MORIS NUʼUDAR EMA KRISTAUN
Serbisu hamutuk atu haklaken iha área neʼebé ema koʼalia língua oioin
Baibain ema hakarak simu mensajen kona-ba liafuan diʼak se sira rona iha sira-nia língua rasik. Karik tanba ida-neʼe mak iha Pentekostes tinan 33, Jeová halo arranju hodi “ema judeu sira neʼebé hamtaʼuk Maromak, neʼebé mai husi nasaun hotu iha mundu tomak” bele rona liafuan diʼak iha sira-nia “lian rasik”, maski karik sira mós koʼalia língua seluk neʼebé ema hotu komprende, hanesan lia-ebraiku ka lia-gregu. (Aps 2:5, 8) Ohin loron, iha área neʼebé ema koʼalia língua oioin, kongregasaun sira halaʼo reuniaun iha língua oioin, no karik sira haklaken iha área neʼebé hanesan. Oinsá mak haklaken-naʼin husi kongregasaun sira-neʼe bele serbisu hamutuk atu fó sasin ba ema hotu, maibé la haklaken fali ba ema neʼebé kongregasaun seluk foin haklaken atu nuneʼe, la halo uma-naʼin sira sai hirus?
Koʼalia ba malu (Prv 15:22): Katuas haklaken nian husi kongregasaun sira tenke koʼalia hamutuk atu kria sistema ida hodi kongregasaun hotu bele haklaken iha dalan neʼebé diʼak liu. Karik se kongregasaun balu neʼebé koʼalia língua seluk iha haklaken-fatin neʼebé kiʼik deʼit, sira sei husu Ita atu la haklaken ba ema neʼebé la koʼalia Ita-nia língua. Maibé se sira iha haklaken-fatin neʼebé luan no sira la iha kbiit atu haklaken ba uma hotu, karik sira sei husu Ita atu haklaken ba ema hotu no fó-hatene ba sira kuandu ema ruma hatudu interese ba lia-loos. (od-IN p. 93 par. 37) Ka karik sira sei husu ajuda husi Ita-nia kongregasaun atu buka ema neʼebé koʼalia sira-nia língua no fó-hatene hela-fatin ba sira. (km 5/15 p. 1) Presiza hanoin-hetan katak, dala ruma iha uma ida bele iha ema oioin neʼebé koʼalia língua la hanesan. Iha rai balu, bainhira ita halo arranju sira-neʼe, ita mós presiza fó atensaun ba lei kona-ba fó sai ema nia informasaun.
Serbisu hamutuk (Éf 4:16): Halo tuir didiʼak matadalan husi katuas haklaken nian. Ita estuda hela Bíblia ho ema neʼebé koʼalia língua seluk, neʼebé kongregasaun seluk tau matan daudauk ba língua neʼe ka lae? Karik estudante neʼe sei laʼo ba oin lalais liu se Ita husu ema ida husi kongregasaun ka grupu neʼebé koʼalia ninia língua mak estuda ho nia.
Prepara (Prv 15:28; 16:1): Se ema iha Ita-nia haklaken-fatin koʼalia língua seluk, hakaʼas an atu haklaken ba nia. Bainhira halo preparasaun, buka-hatene língua saida mak ema barak koʼalia iha Ita-nia haklaken-fatin no download uluk tradusaun Bíblia ka vídeo ba Ita-nia sasán eletróniku. Ita mós bele uza aplikasaun JW Language atu aprende oinsá bele hasé ema iha língua oioin.