Eskola Serbisu Kristaun ba tinan 2015 ajuda ita aumenta ita-nia matenek atu hanorin
1 David husi tempu uluk hatete: “Haʼu hein katak liafuan husi haʼu-nia ibun no hanoin iha haʼu-nia laran sai buat neʼebé monu loos ba Ita, oh, Jeová, haʼu-nia Fatuk no haʼu-nia Naʼi neʼebé Sosa Fali haʼu.” (Salmo [Mazmur] 19:14) Ita mós hakarak ita-nia liafuan monu loos ba Jeová nia laran tanba ita hafolin ita-nia priviléjiu hodi koʼalia kona-ba lia-loos iha kongregasaun no iha serbisu haklaken. Eskola Serbisu Kristaun, neʼebé halaʼo semana-semana iha kongregasaun hamutuk 111.000 liu iha mundu tomak, mak dalan ida Jeová uza hodi treinu ita ba serbisu neʼe. Eskola Serbisu Kristaun ajuda irmaun-irmán sira husi rai hotu no husi situasaun moris nian oioin, hodi bele sai haklaken-naʼin neʼebé diʼak no hatene oinsá atu hanorin ho matenek no aten-brani.—Apóstolu 19:8; Koloso 4:6.
2 Informasaun neʼebé sei uza iha programa ba eskola 2015 nian foti husi Aprende kona-ba Maromak nia Liafuan (igw) no “Disionáriu” husi Bíblia Sagrada Tradusaun Mundu Foun Mateus–Apokalipse. Agora iha mós mudansa kona-ba tempu hira atu uza ba Programa atu lee Bíblia. Mudansa neʼe, no mós matadalan kona-ba oinsá atu halaʼo knaar sira esplika liután iha parágrafu sira tuirmai neʼe.
3 Programa atu lee Bíblia: Irmaun neʼebé hetan knaar neʼe sei uza minutu rua atu hatoʼo pontu ida husi programa atu lee Bíblia ba semana neʼe. Irmaun neʼe presiza prepara didiʼak hodi bele hatoʼo pontu ida deʼit iha minutu rua nia laran. Depois, kongregasaun bele uza minutu neen hodi hatoʼo sira-nia komentáriu neʼebé la liu segundu 30 kona-ba saida mak sira gosta husi programa atu lee Bíblia ba semana neʼe. Maski ita presiza duni prepara didiʼak hodi bele fó komentáriu iha segundu 30 nia laran, maibé neʼe hanesan treinu diʼak ba ita. No ida-neʼe mós fó oportunidade ba ema seluk atu fó komentáriu kona-ba buat neʼebé sira aprende.
4 Knaar Númeru 1: Knaar neʼe atu lee Bíblia iha minutu 4 nia laran. Sira neʼebé simu knaar neʼe presiza treinu hodi lee beibeik ho lian makaʼas. Nia presiza temi liafuan sira ho loloos no moos hodi hatudu nia mós komprende buat neʼebé nia lee. Jeová nia atan sira hotu hakarak hakaʼas an hodi lee ho diʼak, tanba hatene lee mak importante duni iha ita-nia adorasaun. Ita kontente tebes tanba labarik barak iha kongregasaun hatene ona lee ho diʼak. Ita gaba inan-aman sira neʼebé uza tempu barak hodi treinu sira-nia oan sira atu lee.
5 Knaar Númeru 2: Irmán ida sei simu knaar neʼe atu hatoʼo iha minutu 5 nia laran. Bainhira informasaun ba knaar ida mai husi livru Aprende kona-ba Maromak nia Liafuan ka “Disionáriu” iha Bíblia Tradusaun Mundu Foun, estudante neʼe tenke prepara tuir tópiku neʼebé hakerek iha programa ida-neʼe, no halaʼo parte neʼe hanesan situasaun ida neʼebé bele mosu iha haklaken fatin. Estudante mós bele uza eskritura seluk neʼebé liga ho nia tópiku se hakarak. Katuas eskola nian sei hili irmán ida nuʼudar ajudante.
6 Knaar Númeru 3: Irmán ka irmaun ida sei simu knaar neʼe atu hatoʼo iha minutu 5 nia laran. Kuandu irmán ida mak hetan knaar neʼe, nia sei halaʼo hodi tuir matadalan ba Knaar Númeru 2.
7 Buat foun ba irmaun sira neʼebé hatoʼo Knaar Númeru 3: Kuandu irmaun ida mak hetan Knaar Númeru 3 neʼebé iha marka tuirmai (*), nia sei hatoʼo nuʼudar drama kiʼik kona-ba adorasaun família nian ka haklaken. Baibain, katuas eskola nian sei hili ajudante no situasaun ba knaar neʼe. Ninia ajudante mak ema ida husi nia família rasik ka irmaun ida iha kongregasaun. Estudante bele uza eskritura seluk neʼebé liga ho nia tópiku se hakarak. Se katuas kongregasaun ida mak halo knaar neʼe, nia bele hili rasik nia ajudante no situasaun. Ida-neʼe bele fó ezemplu diʼak ba kongregasaun bainhira sira haree katuas sira uza dalan neʼebé diʼak atu hanorin ninia família ka irmaun seluk.
8 Konsellu: Kuandu knaar ida-idak hotu tiha, katuas eskola nian sei uza minutu rua hodi koʼalia kona-ba buat diʼak iha diskursu neʼe no mós fó sujestaun kona-ba oinsá estudante bele halo diʼak liután hodi uza informasaun ruma husi livru Aprende husi Eskola Serbisu Kristaun nian. Kuandu katuas eskola nian konvida estudante atu hatoʼo ninia parte, nia sei la fó-hatene ba rona-naʼin kona-ba pontu konsellu ida-neʼebé mak estudante sei koko atu halo tuir. Maibé, kuandu estudante nia knaar hotu tiha, katuas eskola nian sei fó sai pontu konsellu saida mak estudante neʼe foin halo no koʼalia kona-ba buat neʼebé diʼak husi diskursu neʼe, ka esplika ho laran-diʼak oinsá mak estudante bele halo tuir pontu konsellu neʼe diʼak liután iha ninia diskursu tuirmai.
9 Estudante nia lista ba pontu konsellu nian bele hetan iha pájina 79-81 iha ninia livru Aprende husi Eskola Serbisu Kristaun nian. Reuniaun hotu tiha, katuas eskola nian sei hakerek nota iha estudante nia livru no husu nia mesak se nia halo ona treinu neʼebé liga ho ninia pontu konsellu ka lae. Katuas eskola nian bele dehan ba estudante oinsá nia halaʼo nia knaar ho diʼak ka fó sujestaun balu neʼebé sei ajuda nia liután. Bainhira estudante ida hetan konsellu husi katuas eskola nian, neʼe hanesan oportunidade ba nia atu simu treinu neʼebé bele ajuda nia laʼo ba oin iha lia-loos.—1 Timóteo 4:15.
10 Se estudante nia diskursu liu tempu, katuas eskola nian sei hapara sira iha dalan neʼebé la hamoe sira hodi uza sinu ka lian ruma. Bainhira estudante rona lian neʼe, nia sei remata fraze neʼebé nia koʼalia daudaun, depois tun tiha husi plataforma.—Haree livru Eskola Serbisu Kristaun nian, p. 282, par. 4.
11 Ema hotu neʼebé kumpre kritériu bele hola parte iha Eskola Serbisu Kristaun. (Haree livru Eskola Serbisu Kristaun nian, p. 282, par. 6.) Eskola neʼe fó treinu ba Jeová nia povu hodi sira bele haklaken no hanorin liafuan diʼak ho fiar an, dignidade no domin. Jeová sente kontente tebes tanba ita uza edukasaun neʼebé ita simu husi ninia organizasaun hodi fó glória no hahiʼi ba nia.—Salmo (Mazmur) 148:12, 13; Isaías (Yesaya) 50:4.
[Liafuan neʼebé foti husi pájina 5]
Laʼo ba oin hodi simu no halo tuir konsellu