Prepara diskursu sira iha kongregasaun

PROGRAMA iha Eskola Serbisu Kristaun nian bele fó buat diʼak ba ema hotu iha kongregasaun. Ita mós bele hetan informasaun diʼak sira iha ita-nia reuniaun oioin no reuniaun boot sira. Tan neʼe, se ita simu knaar iha programa sira-neʼe, neʼe katak ita iha responsabilidade neʼebé boot. Apóstolu Paulo fó laran-manas ba katuas kristaun ida naran Timóteo atu tau atensaun didiʼak ba ninia hanorin. (1 Timóteo 4:16) Ema uza sira-nia tempu rasik atu tuir ita-nia reuniaun sira, no sira balun hakaʼas an duni atu bele tuir reuniaun. Sira halo ida-neʼe tanba hakarak atu hetan hanorin neʼebé sei ajuda sira atu hametin sira-nia relasaun ho Maromak. Entaun, ita-nia knaar atu hanorin matadalan sira-neʼe mak buat neʼebé importante tebes! Oinsá mak ita bele halo didiʼak ita-nia knaar neʼe?

Pontu importante husi programa lee Bíblia

Diskursu neʼe foti husi programa atu lee Bíblia ba semana neʼe. Ita tenke hakaʼas an atu hatudu sai oinsá mak informasaun neʼe kona ita-nia moris ohin loron. Hanesan hakerek iha Neemias 8:8, Ezra no ninia maluk sira lee Maromak nia Liafuan iha ema nia oin, esplika ida-neʼe, no “hatudu buat sira-neʼe katak sá”, no halo ema komprende. Nuneʼe, ita-nia knaar atu hatoʼo pontu importante husi programa lee Bíblia sei fó ita oportunidade atu halo ida-neʼe.

Oinsá mak ita prepara ita-nia knaar neʼe? Se bele, diʼak atu lee nanis eskritura sira husi ita-nia programa atu lee Bíblia, no halo ida-neʼe semana ida ka liu antes hatoʼo ita-nia knaar. Tuirmai, hanoin kona-ba ita-nia kongregasaun. Halo orasaun kona-ba neʼe. Buka bá konsellu, ezemplu no matadalan iha ita-nia programa atu lee Bíblia nian neʼebé kona kongregasaun nia presiza.

Halo riset mak importante. Se ita iha Watchtower Library iha CD-ROM, Indeks Publikasi Menara Pengawal, ka Índise Livru Haklaken iha tinan ida-idak nia rohan, uza didiʼak buat sira-neʼe. Kuandu ita halo riset kona-ba versíkulu sira neʼebé ita hakarak atu uza, ita bele hetan informasaun diʼak kona-ba buat neʼebé akontese, ka oinsá eskritura sai loos, ka haree oinsá eskritura neʼe fó sai kona-ba Jeová, ka hetan informasaun klaru liután kona-ba matadalan ruma. Diʼak atu la hatoʼo pontu barak demais. Esplika deʼit versíkulu balu neʼebé ita hili ona. Sin, diʼak liu atu hili deʼit versíkulu balu no esplika neʼe ho didiʼak.

Dala ruma, ita-nia knaar inklui mós konvida rona-naʼin atu fó komentáriu kona-ba pontu diʼak neʼebé sira hetan iha programa atu lee Bíblia ba semana neʼe. Saida mak sira hetan husi eskritura neʼe neʼebé ajuda sira kuandu estuda mesak ka estuda ho família ka kuandu haklaken ka iha moris loroloron nian? Oinsá mak eskritura neʼe hatudu sai Jeová nia hahalok nuʼudar nia halo buat ruma ba ninia povu no nasaun sira? Saida mak rona-naʼin aprende neʼebé hametin sira-nia fiar no ajuda sira atu hafolin Jeová liután? Keta uza tempu barak liu atu esplika informasaun neʼebé susar. Diʼak liu atu esplika eskritura nia arti no oinsá mak informasaun neʼe folin-boot ba ema hotu.

Reuniaun Serbisu nian

Kuandu ita hatoʼo diskursu hodi uza informasaun iha Ita-nia Serbisu Kristaun, ita presiza hatoʼo informasaun hotu neʼebé ita simu ona no ita la bele hili deʼit saida mak ita sente katak diʼak atu uza. Ita presiza ajuda rona-naʼin atu hanoin kona-ba eskritura sira neʼebé sai nuʼudar hun ba konsellu ruma neʼebé temi iha neʼe. (Tito 1:9) Tanba tempu mak limite deʼit, entaun dala barak diʼak liu atu la aumenta tan informasaun seluk.

Maibé, dala ruma mós ita iha knaar atu hatoʼo informasaun neʼebé la hakerek iha Ita-nia Serbisu Kristaun. Karik referénsia ba ita-nia knaar lori ita ba lisaun ruma iha Livru Haklaken, ka ita simu deʼit nota badak ida. Se nuneʼe, ita nuʼudar mestre tenke hili rasik ita-nia informasaun hodi tuir kongregasaun nia presiza. Karik ita presiza uza ai-knanoik badak ka uza esperiénsia neʼebé kona informasaun neʼe. Hanoin-hetan katak ita-nia knaar laʼós deʼit atu koʼalia kona-ba informasaun, maibé atu hatoʼo informasaun iha dalan neʼebé book kongregasaun atu kumpre serbisu neʼebé fó sai ona iha Maromak nia Liafuan no atu hetan ksolok hodi halo ida-neʼe.—Apóstolu 20:20, 21.

Kuandu ita prepara ita-nia knaar, hanoin kona-ba ema sira iha kongregasaun laran. Gaba sira kona-ba buat neʼebé sira halo ona. Oinsá mak halo tuir informasaun neʼe bele ajuda sira no bele aumenta sira-nia ksolok atu haklaken?

Ita-nia knaar inklui drama kiʼik ka entrevista ka lae? Se nuneʼe, diʼak liu atu prepara nanis. Karik ita sente katak fasil atu husu ema seluk hodi halo arranju neʼe ba ita, maibé dala barak ida-neʼe la lori rezultadu diʼak. Se bele, treinu uluk drama kiʼik ka entrevista antes loron reuniaun nian. Hakaʼas an atu uza drama kiʼik hodi halo informasaun neʼebé ita hatoʼo sai folin-boot liu.

Reuniaun boot sira

Dala barak irmaun sira neʼebé haburas ona hahalok husi espíritu no sai ona nuʼudar diskursu-naʼin no mestre diʼak, sei hetan knaar atu hola parte iha programa reuniaun boot nian. Reuniaun boot sira mak tempu espesiál tebes atu simu hanorin husi Maromak. Entaun, karik ita sei simu knaar atu halo diskursu manuskritu ka diskursu neʼebé iha nota badak deʼit, ka karik ita hetan knaar atu dirije drama kona-ba Bíblia neʼebé liga ho tempu modernu, ka karik ita simu matadalan kona-ba oinsá atu halaʼo knaar ruma iha reuniaun boot. Entaun, se ita iha oportunidade atu hola parte iha programa hanesan neʼe, estuda didiʼak ita-nia informasaun. Prepara didiʼak toʼo ita rasik hafolin informasaun neʼe.

Ba irmaun sira neʼebé iha knaar atu hatoʼo diskursu manuskritu, sira tenke lee deʼit informasaun neʼe liafuan ba liafuan. Sira labele troka fraze ka informasaun. Sira presiza estuda diskursu neʼe ho didiʼak hodi hatene saida mak pontu importante no oinsá mak diskursu neʼe esplika kona-ba pontu sira-neʼe. Irmaun sira-neʼe tenke treinu atu lee ho lian makaʼas toʼo sira bele hatoʼo diskursu neʼe ho didiʼak no temi fraze sira ho loloos, hatoʼo ho laran-manas no ho sentimentu, no mós hatoʼo ho fiar. Sira mós presiza uza lian neʼebé makaʼas hodi rona-naʼin neʼebé barak loos bele rona ho momoos.

Ba irmaun sira neʼebé hetan diskursu ho nota badak, sira rasik presiza prepara diskursu neʼe hodi tuir didiʼak informasaun neʼebé iha ona. Duké lee deʼit husi nota badak neʼe ka prepara fali ida-neʼe hodi sai nuʼudar diskursu manuskritu nian, diskursu-naʼin tenke hatoʼo diskursu neʼe husi laran no hatoʼo ho diʼak. Importante atu tuir tempu ba diskursu neʼe hodi bele hatoʼo ho klaru pontu importante ida-idak. Diskursu-naʼin tenke uza didiʼak informasaun no eskritura neʼebé sai nuʼudar pontu importante. Nia la bele aumenta tan pontu importante balu hodi troka fali buat neʼebé iha ona nota badak. Tuir loloos, hun ba ita-nia hanorin mak Maromak nia Liafuan. No katuas kristaun sira-nia knaar mak atu “haklaken Maromak nia liafuan”. (2 Timóteo 4:1, 2) Entaun, diskursu-naʼin tenke tau atensaun liu ba eskritura sira iha nota badak neʼebé nia simu. Nia presiza esplika ida-neʼe no hatudu oinsá ema bele halo tuir eskritura neʼe.

Keta demora

Ita serbí iha kongregasaun neʼebé iha oportunidade barak atu hatoʼo diskursu ka lae? Oinsá mak ita bele fó tempu hodi prepara didiʼak diskursu sira-neʼe? Keta demora atu prepara ita-nia knaar hodi hein toʼo besik loron atu hatoʼo diskursu nian.

Atu diskursu ida bele ajuda rona-naʼin sira, ita presiza hanoin didiʼak uluk kona-ba diskursu neʼe. Tan neʼe, diʼak se ita iha toman atu lee informasaun kuandu ita foin simu knaar neʼe. Ida-neʼe sei halo fasil ba ita atu hanoin beibeik informasaun neʼe nuʼudar ita halaʼo ita-nia atividade seluk. No iha semana balu ka loron balu antes ita atu hatoʼo diskursu neʼe, karik ita rona kona-ba situasaun ruma neʼebé bele fó ideia ba ita hodi halo ita-nia diskursu sai diʼak liu. Dala ruma, situasaun ida mosu no neʼe hatudu katak informasaun neʼe importante duni ba rona-naʼin. Maski ita presiza tempu barak atu lee no hanoin didiʼak kona-ba ita-nia informasaun kuandu ita foin simu, maibé ida-neʼe laʼós saugati deʼit. Kuandu tempu toʼo ona atu prepara ita-nia diskursu, ita sei hetan buat diʼak tanba hanoin uluk ita-nia informasaun. Hodi halaʼo ita-nia knaar iha dalan hanesan neʼe bele hamenus estrese no ajuda ita hatoʼo informasaun neʼebé book rona-naʼin nia laran.

Se ita hafolin prezente neʼebé ita simu hodi hola parte iha Maromak Jeová nia programa atu hanorin ninia povu, ita-nia diskursu sei fó hahiʼi ba nia no sei ajuda sira neʼebé hadomi Maromak.—Isaías (Yesaya) 54:13; Roma 12:6-8.