Ita koko ona haklaken iha rai-nakaras ka lae?
1, 2. Irmaun sira neʼebé haklaken ona iha tuku lima ka neen lokraik hatete saida?
1 Ita hotu sente kontente kuandu ita halaʼo ita-nia serbisu ho didiʼak, no ita haree ida-neʼe nuʼudar bensaun. (Ecle 3:10-13) Ita mós sente hanesan neʼe ho ita-nia serbisu haklaken. Kuandu ita hakaʼas an atu koʼalia lia-loos ba ema neʼebé hakarak rona, ita fila ba uma ho kontente. Ita sente kontente tanba ita-nia serbisu lori rezultadu diʼak.
2 Kongregasaun barak arranja grupu haklaken iha tuku lima ka neen lokraik, no hetan rezultadu diʼak. Haklaken-naʼin sira neʼebé tuir arranju neʼe hatete katak iha oras hanesan neʼe ema barak ladún okupadu no gosta atu rona lia-foun diʼak. Ita mós koko ona haklaken iha oras hanesan neʼe ka lae?—Mc 1:32-34.
3. Arranju haklaken iha tuku lima ka neen lokraik diʼak ba sé deʼit?
3 Arranja grupu haklaken: Iha kongregasaun balu haklaken-naʼin barak gosta tuir haklaken iha tuku lima ka neen lokraik. Katuas sira neʼebé organiza grupu iha oras hanesan neʼe hanoin oinsá mak haklaken-naʼin sira neʼebé fila husi eskola no serbisu bele tuir. Arranju hanesan neʼe mós bele ajuda irmaun-irmán sira neʼebé la bele bá haklaken iha findesemana, hodi nuneʼe sira bele hola parte beibeik iha serbisu haklaken.
4. Ita bele halo saida deʼit kuandu haklaken iha tuku lima ka neen lokraik?
4 Ita bele halo buat barak kuandu haklaken iha tuku lima ka neen lokraik. Porezemplu, ita bele haklaken husi uma ba uma hodi uza livru fulan-fulan nian ka livru neʼebé fahe iha fulan neʼe. Ita mós bele haklaken iha dalan atu koʼalia ho ema neʼebé foin sai husi serbisu. No mós, ita bele halo vizita fali.
5, 6. Oinsá mak ita bele uza matenek kuandu haklaken iha rai-nakaras?
5 Uza matenek: Kuandu haklaken iha rai-nakaras no haree katak oras neʼe ladún diʼak ba uma-naʼin, karik tanba sira atu han, diʼak atu fó-hatene katak ita bele fila fali loron seluk. Baibain, diʼak atu haklaken no vizita ema iha oras neʼebé seidauk nakukun, tanba se kalan liu, karik sira prepara ona atu toba.
6 Kuandu ita serbí Maromak Jeová “kalan-loron”, ita bele fiar katak nia sei haraik bensaun ba ita-nia hakaʼas-an.—Apok 7:15.