Aumenta ita-nia matenek iha serbisu haklaken—Haklaken ba ema neʼebé koʼalia língua seluk

Tanbasá importante: Jeová hakarak ema husi “nasaun hotu” atu hatene kona-ba nia. (Apóstolu 10:34, 35) Nuneʼe mak Jesus dehan katak liafuan diʼak sei haklaken iha “mundu tomak” no “ba nasaun hotu”. (Mateus 24:14) Zacarias mós hatete katak ema “husi lian hotu husi nasaun sira” sei rona ba mensajen neʼe. (Zacarias [Zakharia] 8:23) Tuir buat neʼebé apóstolu João haree iha ninia vizaun, ema neʼebé liu terus boot sei mai husi “nasaun, suku, povu no lian hotu”. (Apokalipse 7:9, 13, 14) Tan neʼe mak, bainhira ita bá haklaken, ita hakarak hakaʼas an haklaken ba ema neʼebé koʼalia língua seluk.