Dalan haklaken públiku foun no kapás
1. Kongregasaun bele arranja haklaken públiku iha dalan foun saida?
1 Kongregasaun sira mak iha fatin públiku neʼebé iha ema barak bá-mai, sira bele organiza haklaken públiku nian liuhusi uza meza-oan ka karrosa sira neʼebé ita bele tau livru hodi ema bele haree. Karik haklaken-naʼin ida bele hamriik ka tuur iha karrosa nia sorin. Maibé se uza meza, tenkesér naʼin-rua mak hein hamutuk meza neʼe. Sira neʼebé hein la bele oin-buis, sira tenkesér oin-midar. Se ema ida mak mai atu haree ita-nia livru sira, haklaken-naʼin ida bele koʼalia ho nia, karik bele husu nia, “Ita-Boot uluk hanoin ona ka lae saida mak Bíblia koʼalia kona-ba tópiku ida-neʼe?” Haklaken-naʼin ida seluk bele haklaken iha dalan la formál dook uitoan husi fatin neʼe hodi nia mós bele tau matan hela ba meza ka karrosa neʼe.
2. Konta toʼok esperiénsia ida neʼebé hatudu katak uza dalan amostra livru sira lori duni rezultadu diʼak.
2 Ema barak komesa estuda Bíblia liuhusi dalan haklaken neʼe. Estudante universidade ida iha eskola hili atu hakerek kona-ba Testemuña ba Jeová, maibé nia buka la hetan Reuniaun-Fatin. Semana tuirmai, nia haree haklaken-naʼin sira amostra livru sira iha meza leten iha kampus laran. Nia mós komesa estuda Bíblia husi tempu neʼebá kedas, agora hetan ona batizmu no hola parte fali iha dalan haklaken ida-neʼe.
3. Tanbasá haklaken-naʼin barak gosta dalan haklaken foun neʼe?
3 Kona-ba dalan haklaken públiku neʼe, irmán ida hatete: “Ema balun mai iha meza no foti revista sira. Balun tan nunka rona kona-ba Testemuña ba Jeová mak sé. Dalan haklaken neʼe fó duni dalan ba ema oioin atu rona Bíblia nia mensajen.” Irmán ida tan hatete: “Dalan haklaken foun neʼe diʼak tebes, tanba ema mak mai buka ita. Balun hakarak hatene ita halo saida.”
4. Tanbasá mak diʼak atu tau meza ka karrosa iha fatin ida deʼit, iha loron no oras neʼebé hanesan semana-semana?
4 Semana-semana, diʼak atu tau meza ka karrosa iha fatin ida deʼit, iha loron no oras neʼebé hanesan. Hodi nuneʼe, ema bele sai toman haree ita iha fatin neʼe no sira mós bele sente la taʼuk atu husu pergunta ruma ka mai foti livru ruma. Iha imi-nia kongregasaun, sira organiza dalan haklaken hanesan neʼe ka lae? Se organiza ona, koko hola parte iha dalan haklaken foun no kapás neʼe “hodi haklaken Maromak nia Ukun” iha fatin oioin.—Lucas 9:60.