Prepara ita-nia diskursu iha eskola

KNAAR ida-idak neʼebé ita simu iha eskola bele duni ajuda ita atu laʼo ba oin. Entaun, hakaʼas an atu halo didiʼak ita-nia knaar sira, no neineik-neineik ita rasik no mós ema seluk bele haree katak ita laʼo ba oin. (1 Timóteo 4:15) Eskola neʼe sei ajuda ita aumenta ita-nia matenek.

Ita sente taʼuk atu hatoʼo diskursu iha kongregasaun nia oin ka lae? Neʼe mak buat neʼebé baibain deʼit, maski ita hola parte iha eskola neʼe kleur ona. Maibé, iha buat balu neʼebé bele ajuda ita hodi la sai taʼuk demais. Iha uma, sai toman atu lee ho lian makaʼas. Kuandu ita tuir reuniaun kongregasaun nian, fó komentáriu beibeik, no se ita mak haklaken-naʼin, hola parte beibeik iha serbisu haklaken. Ida-neʼe sei aumenta liután ita-nia esperiénsia atu koʼalia iha ema nia oin. Liután neʼe, prepara nanis ita-nia knaar eskola nian, no treinu atu hatoʼo diskursu ho lian. Hanoin-hetan katak ita sei hatoʼo ita-nia diskursu neʼe iha ema laran-maus sira-nia oin. Antes hatoʼo diskursu, diʼak atu halo orasaun ba Jeová. Nia hakarak duni atu fó ninia espíritu santu ba ninia atan sira neʼebé husu ba nia.—Lucas 11:13; Filipe 4:6, 7.

Keta hanoin barak demais kona-ba buat neʼebé ita presiza halo. Baibain, ema presiza tempu atu hetan esperiénsia barak tan nuʼudar diskursu-naʼin no mestre neʼebé diʼak. (Miquéias [Mikha] 6:8) Se ita foin hola parte iha eskola neʼe, keta hanoin katak ita sei halo kedas diskursu neʼebé furak liu hotu. Maibé, hakaʼas an atu halo tuir pontu konsellu ida-idak neʼebé ita simu. Estuda didiʼak lisaun husi livru neʼe, neʼebé esplika kona-ba ita-nia pontu konsellu. Se bele, halo treinu hodi tuir sujestaun iha livru neʼe. Ida-neʼe sei ajuda ita atu iha esperiénsia barak tan kona-ba konsellu neʼe antes ita hatoʼo ita-nia diskursu iha kongregasaun. Nuʼudar tempu liu daudaun, ita sei hetan esperiénsia liután.

Dalan atu prepara ita-nia knaar atu lee

Prepara atu lee iha ema nia oin laʼós deʼit katak hatene atu temi liafuan sira ho didiʼak, maibé ida-neʼe envolve buat barak. Ita presiza hakaʼas an atu komprende didiʼak informasaun neʼebé ita atu lee. Entaun, kuandu ita simu knaar ida, lee kedas ida-neʼe ho objetivu atu komprende didiʼak. Koko atu hatene ideia husi fraze ida-idak no mós ideia neʼebé iha parágrafu ida-idak nia laran, hodi nuneʼe ita bele fó sai ideia neʼebé loos no bele lee ho sentimentu. Se bele, haree disionáriu hodi hatene oinsá atu temi liafuan foun balu. Buka atu hatene didiʼak informasaun neʼe. Inan-aman sira karik presiza ajuda sira-nia oan atu halo ida-neʼe.

Ita simu ona knaar atu lee parte balu husi Bíblia ka parágrafu sira husi Livru Haklaken ka lae? Entaun, se iha gravasaun iha ita-nia língua kona-ba informasaun sira-neʼe, diʼak se ita rona ba neʼe hodi haree oinsá mak lee-naʼin temi liafuan sira, lee fraze ruma, no oinsá nia lee ho lian neʼebé tun-saʼe. Tuirmai, halo tuir ida-neʼe iha ita-nia knaar atu lee.

Kuandu ita hahú prepara ita-nia knaar, ita presiza estuda didiʼak lisaun husi pontu konsellu ba ita-nia knaar. Se bele, diʼak atu haree fali lisaun neʼe kuandu ita treinu tiha ona atu lee ho lian makaʼas ba dala balu. Hakaʼas an atu halo tuir pontu konsellu neʼe ho didiʼak.

Treinu neʼe sei ajuda ita hodi haklaken diʼak. Nuʼudar ita hola parte atu haklaken, ita sei iha oportunidade barak atu lee ba ema seluk. Tanba Bíblia iha kbiit atu troka ema nia moris, entaun importante tebes atu ita lee ho didiʼak. (Ebreu 4:12) Maibé, se ita foin hatoʼo diskursu ba dala ida ka rua iha eskola, keta hanoin demais katak ita tenke halo tuir kedas pontu konsellu hotu kona-ba oinsá atu lee. Apóstolu Paulo hakerek karta ba katuas kristaun ida neʼebé iha ona esperiénsia barak hodi dehan: “Kontinua hakaʼas an iha ó-nia knaar atu lee iha ema nia oin.”—1 Timóteo 4:13.

Prepara diskursu tuir tema no situasaun

Kuandu ita simu knaar iha eskola neʼebé uza situasaun ruma, oinsá mak ita prepara ida-neʼe?

Iha buat tolu neʼebé ita presiza hanoin: (1) tema ba ita-nia diskursu, (2) ita-nia situasaun no ema neʼebé ita koʼalia bá, no (3) pontu konsellu ba ita-nia knaar.

Ita presiza halibur informasaun neʼebé liga ho tema ba ita-nia diskursu. Maibé antes ita prepara hotu diskursu neʼe, hanoin didiʼak kona-ba ita-nia situasaun no ema neʼebé ita koʼalia bá, tanba buat rua neʼe sei kona informasaun neʼebé ita hakarak atu fó sai no mós kona dalan neʼebé ita hatoʼo informasaun neʼe. Entaun, situasaun saida mak ita sei hili? Ita sei hatudu kona-ba oinsá atu haklaken liafuan diʼak ba ema neʼebé ita koñese? Ka ita sei hatudu kona-ba buat neʼebé sei akontese se ita hasoru ema ruma ba dala primeiru? Ema neʼe idade boot liu ita ka kiʼik liu ita? Nia sei hanoin saida kona-ba informasaun neʼebé ita planu ona atu koʼalia hamutuk? Ema neʼe hatene ona informasaun neʼe ka lae? Ita-nia objetivu ba ema neʼe mak saida? Resposta ba pergunta sira-neʼe sei ajuda ita hatene kona-ba oinsá atu hatoʼo ita-nia diskursu.

Ita bele hetan informasaun ba ita-nia knaar iha neʼebé? Pájina 33 toʼo 38 husi livru neʼe iha informasaun kona-ba “Oinsá atu halo riset”. Lee ida-neʼe, no tuirmai uza buat oioin neʼebé ita iha atu halo riset. No dala barak ita sei hetan kedas informasaun neʼebé barak liu fali buat neʼebé ita presiza. Kontinua lee informasaun sira-neʼe toʼo ita komprende didiʼak kona-ba ita-nia tópiku. Maibé nuʼudar ita lee, hanoin nafatin kona-ba situasaun neʼebé ita sei uza no mós hanoin kona-ba ema neʼebé ita koʼalia bá. Tau marka ba pontu diʼak sira neʼebé ita atu uza.

Antes organiza ita-nia diskursu no hili informasaun sira neʼebé ita sei uza, diʼak atu lee pontu konsellu ba ita-nia knaar. Tuir loloos, hodi halo tuir pontu konsellu neʼe mak parte importante ba ita-nia knaar.

Se ita hatoʼo diskursu tuir tempu neʼebé loos, ita bele hatoʼo informasaun hotu neʼebé ita prepara ona, no katuas eskola nian la presiza halo sinál neʼebé hatudu katak ita liu ona tempu. Maibé, iha serbisu haklaken, ita la presiza hanoin demais kona-ba tempu. Entaun, maski ita tenke haree liu kona-ba oinsá mak ita bele hanorin ho didiʼak, maibé nuʼudar ita prepara, ita mós presiza hanoin kona-ba tempu neʼebé ita iha.

Kona-ba situasaun neʼebé ita uza. Haree ba sujestaun sira iha pájina 82, no hili situasaun neʼebé kona ita-nia serbisu haklaken hodi ita bele hatoʼo informasaun tuir buat neʼebé mosu duni. Se ita hola parte iha eskola neʼe ba tempu kleur ona, haree ida-neʼe nuʼudar oportunidade atu ita laʼo ba oin no aumenta ita-nia matenek atu haklaken.

Se katuas eskola nian mak hili nanis situasaun ruma ba ita, diʼak atu simu ida-neʼe. Situasaun barak kona ita-nia serbisu haklaken. Se ita seidauk haklaken tuir situasaun neʼebé ita simu, ita bele hetan ideia ruma hodi koʼalia ba haklaken-naʼin neʼebé halo ona ida-neʼe. Se bele, antes hatoʼo ita-nia knaar iha eskola, koko atu hatoʼo informasaun neʼe hodi haklaken tuir situasaun neʼebé ita sei uza iha eskola neʼe. Ida-neʼe sei ajuda ita atu kumpre objetivu husi ita-nia treinu iha eskola neʼe.

Kuandu ita hatoʼo diskursu ida

Se ita mak irmaun ida, karik ita sei hetan knaar atu hatoʼo diskursu badak iha kongregasaun. Entaun kuandu prepara diskursu neʼe, ita mós bele hanoin kona-ba buat neʼebé temi tiha ona iha leten. Maibé, buat neʼebé la hanesan mak rona-naʼin no dalan neʼebé ita hatoʼo diskursu neʼe.

Ita presiza prepara informasaun neʼebé bele ajuda rona-naʼin hotu. Ema barak neʼebé tuir reuniaun, karik hatene ona lia-loos neʼebé importante husi Bíblia. Karik sira hatene didiʼak kona-ba informasaun neʼebé ita atu hatoʼo. Entaun, hanoin kona-ba saida mak sira hatene ona. Hakaʼas an atu hatoʼo informasaun neʼebé mós bele ajuda sira. Husu ba ita-nia an: ‘Oinsá mak haʼu bele uza informasaun neʼe atu ajuda haʼu no rona-naʼin atu hafolin Jeová liután? Oinsá mak informasaun neʼe ajuda ita atu komprende Maromak nia hakarak? Oinsá mak informasaun neʼe ajuda ita atu halo desizaun diʼak iha mundu neʼebé nakonu ho hakarak isin nian?’ (Éfeso 2:3) Atu hetan resposta diʼak ba pergunta sira-neʼe, ita presiza halo riset. Kuandu ita uza Bíblia, hakaʼas an atu la lee deʼit eskritura sira. Esplika eskritura neʼebé ita uza, no hatudu oinsá mak eskritura neʼe apoia buat neʼebé ita hanorin. (Apóstolu 17:2, 3) Keta koko atu esplika buat barak. Hatoʼo informasaun iha dalan neʼebé fasil ba ema atu hanoin-hetan.

Kuandu ita prepara, importante mós atu hanoin kona-ba dalan neʼebé ita sei hatoʼo diskursu. Keta hanoin katak ida-neʼe ladún importante. Treinu ho lian atu hatoʼo ita-nia diskursu. Ita-nia hakaʼas-an atu estuda no halo tuir pontu konsellu husi livru neʼe sei ajuda ita atu laʼo ba oin. Maski ita mak diskursu-naʼin neʼebé foun ka iha ona esperiénsia barak, maibé ita presiza prepara didiʼak atu nuneʼe ita bele koʼalia ho fiar no hatudu sentimentu tuir ita-nia informasaun. Nuʼudar ita halaʼo ita-nia knaar ida-idak iha eskola, hanoin-hetan katak ita-nia objetivu mak uza ita-nia kbiit atu koʼalia hodi hahiʼi Maromak Jeová.—Salmo (Mazmur) 150:6.