Jeová treinu ita atu halaʼo ita-nia knaar
1. Kuandu Jeová fó knaar ruma ba ema, nia mós halo saida?
1 Kuandu Maromak Jeová fó knaar ruma ba ema, nia mós ajuda sira hodi sira bele halo knaar neʼe ho didiʼak. Porezemplu, Jeová haruka Noé atu harii arka ka ró neʼebé hanesan kaixote boot. Maski Noé seidauk halo buat ruma hanesan neʼe uluk, maibé Maromak fó-hatene nia kona-ba oinsá atu halo ida-neʼe. (Gên 6:14-16) Nuneʼe mós ho Moisés, bibi-atan neʼebé laran-maus. Kuandu nia hetan knaar atu koʼalia ba katuas Israel nian no ba Faraun, Jeová fó-hatene nia hodi dehan: “Haʼu rasik sei apoia ó-nia ibun no haʼu sei hanorin ó kona-ba buat neʼebé ó tenke hatoʼo.” (Êx 4:12) Ohin loron kuandu ita simu knaar atu haklaken lia-foun diʼak, Maromak Jeová la husik ita mesak atu halaʼo knaar neʼe, maibé nia treinu ita atu halo ida-neʼe liuhusi Eskola Serbisu Kristaun nian no mós liuhusi Reuniaun Serbisu nian. Entaun, oinsá mak ita bele hetan buat diʼak husi treinu neʼebé nia fó mai ita?
2. Oinsá mak ita bele hetan buat diʼak husi Eskola Serbisu Kristaun nian?
2 Eskola Serbisu Kristaun: Haree nanis informasaun husi programa eskola nian antes ita tuir reuniaun. Tuirmai kuandu ita tuir reuniaun, ita bele haree oinsá estudante hatoʼo sira-nia knaar, no ida-neʼe sei aumenta ita-nia matenek atu hanorin. (Prov 27:17) Lori ita-nia livru Sekolah Pelayanan hamutuk ho ita kuandu tuir reuniaun sira no hakerek buat neʼebé ita aprende iha livru neʼe. Porezemplu, kuandu katuas neʼebé tau matan ba eskola koʼalia kona-ba pontu balu depois estudante ida-idak hatoʼo ninia knaar, diʼak atu marka pontu neʼebé ita hakarak atu uza, no hakerek nota iha pájina sorin husi livru neʼe. Maibé, dalan neʼebé diʼak liu atu aprende mak hodi hola parte iha eskola neʼe. Ita hola parte ona ka lae? Kuandu ita hetan knaar iha eskola, importante atu prepara ho didiʼak no halo tuir konsellu neʼebé ita simu. Tuirmai kuandu ita haklaken diʼak atu uza buat neʼebé ita aprende.
3. Saida mak sei ajuda ita atu hetan buat diʼak husi Reuniaun Serbisu nian?
3 Reuniaun Serbisu: Buat neʼebé bele ajuda ita atu hanoin-hetan informasaun husi Reuniaun Serbisu nian mak lee nanis informasaun sira no prepara atu fó komentáriu. Se ita hatoʼo komentáriu neʼebé badak, ida-neʼe sei fó oportunidade ba ema barak tan atu hola parte. Tau atensaun didiʼak ba drama kiʼik sira, no uza informasaun neʼebé ita aprende atu bele haklaken diʼak liután. Kuandu Ita-nia Serbisu Kristaun iha informasaun neʼebé sei ajuda ita iha ita-nia serbisu haklaken, importante atu rai didiʼak ida-neʼe hodi bele uza iha tempu seluk.
4. Tanbasá mak ita tenke uza didiʼak treinu neʼebé ita simu husi Maromak?
4 Hanesan knaar neʼebé Maromak fó ba Moisés no Noé, ita-nia knaar atu haklaken lia-foun diʼak iha mundu tomak mós la’ós buat neʼebé fasil. (Mt 24:14) Maski nuneʼe, ita bele halaʼo knaar neʼe ho didiʼak hodi sadere ba Jeová, ita-nia Mestre Boot Liu Hotu, no uza treinu neʼebé ita simu husi nia.—Isa 30:20.