Oinsá atu uza karrosa hodi haklaken

Uza karrosa atu haklaken mak dalan neʼebé diʼak tebes hodi dada ema laran-diʼak sira tama lia-loos. (João 6:44) Tan neʼe mak katuas sira hetan ona lia-menon atu organiza haklaken iha fatin públiku iha kongregasaun ida-idak nia área neʼebé ema barak laʼo bá laʼo mai. Ho karrosa, baibain ita la presiza husu lisensa husi governu atu tau iha fatin neʼebé, tanba ita bele muda karrosa bá-mai husi fatin ida-idak. Maibé, sé mak bele hola parte iha dalan haklaken ida-neʼe? Tenkesér hili haklaken-naʼin neʼebé matenek atu tetu situasaun, respeitu no hatais moos, no matenek atu koʼalia ho ema. Tuirmai ita sei haree toʼok saida mak bele no labele halo iha dalan haklaken neʼe hodi ajuda haklaken-naʼin atu hetan rezultadu diʼak.

Bele halo:

Oin-midar, hasé ema, no isin-moris. Baibain haklaken-naʼin kumprimenta ema ho oin-midar bainhira ema ida laʼo liu. Se ema ida mak hateke ba livru sira iha karrosa neʼe, karik ita bele koʼalia ba nia, “Se hakarak lee bele foti deʼit.”
Atu hamriik dook ka besik ba karrosa, neʼe depende ba situasaun iha ita-nia haklaken fatin. Iha fatin balu, haklaken-naʼin sira sente katak hamriik besik ba karrosa, neʼe diʼak tebes. Maibé balu tan sente katak hamriik besik halo ema sente moe atu haree livru sira. Tan neʼe sira hamriik dook uitoan husi karrosa toʼo ema ida bá haree livru sira mak foin sira bá koʼalia ho ema neʼe. Bainhira ita haree katak ema ida hakbesik ba atu haree livru sira, koko atu koʼalia ho nia. Karik bele husu, “Uluk Ita-Boot hanoin ona ka lae kona-ba pergunta neʼe?”
Se bele, uza beibeik Bíblia atu koʼalia ho ema.
Se ema ida mak foti livru ida neʼebé ita uza ba estuda ho ema, hanesan livru Bíblia Hanorin, bele esplika ba nia oinsá mak ita estuda Bíblia ho ema. Husu ba nia katak agora ita atu hatudu vídeo ida kona-ba Tansá Estuda Bíblia? neʼebé ita download tiha ona.
Se bele, husu ema neʼebé hatudu interese atu oinsá mak ita bele kontaktu nia. Se nia hela iha kongregasaun seluk nia área, kontaktu haklaken-naʼin ida husi ninia área atu ajuda nia.