Dalan foun atu haklaken iha fatin públiku
1. Ema kristaun iha apóstolu sira-nia tempu haklaken iha neʼebé deʼit?
1 Ema kristaun iha apóstolu sira-nia tempu haklaken husi uma ba uma, no mós iha fatin públiku. (Apos 20:20, MF) Porezemplu, sira bá iha templu tanba sira hatene ema barak sei iha neʼebá. (Apos 5:42) Bainhira apóstolu Paulo iha sidade Atenas, nia haklaken loron-loron ba sira neʼebé nia hasoru iha merkadu. (Apos 17:17, MF) Ohin loron, dalan primeiru neʼebé ita habelar liafuan diʼak mak liuhusi haklaken husi uma ba uma. Maski nuneʼe, ita mós haklaken iha loja, iha merkadu, iha terminál, no iha fatin pasiar nian hodi bele hasoru ema barak. Maski haklaken-naʼin ida-idak bele hola parte atu haklaken iha fatin públiku, maibé sira barak sei bele hola parte iha dalan foun rua kona-ba haklaken iha fatin públiku.
2. Saida mak dalan foun kona-ba haklaken neʼebé komesa iha fulan-Novembru 2011?
2 Haklaken espesiál iha fatin públiku iha sidade boot: Hanesan konta iha Buku Tahunan 2013 iha pájina 16 no 17, dala primeiru neʼebé ita koko dalan foun neʼe mak iha fulan-Novembru 2011 iha sidade Novaiorke. Hodi uza meza no spanduk ho roda, tau poster no mós ita-nia livru sira iha língua oioin no tau iha fatin neʼebé ema barak laʼo liu. Loron-loron ema rihun ba rihun laʼo liu fatin neʼe, inklui mós sira neʼebé hela iha uma andár neʼebé susar ba ita atu hasoru, no mós sira neʼebé sempre sai husi uma. Ema barak tebes gosta atu haree ita-nia livru sira. Foin lalais iha fulan ida deʼit nia laran, irmaun-irmán fahe revista hamutuk 3.797 no livru hamutuk 7.986. Ema barak neʼebé laʼo liu husu mós atu estuda Bíblia. Tanba objetu mak atu komesa estuda Bíblia ho ema, bainhira ema ida fó-hatene ninia naran no diresaun, haklaken-naʼin sira haruka kedas informasaun neʼe ba kongregasaun neʼebé besik ema neʼe nia área hodi bele vizita nia iha uma.
3. Dalan foun neʼe agora halo iha neʼebé deʼit?
3 Tanba dalan foun neʼe hetan susesu, agora ida-neʼe mós komesa iha sidade boot barak iha rai oioin. Sukursál iha rai ida-idak mak deside sidade ida-neʼebé mak presiza uza dalan foun neʼe atu haklaken. Baibain sira hili sidade neʼebé iha terminál boot barak ka iha uma andár barak neʼebé uza nuʼudar kantór ka hela-fatin, tanba iha fatin neʼe ema barak iha. Depois neʼe sukursál sei haruka karta ba kongregasaun sira neʼebé sei hola parte no fó sai informasaun liután kona-ba neʼe. Baibain, sira neʼebé serbí nuʼudar pioneiru regulár ka pioneiru tempu-tomak mak hola parte iha serbisu haklaken neʼe. Maibé dala ruma pioneiru estra mós bele hola parte.
4. Haklaken-naʼin sira halo saida kuandu haklaken iha fatin públiku iha sidade boot?
4 Dalan atu halaʼo serbisu haklaken neʼe: Sira neʼebé haklaken iha fatin públiku iha sidade boot, baibain sira hein toʼo ema ida hakbesik ba meza ka spanduk neʼebé hatudu ita-nia livru sira. Bainhira ema mai atu haree, sira konvida nia atu foti livru ida neʼebé nia hakarak atu lee. Se nia iha pergunta ruma, pioneiru sira kontente atu hatán hodi uza Bíblia. Se nia foti livru ida, pioneiru sira la fó-hatene ba nia kona-ba fó kontribuisaun. Maibé se nia husu kona-ba oinsá ita hetan osan atu halaʼo ita-nia serbisu haklaken, pioneiru sira bele esplika ba nia katak nia bele haruka kontribuisaun ba diresaun neʼebé fó sai iha livru neʼebé nia foti. Se bele, sira bele husu ba nia: “Ita hakarak ema ida atu vizita ita iha ita-nia uma ka lae?” ka “Ita hatene katak ita bele uza livru neʼe atu estuda Bíblia ho gratis?”
5. Kaben-naʼin ida sente oinsá kona-ba haklaken iha dalan foun neʼe?
5 Haklaken iha dalan hanesan neʼe lori rezultadu diʼak tebes. Kaben-naʼin ida hatete: “Kuandu ami hein meza no haree ema rihun ba rihun laʼo liu loron-loron, ida-neʼe fó-hanoin mai ami katak ita iha serbisu boot tebes atu haklaken ba ema hotu iha mundu tomak. Hodi haree ema-lubun sira-neʼe no hanoin kona-ba oinsá Jeová hanoin tebes ema ida-idak, ida-neʼe hametin ami-nia desizaun atu tau uluk serbisu haklaken iha ami-nia moris. Ami imajina katak Jeová haree ho didiʼak ema ida-idak nia laran neʼebé laʼo liu ami-nia meza, no buka sira neʼebé iha laran neʼebé diʼak. Ami sente katak ami serbisu hamutuk ho anju sira.”
6. (a) Saida mak dalan foun ida seluk kona-ba haklaken iha fatin públiku neʼebé kongregasaun mak organiza? Oinsá mak ida-neʼe la hanesan ho haklaken espesiál iha fatin públiku iha sidade boot? (b) Oinsá mak kongregasaun sira bele serbisu hamutuk hodi hola parte atu haklaken iha fatin públiku?
6 Haklaken iha fatin públiku neʼebé kongregasaun mak organiza: Iha dalan foun ida tan kona-ba haklaken iha fatin públiku, maibé katuas sira iha kongregasaun mak organiza ida-neʼe. Haklaken-naʼin sira tau meza ka spanduk ho roda neʼebé hatudu sai ita-nia livru sira, maibé iha sira-nia kongregasaun nia haklaken-fatin deʼit. Ida-neʼe la hanesan haklaken espesiál iha fatin públiku iha sidade boot, tanba haklaken-naʼin husi kongregasaun oioin mak hola parte atu haklaken iha área neʼebé sukursál mak hili.—Haree ba kaixa “Presiza serbisu hamutuk ho didiʼak”.
7. Se presiza, katuas sira bele halo saida hodi organiza haklaken iha fatin públiku?
7 Katuas sira sei koʼalia hamutuk atu haree se kongregasaun nia haklaken-fatin iha área ruma neʼebé ema barak laʼo bá-mai. Se iha, sira bele organiza atu halaʼo haklaken iha fatin públiku. Sira bele tau meza ka spanduk ho livru sira iha fatin hanesan terminál, fatin pasiar nian, iha dalan neʼebé ema barak laʼo liu, ka iha fatin neʼebé iha loja barak, universidade, iha aeroportu, no mós fatin neʼebé ema aluga atu halaʼo atividade ruma. Baibain sira hetan rezultadu diʼak hodi nafatin tau meza iha fatin neʼebé hanesan, no iha loron no oras neʼebé hanesan. Iha fatin neʼebé iha loja kiʼik barak, diʼak liu atu tau meza iha fatin neʼebé ema laʼo bá-mai hodi tama-sai loja kiʼik sira-neʼe duké tau deʼit iha loja boot nia oin. Diʼak mós tau spanduk kiʼik ida iha área seluk neʼebé ema barak laʼo bá-mai. Katuas sira bele download iha ita-nia sítiu dezeñu neʼebé prepara tiha ona atu halo poster kona-ba Livru Haklaken no Matan-moris bá! no mós livru Bíblia Hanorin. Dezeñu sira-neʼe atu uza deʼit ba haklaken iha dalan foun sira-neʼe. Haklaken-naʼin sira neʼebé hola parte iha serbisu neʼe sei halo hanesan ho sira neʼebé halaʼo haklaken espesiál iha fatin públiku iha sidade boot, no tenke halo tuir ho didiʼak matadalan husi katuas haklaken nian. Se ema ida hatudu interese no fó ninia naran no diresaun maibé hela iha kongregasaun seluk nia haklaken-fatin, prenxe kedas formuláriu Please Follow Up (S-43) no fó ba katuas neʼebé serbí nuʼudar sekretáriu.
8. Maski kongregasaun la iha área diʼak atu halo tuir dalan foun atu haklaken iha fatin públiku, maibé haklaken-naʼin ida-idak bele aproveita oportunidade saida deʼit?
8 Kuandu Ita rasik haklaken iha fatin públiku: Kongregasaun balu karik la iha área ruma neʼebé ema barak laʼo bá-mai, tan neʼe sira la iha razaun atu tau meza neʼebé hatudu sai ita-nia livru sira. Maski nuneʼe, diʼak ba haklaken-naʼin sira atu haklaken iha fatin naran deʼit. Porezemplu, iha área neʼebé ita haklaken, iha loja barak neʼebé tuituir malu ka lae? Iha fatin pasiar nian neʼebé ema barak bá atu halimar ka lae? Iha fatin ida neʼebé ema barak halibur hamutuk atu halaʼo atividade ruma tinan-tinan ka lae? Se iha, ita mós bele aproveita oportunidade sira-neʼe atu haklaken iha fatin públiku.
9. Tanbasá mak diʼak atu nafatin buka oportunidade atu haklaken ba sira neʼebé ita hasoru iha fatin naran deʼit?
9 Maromak Jeová hakarak atu “ema hotu hetan maksoin no simu matenek kona-ba lia-loos”. (1 Tim 2:4) Tan neʼe, ita hakaʼas an atu habelar lia-foun reinu nian ba ema barak antes mundu neʼe ramata. (Mt 24:14) Iha rai barak susar atu hasoru ema iha sira-nia uma. Maibé ita bele hasoru sira bainhira sira iha fatin públiku. Karik ema balu sei rona kona-ba liafuan diʼak tan deʼit ita haklaken iha fatin públiku. Entaun, mai ita kaer didiʼak ita-nia knaar hodi haklaken ba ema hotu neʼebé ita hasoru iha fatin naran deʼit.—2 Tim 4:5.
[Dezeñu iha pájina 5]
Presiza serbisu hamutuk ho didiʼak
Dala ruma haklaken-naʼin sira husi kongregasaun ida haklaken iha kongregasaun seluk nia haklaken-fatin. Sira haklaken iha fatin neʼebé hanesan, iha fatin para karreta nian neʼebé hanesan, iha terminál, no iha loja no kantór sira neʼebé hanesan. Haklaken-naʼin sira husi kongregasaun ida seluk mós husik livru ruma iha fatin neʼebé hanesan. Dala ruma ida-neʼe halo patraun ba kantór sira no mós uma-naʼin sira iha área sira-neʼe sente hirus. Tan neʼe, diʼak atu haklaken deʼit iha ita-nia kongregasaun nia haklaken-fatin kuandu haklaken iha fatin públiku.
Se haklaken-naʼin balu hakarak haklaken iha kongregasaun seluk nia haklaken-fatin, sira presiza koʼalia ho katuas haklaken nian iha sira-nia kongregasaun. Katuas neʼe sei kontaktu katuas haklaken nian iha kongregasaun neʼe hodi husu lisensa antes bá haklaken. Se kongregasaun neʼebé uza língua seluk mós haklaken iha área neʼebé hanesan, katuas haklaken nian husi kongregasaun sira-neʼe presiza koʼalia ba malu atu la halo uma-naʼin sira sente hirus. Hodi serbisu hamutuk ho didiʼak, “buat hotu sei halo loloos no momoos”.—1 Kor 14:40.
[Dezeñu iha pájina 6]
[Dezeñu iha pájina 6]