Aumenta ita-nia matenek iha serbisu haklaken—Komesa koʼalia hodi haklaken iha dalan la formál
Tanbasá importante: Bainhira ita bá haklaken husi uma ba uma, ema barak mak bá eskola, serbisu, ka bá fatin seluk, tan neʼe ita la bele hasoru sira. Maibé ita bele hasoru ema sira-neʼe iha mikrolet ka bís laran, ospitál, serbisu-fatin, ka eskola. Maromak Jeová nia hakarak mak ema hotu hetan oportunidade atu rona liafuan diʼak kona-ba Ninia Ukun. (1 Timóteo 2:3, 4) Maibé hodi bele fó sasin ba sira, dala barak Ita mak presiza komesa koʼalia uluk ba sira.
Oinsá atu halo ida-neʼe:
• Haree didiʼak ema neʼebé Ita atu koʼalia nia situasaun. Ema neʼe prontu atu koʼalia ho Ita ka lae? Fatin neʼe diʼak atu koʼalia ka lae? Nia bele fó tempu atu dada lia uitoan ho Ita ka lae? Haklaken-naʼin balu hateke uluk ba ema hodi hatudu oin-midar, no se ema neʼe mós oin-midar fali, sira komesa koʼalia.
• Se ita taʼuk atu hakbesik ba ema, halo orasaun badak iha laran.—Neemias 2:4; Apóstolu 4:29.
• Bele hahú koʼalia ho liafuan badak deʼit, hanesan fó kumprimenta. Bainhira Jesus fó sasin ba feto Samaria, nia la koʼalia kedas kona-ba Maromak nia Ukun. (João 4:7) Dala barak ita bele komesa koʼalia ho ema hodi gaba sira hanesan: “Mana nia oan neʼe bonitu/a loos.” Ita mós bele komesa koʼalia hodi husu pergunta hanesan: “Horikalan Ita nonton notísias ka lae?”
• Bainhira Ita komesa koʼalia ona, buka jeitu oinsá atubele koʼalia kona-ba lia-loos, maibé lalika ansi. Kontinua dada lia ho nia. Karik ita bele koʼalia buat ruma neʼebé halo nia hakarak hatene no book nia atu husu fali pergunta ruma ba Ita. Porezemplu, se ita koʼalia kona-ba família, ita bele dehan: “Haʼu iha informasaun kapás kona-ba haboot oan.” Se ita koʼalia kona-ba notísias ruma, ita bele dehan: “Iha notísias fó sai buat aat mak barak, maibé haʼu iha informasaun neʼebé halo ita kontente.” Maski ema lakohi koʼalia ho Ita, keta sai laran-tun.
• Sempre lori tratu ka livru neʼebé ita bele fahe ba ema neʼebé hatudu interese.
Koko ida-neʼe durante fulan neʼe:
• Semana ida iha netik dala ida, koko atu komesa haklaken ba ema iha dalan la formál.