Pergunta husi haklaken-na’in

◼ Oinsá mak ita bele halaʼo reuniaun tuir oras?

Kuandu ita koʼalia kona-ba buat neʼebé diʼak ho ita-nia kolega, oras liu lalais deʼit. Hanesan neʼe mós ho reuniaun, dala ruma susar atu hatoʼo ita-nia parte tuir minutu neʼebé deside tiha ona. Atu halaʼo reuniaun tuir oras, saida deʼit mak ita bele halo?

Komesa tuir oras. Atubele hahú reuniaun tuir oras, diʼak se irmaun neʼebé loke reuniaun konvida irmaun-irmán sira atu buka tuur-fatin iha minutu ida ka rua antes komesa reuniaun. (Ecle 3:1) Reuniaun ho grupu kiʼik hanesan reuniaun atu bá haklaken mós labele demora tan deʼit hein ema seluk atu mai.

Prepara didiʼak. Dalan neʼebé diʼak atu halaʼo reuniaun tuir oras mak hodi prepara nanis. Komprende didiʼak ita-nia knaar. Hili pontu neʼebé importante, no hatoʼo ho klaru. Kuidadu atu la koʼalia demais kona-ba pontu neʼebé ladún importante. Hatoʼo ita-nia knaar iha dalan neʼebé fasil atu komprende. Se ita-nia parte iha mós drama kiʼik ka entrevista, treinu uluk ho sira neʼebé hola parte. Se bele, haree minutu hira mak ita uza kuandu treinu ita-nia knaar.

Fahe tempu didiʼak. Se ita atu halaʼo ita-nia knaar hodi hatoʼo diskursu ka husu pergunta, karik diʼak atu fahe informasaun neʼebé ita sei hatoʼo ba parte balu. Deside minutu hira mak ita sei uza ba parte ida-idak, no hakerek iha ita-nia nota. Kuandu hatoʼo ita-nia knaar, tuir minutu neʼebé deside tiha ona. Kuandu husu komentáriu ba rona-naʼin, kuidadu atu la uza tempu barak liu iha parte primeiru toʼo la iha tempu atu koʼalia kona-ba informasaun neʼebé kleʼan liu iha parte ikus. Irmaun neʼebé halaʼo Estudu Livru Haklaken presiza fahe tempu didiʼak atubele husu fali pergunta sira iha kaixa. Sira mós presiza kuidadu atu la uza tempu neʼebé deside tiha ona atu taka reuniaun ho knananuk no orasaun.

Ramata tuir oras. Se reuniaun neʼebé hatoʼo parte tuituir malu, hanesan Reuniaun Serbisu, irmaun ida-idak presiza hatene tempu neʼebé nia sei komesa no ramata. Kuandu irmaun ida nia parte liu minutu balu, irmaun neʼebé sei hatoʼo parte tuirmai bele halo saida? Entaun, irmaun neʼe bele habadak nia parte hodi hatoʼo deʼit pontu importante atu nuneʼe reuniaun bele ramata tuir oras. Irmaun neʼebé halo nuneʼe hatudu katak nia mestre neʼebé diʼak.

Nuʼudar rona-naʼin, ita bele ajuda irmaun neʼebé halaʼo nia knaar hodi fó komentáriu neʼebé badak no hatán tuir ninia pergunta. Entaun, mai ita hotu hakaʼas an atu ita-nia reuniaun bele laʼo iha dalan neʼebé “loloos no momoos”.—1 Kor 14:40.