Oinsá atu haklaken iha dalan?

1. Oinsá mak ita bele halo tuir Jesus nia ezemplu?

¹ Kuandu Jesus iha rai, nia la moe atu koʼalia ho ema neʼebé nia hasoru iha dalan no iha fatin oioin neʼebé iha ema barak. (Lc 9:57-61; Joao 4:7) Nia hakarak fahe ninia mensajen importante ba ema barak. Ohin loron, haklaken iha dalan fó oportunidade kapás ba ema barak atu hatene kona-ba matenek husi Maromak. (Prov 1:20) Se ita prontu atu hakbesik ba ema no uza matenek hodi haree didiʼak ba ema ida-idak nia situasaun, ida-neʼe bele lori rezultadu diʼak liután mai ita.

2. Oinsá mak ita bele hakbesik ba ema kuandu ita haklaken iha dalan?

² Hakbesik ba ema: Baibain, diʼak liu ita mak hakbesik ba ema duké hamriik ka tuur deʼit iha fatin ida hodi hein ema atu hakbesik ba ita. Hateke ba ema, hatudu oin-midar, no hasé iha dalan neʼebé hatudu laran-diʼak no kalma. Se Ita hamutuk ho haklaken-naʼin sira seluk iha área ida, baibain diʼak liu atu la besik malu demais. Liután neʼe, ita mós presiza buka dalan atu hasoru fali ho ema neʼebé hatudu interese ba lia-loos. Se bele, kuandu atu ramata koʼalia ho ema neʼe, husu oinsá atu hasoru malu fali ka kontaktu fali. Irmaun-irmán balu neʼebé haklaken iha dalan, sira bá iha fatin neʼebé hanesan iha oras neʼebé hanesan, atubele hasoru fali beibeik ho ema neʼebé hanesan no kontinua fahe lia-loos ba sira.

3. Oinsá mak ita bele uza matenek kuandu ita haklaken iha dalan?

³ Uza matenek: Uza ita-nia matenek kuandu ita hili atu hamriik iha fatin neʼebé no atu koʼalia ba sé. Ita la presiza hanoin katak ita tenke koʼalia ba ema hotu neʼebé laʼo liu ita. Haree didiʼak ema ida-idak nia situasaun. Porezemplu, se ita haree ema neʼebé laʼo ho ansi, karik diʼak liu atu la hapara nia. Se ita haklaken iha fatin neʼebé iha serbisu-naʼin barak, uza matenek atu la halo sira laran-susar hodi hanoin kona-ba sira-nia xefe. Baibain, diʼak liu ita haklaken ba ema neʼebé sai husi serbisu-fatin, duké koko atu koʼalia ba ema neʼebé atu tama ba serbisu-fatin. Hakbesik ba ema hodi la halo sira hakfodak ka taʼuk. Liután neʼe, uza ita-nia matenek kuandu ita fahe livru sira. Se ema ladún interese ba ita-nia mensajen, karik diʼak liu atu fó tratu duké fahe Livru Haklaken.

4. Tanbasá mak haklaken iha dalan bele lori rezultadu diʼak no haksolok mai ita?

⁴ Liuhusi haklaken iha dalan, ita bele kari fini lia-loos nian barak iha tempu badak deʼit. (Ecle 11:6) Ita mós bele hasoru ema neʼebé baibain ita la hasoru iha haklaken uma ba uma. Sin, haklaken iha dalan bele lori rezultadu diʼak no haksolok mai ita. Entaun, Ita mós bele halo planu atu hola parte iha haklaken iha dalan ka lae?