Uza didiʼak ita-nia tempu ba haklaken
Iha tinan serbisu 2014 nian, Testemuña ba Jeová uza oras 1.945.487.604 hodi haklaken ba ema, neʼe hatudu katak ita hakarak duni atu uza ita-nia moris hodi serbí Jeová! (Salmo [Mazmur] 110:3; 1 Korinto 15:58) Tanba “tempu badak liu ona”, entaun bele ka lae, atu ita hakaʼas an uza ita-nia tempu atu buka ema barak liután hodi haklaken ba sira?—1 Korinto 7:29.
Situasaun iha fatin ida-idak la hanesan, tan neʼe, se ita hakarak uza didiʼak ita-nia tempu atu haklaken ba ema, ita la bele haklaken iha dalan ida deʼit. Porezemplu, kuandu ita uza dalan ida atu haklaken beibeik, maibé nunka hetan ema ida, karik ita presiza buka fali dalan seluk atu haklaken, loos ka lae? Karik sujestaun sira tuirmai neʼe bele ajuda ita atu ita bele uza didiʼak ita-nia tempu hodi ita la “tuku anin deʼit”.—1 Korinto 9:26.
Haklaken husi uma ba uma: Ba tinan barak ona haklaken-naʼin sira iha toman atu hahú haklaken husi uma ba uma. Maibé tanba agora ema barak mak serbisu iha loron, karik diʼak atu haklaken husi uma ba uma iha tempu neʼebé uma-naʼin tama uma ona, ka iha tempu neʼebé sira deskansa uitoan ona, hanesan iha lokraik ka rai-nakaras. Iha loron, karik diʼak atu haklaken iha dalan ka haklaken ba loja sira, karik neʼe sei fó rezultadu diʼak liután.
Haklaken públiku: Diʼak atu tau karrosa iha fatin neʼebé ema barak laʼo bá laʼo mai iha kongregasaun nia área haklaken nian. (Haree Ita-nia Serbisu Kristaun fulan-Jullu 2013, pájina 5.) Se fatin neʼebé baibain ita tau karrosa mak ema ladún barak ona hanesan uluk, karik Kongregasaun nia Grupu Serbisu nian sei foti desizaun atu muda karrosa bá fali fatin seluk neʼebé iha ema barak.
Vizita fali no estuda Bíblia: Se tempu haklaken husi uma ba uma nian mak ema ladún iha uma, karik diʼak atu uza tempu neʼe hodi bá halo vizita fali ka estuda ho ema. Maibé se tempu neʼe mak ema barak iha uma, ita hakarak uza tempu neʼe atu haklaken. Porezemplu, karik sábadu dadeer mak tempu neʼebé ema barak iha uma no tempu neʼe mak diʼak tebes atu haklaken husi uma ba uma. Se nuneʼe, karik diʼak atu arranja halaʼo estudu ho ema iha lokraik ka iha kalan, loos ka lae? No bainhira atu bá halo vizita fali, karik diʼak atu halo planu bá vizita ema sira neʼebé hela iha área ida ka bá área neʼebé besik malu hodi ita la estraga tempu.
Ita hatene katak, atu ita hasoru ema ka la hasoru ema, ita bele sura oras haklaken nian. Maibé ita bele hetan solok liután se ita hetan rezultadu diʼak. Tan neʼe, se ita sente katak dalan neʼebé ita uza atu haklaken ba ema mak ladún fó rezultadu diʼak, koko fali dalan seluk. Halo orasaun ba “toʼos-naʼin” Jeová atu fó matadalan ba ita atu ita bele uza didiʼak ita-nia tempu ba haklaken!—Mateus 9:38.