kumprimenta, karik ita bele dehan: “Ami buka daudauk ema neʼebé koʼalia língua ______ atu nuneʼe ami bele fahe esperansa husi Bíblia ba sira. Ita hatene ema neʼebé koʼalia língua neʼe?”
Kuandu buka ema tilun-diuk, karik ita bele dehan: “Bondia. Haʼu bele hatudu ba ita buat ida? [Uza DVD atu hatudu kona-ba versíkulu ida husi Tradusaun Mundu Foun neʼebé iha DVD.] Ida-neʼe mak parte ida husi Bíblia neʼebé tradús ba língua tilun-diuk nian husi rai-Estadus Unidus. Liután neʼe, ami-nia organizasaun mós halo vídeo balu hodi ajuda ema tilun-diuk atu hatene kona-ba Maromak no neʼe la presiza selu. Ita koñese ema ruma neʼebé tilun-diuk ka ladún rona no uza língua tilun-diuk nian?” Se uma-naʼin la hanoin-hetan kona-ba ema tilun-diuk ruma, karik ita bele husu nia se nia haree ema tilun-diuk iha serbisu-fatin, eskola, ka ninia viziñu.