Haklaken ba ema neʼebé koʼalia língua seluk

1. Dala ruma ita iha oportunidade saida iha ita-nia haklaken-fatin?

¹ Jesus Kristu hatete nanis katak lia-foun diʼak sei haklaken iha mundu tomak “hodi fó sasin ba povu hotu”. Jesus nia liafuan ida-neʼe importante tebes ba ita hotu neʼebé hola parte iha serbisu haklaken no hanorin. (Mt 24:14; 28:19, 20) Iha ita-nia haklaken-fatin, dala ruma ita hasoru ema husi nasaun oioin neʼebé koʼalia língua seluk. Sira mós presiza hetan oportunidade atu rona mensajen Reinu nian no simu lia-loos antes Maromak Jeová nia loron boot toʼo mai. (Mal 3:18) Tan neʼe, oinsá mak ita bele fó-hatene lia-loos iha dalan neʼebé diʼak liután ba ema husi rai seluk iha ita-nia haklaken-fatin?

2. Iha dalan saida mak ita bele halo tuir Maromak Jeová kuandu hasoru ema neʼebé koʼalia língua seluk?

² Maromak Jeová nia haree kona-ba ema neʼebé koʼalia língua seluk: Maromak Jeová la fihir ema, nia hadomi ema hotu iha ita-nia haklaken-fatin. Tan neʼe, ita mós tenke laran-manas hodi ajuda ema hotu atu hatene Maromak Jeová, no neʼe inklui mós sira neʼebé koʼalia língua seluk. (Sal 83:18; Apos 10:34, 35) Maski ita tau atensaun liu ba ema neʼebé koʼalia língua hanesan ita-nia kongregasaun nian, maibé ita mós tenke hanoin ema neʼebé koʼalia língua seluk nia presiza no buka dalan atu fahe mensajen Reinu nian ba sira. Se ita husik deʼit, ida-neʼe la tuir Maromak Jeová nia hakarak, tanba nia hakarak ita atu haklaken ba ema husi nasaun hotu-hotu. Entaun, oinsá mak ita bele ajuda ema neʼebé la koʼalia ita-nia língua?

3. Ita iha livru saida atu ajuda ita iha haklaken? No oinsá mak ita bele prepara atu uza livru neʼe?

³ Uza livru Kabar Baik bagi Orang-Orang dari Segala Bangsa: Maromak nia organizasaun prepara livru kiʼik neʼe atu ita bele haklaken ba ema neʼebé koʼalia língua seluk. Aprende didiʼak oinsá atu uza livru neʼe, no sempre lori bainhira ita bá haklaken. Diʼak mós atu tau marka iha pájina balu neʼebé karik ita sei loke beibeik. Se bele, prepara mós ita-nia livru ka tratu balu iha sira-nia língua atu bele fahe depois hatudu mensajen iha livru kiʼik neʼe.

4. Oinsá mak ita bele uza livru Segala Bangsa iha serbisu haklaken?

⁴ Se ita hasoru ema husi rai seluk no ita la hatene nia koʼalia língua saida, hatudu livru kiʼik neʼe. Loke mapa iha oin, hatudu ita-nia rai. Depois husu nia husi neʼebé no nia koʼalia língua saida. Kuandu ita hatene nia koʼalia língua saida, haree lista, loke pájina neʼebé hakerek nia língua, hatudu liafuan primeiru neʼebé hakerek ho letra metan, no husu nia atu lee mensajen neʼe. Kuandu nia lee hotu tiha, fó tratu neʼebé hakerek iha ninia língua, ka hatudu liafuan ho kór abuabu neʼebé dehan katak Ita kontente atu vizita fali nia no lori livru iha ninia língua. Tuirmai, hatudu liafuan “haʼu-nia naran” ho letra metan no hatete Ita-nia naran. Hatudu mós liafuan “Ita-nia naran” no hein ba resposta. Diʼak atu halo planu hamutuk kona-ba loron saida atu hasoru malu fali.

5. Kongregasaun barak iha arranju saida ba ema interese neʼebé koʼalia língua seluk?

⁵ Se hasoru ema neʼebé hatudu interese: Ita presiza hakaʼas an atu halo vizita fali ba ema neʼebé hatudu interese ba mensajen Reinu nian maski nia koʼalia língua seluk. Se Ita haree katak ema neʼe hakarak hatene liután kona-ba Maromak no ninia Liafuan Bíblia, Ita tenke prenxe formuláriu atu husu vizita ba ema neʼe (Please Follow Up, S-43) no fó ba sekretáriu iha Ita-nia kongregasaun. Sekretáriu sei haruka formuláriu neʼe ba sukursál atu nuneʼe haklaken-naʼin ruma neʼebé hatene ninia língua bele vizita nia. Kuandu simu formuláriu neʼe, sukursál sei haruka fali ba kongregasaun ka grupu neʼebé koʼalia nia língua. Kuandu kongregasaun ka grupu simu formuláriu neʼe, sira hakaʼas an atu la demora hodi vizita nia. Sekretáriu iha Ita-nia kongregasaun mós sei kopia formuláriu neʼe atu fó ba katuas haklaken nian, hodi nuneʼe nia bele rai informasaun kona-ba ema ho língua saida mak hatudu interese ba lia-loos. Ita la presiza prenxe formuláriu neʼe se hasoru ema neʼebé ladún hatudu interese.

6. Kuandu ema neʼebé koʼalia língua seluk hatudu interese ba lia-loos, ita iha responsabilidade atu halo saida?

⁶ Maski Ita prenxe formuláriu S-43 no fó ona ba sekretáriu, karik Ita sei hein kleur toʼo haklaken-naʼin neʼebé koʼalia nia língua vizita nia. Tan neʼe Ita neʼebé prenxe formuláriu mak iha responsabilidade atu vizita nia toʼo tempu neʼebé nia simu vizita husi haklaken-naʼin neʼebé koʼalia nia língua. Dala ruma Ita komesa estuda Bíblia ho nia. Maibé oinsá mak Ita bele hetan livru iha ninia língua?

7. Oinsá mak ita bele hetan livru iha língua seluk?

⁷ Livru iha língua seluk: Kongregasaun labele rai livru barak iha língua seluk. Maibé se ita-nia haklaken-fatin iha ema barak neʼebé koʼalia língua ida no hatudu interese ba lia-loos, katuas haklaken nian bele deside atu kongregasaun bele rai livru balu iha língua neʼe atu haklaken-naʼin sira bele uza iha serbisu haklaken, no kongregasaun bele hameno livru sira-neʼe. Karik ita presiza hein kleur atu simu livru neʼe. Tan neʼe diʼak se ita bele uza internet no print informasaun balu husi www.watchtower.org. Maromak nia organizasaun prepara ona informasaun iha língua atus ba atus iha www.watchtower.org, neʼebé loke ba públiku. Ita bele uza ida-neʼe ho diʼak atu fahe lia-loos ba ema neʼebé koʼalia língua seluk.

8. Saida mak kongregasaun bele halo atu ajuda ema neʼebé hatudu interese ba lia-loos?

⁸ Kongregasaun bele halo saida: Maski ita hasoru ema barak neʼebé koʼalia língua ruma, maibé karik ita-nia fatin la iha kongregasaun iha sira-nia língua. Iha situasaun hanesan neʼe, ita tenke konvida sira atu tuir ita-nia reuniaun. Kuandu ita simu ho diʼak no hatudu interese ba ema neʼebé mai tuir reuniaun, ida-neʼe fó laran-manas ba nia atu tuir reuniaun beibeik. Foufoun karik ita hasoru susar kona-ba língua no kultura neʼebé la hanesan, maibé ida-neʼe la hapara domin kristaun neʼebé Testemuña ba Jeová hatudu ba malu iha mundu tomak. (Sof 3:9; Joao 13:35) Ita hatene koʼalia língua seluk ka lae? Se Ita hatene no kontente atu vizita ema neʼebé koʼalia língua hanesan, favór ida, fó-hatene sekretáriu iha Ita-nia kongregasaun atu nuneʼe nia fó-hatene fali ba sukursál. Ida-neʼe sei ajuda sukursál kuandu sira buka haklaken-naʼin neʼebé bele vizita ema neʼebé hatudu interese ba lia-loos.

9. Iha situasaun saida mak sukursál foti desizaun atu ajuda haklaken-naʼin sira atu aprende língua seluk? No oinsá mak sukursál halo arranju?

⁹ Kursu atu aprende língua seluk: Se ita ajuda daudauk ema neʼebé koʼalia língua seluk, diʼak liu fó laran-manas ba sira atu tuir reuniaun iha sira rasik nia língua. Maibé se ita-nia fatin la iha kongregasaun neʼebé koʼalia sira-nia língua, karik haklaken-naʼin balu deside atu aprende língua seluk atubele ajuda sira. Kuandu sukursál haree katak ema barak koʼalia língua neʼe iha ita-nia fatin no seidauk iha kongregasaun iha língua neʼe, dala ruma sukursál sei loke kursu atu irmaun no irmán sira bele aprende língua neʼe. Se sukursál foti desizaun atu halo nuneʼe, sira sei fó avizu ba kongregasaun sira kona-ba loke kursu atu aprende língua seluk. Irmaun no irmán sira neʼebé husu atu tuir kursu neʼe tenke iha planu atu muda ba kongregasaun ka grupu iha língua neʼe hodi ajuda serbisu haklaken ho língua neʼe.

10. Iha situasaun saida mak bele forma grupu ho língua seluk? No oinsá?

¹⁰ Forma grupu: Atubele forma grupu ida ho língua seluk, presiza tuir kritériu haat tuirmai neʼe: (1) Iha área ida iha ema barak neʼebé koʼalia língua neʼe no sira barak hatudu interese ba lia-loos. (2) Se forma grupu karik, iha haklaken-naʼin balu neʼebé hatene língua neʼe ka aprende língua neʼe. (3) Iha katuas ka atan ministeriál ida neʼebé bele tau matan ba grupu neʼe no bele halaʼo reuniaun iha língua neʼe semana ida dala ida. (4) Grupu katuas sira prontu atu apoia grupu neʼe. Kuandu tuir kritériu sira-neʼe, grupu katuas sira sei hakerek karta ba sukursál hodi fó-hatene kona-ba neʼe no husu lisensa atu forma grupu ida neʼebé simu apoia husi kongregasaun. (Haree livru Diorganisasi, p. 106-107.) Katuas ka atan ministeriál ida sei simu responsabilidade atu tau matan ba grupu neʼe nuʼudar “katuas grupu nian” ka “atan grupu nian”.

11. Tansá mak ajuda ema neʼebé koʼalia língua seluk iha ita-nia haklaken-fatin halo ita kontente tebes?

¹¹ Ajuda ema neʼebé koʼalia língua seluk iha ita-nia haklaken-fatin atu hatene lia-loos, neʼe parte importante tebes husi serbisu haklaken iha mundu tomak, neʼebé Jesus Kristu mak harii. Tan neʼe mai ita halaʼo serbisu neʼe ho laran-manas no haree oinsá mak Maromak Jeová sei halibur ninia povu husi nasaun sira. (Ageu 2:7) Ita sente kontente tebes kuandu ita apoia serbisu neʼe ho laran tomak! Maski ita hasoru susar kona-ba língua, maibé ita fiar katak Maromak Jeová sei haraik bensaun ba ita-nia hakaʼas-an no halo moris fini lia-loos nian neʼebé ita kuda no rega!—1 Kor 3:6-9.