Ita bele haklaken iha situasaun naran deʼit!
1. (a) Haklaken iha dalan la formál envolve saida deʼit? (b) Husi ema neʼebé tuir reuniaun neʼe, ema naʼin-hira mak rona lia-loos ba dala primeiru liuhusi haklaken iha dalan la formál?
1 Iha ita-nia kongregasaun, ema naʼin-hira mak rona lia-loos ba dala primeiru liuhusi haklaken iha dalan la formál, ka iha situasaun naran deʼit? Karik ita hakfodak resposta ba pergunta neʼe. Haklaken iha dalan la formál, ka iha situasaun naran deʼit, envolve haklaken lia-foun diʼak ho ema neʼebé ita hasoru loroloron, hanesan kuandu halo viajen, kuandu vizita família ka viziñu, kuandu bá loja, iha eskola ka serbisu-fatin, ka iha situasaun seluk tan. Grupu ida ho ema hamutuk naʼin-200 liu, neʼebé hetan batizmu atu sai Testemuña ba Jeová, porsentu 40 husi sira mak rona lia-loos ba dala primeiru liuhusi haklaken iha dalan la formál! Ida-neʼe hatudu ho klaru katak haklaken iha dalan hanesan neʼe mós lori rezultadu diʼak.
2. Ezemplu saida deʼit kona-ba haklaken iha dalan la formál mak ita bele hetan iha Bíblia laran?
2 Iha tempu uluk, apóstolu sira mós haklaken iha dalan la formál. Porezemplu, kuandu Jesus laʼo liuhusi Samaria, nia haklaken ba feto samaritana ida neʼebé mai atu kuru bee iha Jacob nia bee-matan. (Joao 4:6-26) Filipe komesa haklaken ho ema-boot ida husi rai-Etiópia neʼebé lee daudauk husi livru Isaías hodi husu: “Ó hatene buat neʼebé ó lee daudaun?” (Apos 8:26-38) Kuandu apóstolu Paulo iha dadur laran iha Filipe, nia haklaken ba dadur nia naʼi-ulun. (Apos 16:23-34) No mós, kuandu Paulo dadur iha uma ida, “nia simu sira hotu neʼebé hakbesik nia, ho laran-metin no la hetan susar ruma, nia haklaken Maromak nia reinu no hanorin kona-ba Naʼi Jesus Kristu”. (Apos 28:30, 31) Ita mós bele haklaken iha dalan la formál, maski ita sente moe. Oinsá?
3. Saida mak bele ajuda ita se ita sente moe atu haklaken?
3 Atu komesa: Ita barak sente susar atu komesa koʼalia ho ema neʼebé ita la koñese. Maski ba ema neʼebé ita hatene ona, dala ruma ita sente moe atu koʼalia ho sira kona-ba lia-loos. Maibé, kuandu ita hanoin kleʼan kona-ba Maromak nia laran-diʼak, kona-ba bensaun barak neʼebé Maromak fó ba ninia atan sira, no kona-ba ema barak nia situasaun iha mundu aat neʼe, ida-neʼe sei book ita atu haklaken ba sira. (Jonas 4:11; Sal 40:5; Mt 13:52) Liután neʼe, ita bele husu ba Maromak Jeová atu ajuda ita sai “aten-barani”. (1 Tes 2:2) Irmaun ida neʼebé tuir eskola Gilead hatete: “Orasaun sempre ajuda haʼu kuandu haʼu sente susar atu koʼalia ba ema seluk.” Nuneʼe, se Ita sente moe atu haklaken, halo orasaun neʼebé badak.—Neem 2:4.
4. Kuandu ita haklaken iha dalan la formál, diʼak atu halo saida? Tanbasá?
4 Kuandu ita haklaken iha dalan la formál, ita la presiza halo buat neʼebé ita baibain halo kuandu ita haklaken husi uma ba uma. Diʼak atu komesa koʼalia ba ema kona-ba buat baibain deʼit, no la hanoin katak ita presiza haklaken ba sira. Haklaken-naʼin barak neʼebé halo hanesan neʼe hatete katak halo ida-neʼe ajuda sira atu mós koʼalia kona-ba lia-loos. Se ema neʼebé ita koʼalia daudauk ladún gosta atu koʼalia ho ita, ita la presiza obriga nia atu rona. Ho respeitu ita para koʼalia ho nia, no koko atu koʼalia fali ho ema seluk.
5. Saida mak ajuda irmán ida neʼebé moedór atu haklaken iha dalan la formál?
5 Kuandu sosa sasán iha merkadu, irmán ida neʼebé moedór hateke malu ho ema ida no hatudu oin-midar. Se ema neʼe mós hatudu oin-midar, irmán neʼe koʼalia ho liafuan badak deʼit. Se ema neʼe hatudu katak nia gosta, ida-neʼe fó aten-brani ba irmán neʼe atu koʼalia liután. Nia rona didiʼak kuandu ema koʼalia no koko atu buka-hatene kona-ba lia-loos saida mak bele book ema neʼe. Hodi halo nuneʼe, irmán neʼe fahe livru barak liután no komesa estuda Bíblia ho ema.
6. Oinsá mak ita bele hahú koʼalia ho ema?
6 Komesa koʼalia: Ita bele hatete saida deʼit atu komesa koʼalia ho ema? Kuandu Jesus koʼalia ho feto iha bee-matan, nia hahú koʼalia hodi husu feto neʼe atu fó bee ba nia atu hemu. (Joao 4:7) Nuneʼe, karik ita bele hahú koʼalia ho ema hodi kumprimenta sira ka husu pergunta ida. Nuʼudar ita koʼalia hamutuk ho sira, karik ita sei hetan oportunidade atu fahe matadalan ruma husi Bíblia ka bele kuda fini lia-loos nian iha sira-nia laran. (Ecle 11:6) Irmaun-irmán balu hetan susesu hodi koʼalia buat ruma neʼebé bele halo ema hakarak hatene liután no book sira atu husu pergunta. Porezemplu, kuandu bá konsulta, nuʼudar ita hein karik ita bele hahú koʼalia hodi hatete: “Haʼu kontente tebes kuandu iha futuru haʼu sei la moras tan.”
7. Oinsá mak haree didiʼak ema nia situasaun ajuda ita atu haklaken iha dalan la formál?
7 Kuandu ita haree didiʼak ema nia situasaun, ida-neʼe mós bele ajuda ita atu komesa koʼalia ho sira. Se ita haree inan-aman ida neʼebé iha oan neʼebé sempre hatudu hahalok diʼak, karik ita bele gaba inan-aman neʼe hodi husu: “Saida mak ajuda imi atu hetan susesu nuʼudar inan-aman?” Irmán ida rona kuandu nia kolega serbisu koʼalia ba malu no depois nia fahe informasaun husi Bíblia neʼebé tuir buat neʼebé ninia kolega sira koʼalia. Kuandu irmán neʼe rona katak ninia kolega feto ida planu atu kaben, nia fó ba feto neʼe livru Sedarlah! ida neʼebé koʼalia kona-ba oinsá atu prepara kazamentu. Ida-neʼe fó oportunidade ba irmán neʼe atu koʼalia liután kona-ba Bíblia ba feto neʼe.
8. Oinsá mak ita bele uza ita-nia livru sira atu hahú koʼalia?
8 Dalan seluk tan atu hahú koʼalia ho ema mak hodi lee ita-nia livru sira iha fatin neʼebé ema bele haree. Irmaun ida loke Livru Haklaken ka Sedarlah! iha lisaun neʼebé nia hanoin katak ema sei gosta no komesa lee ida-neʼe ho lian neineik. Se nia haree katak ema neʼebé besik haree ba livru neʼebé nia lee, nia husu pergunta ida ka koʼalia uitoan kona-ba buat neʼebé nia lee. Dala barak ida-neʼe fó oportunidade ba nia atu koʼalia ho ema no fó sasin ba sira. Iha serbisu-fatin ka eskola, se ita husik ita-nia livru ruma iha fatin neʼebé fasil atu ema haree, ida-neʼe bele loke dalan atu sira husu kona-ba neʼe.
9, 10. (a) Oinsá mak ita bele aproveita oportunidade hotu atu haklaken iha situasaun naran deʼit? (b) Ita koko halo saida deʼit atu haklaken iha dalan hanesan neʼe?
9 Buka oportunidade: Tanba ita hatene katak ita-nia serbisu haklaken lakleur sei ramata, ita labele sai baruk atu haklaken iha situasaun naran deʼit. Ita presiza aproveita oportunidade hotu atu haklaken lia-foun diʼak nuʼudar ita halaʼo ita-nia atividade loroloron nian. Hanoin kona-ba ema neʼebé karik ita sei hasoru, no hanoin kona-ba oinsá ita bele komesa koʼalia ho sira. Sempre lori Bíblia no livru sira neʼebé ita bele fahe ba ema neʼebé hatudu interese.—1 Ped 3:15.
10 Hodi uza matenek, haklaken-naʼin barak hetan oportunidade atubele haklaken iha dalan la formál. Irmán ida neʼebé hela iha apartamentu neʼebé iha seguransa, tuur iha liʼur no nia halimar hodi monta dezeñu ida kona-ba jardín furak. Kuandu ema haree nia no koʼalia kona-ba dezeñu furak neʼe, nia uza oportunidade neʼe atu fó-hatene Bíblia nia promesa kona-ba “lalehan foun no rai foun”. (Apok 21:1-4) Ita mós bele halo buat ruma atu hamosu oportunidade atu haklaken iha situasaun naran deʼit ka lae?
11. Oinsá mak ita bele koʼalia liután ho ema neʼebé ita hasoru kuandu ita haklaken iha situasaun naran deʼit?
11 Buka atu koʼalia liután: Se Ita koʼalia ho ema neʼebé gosta rona, buka oinsá atu koʼalia liután ho sira. Karik Ita bele hatete: “Haʼu kontente tebes atu koʼalia ho Ita. Oinsá mak haʼu bele kontaktu Ita hodi bele koʼalia fali? Haklaken-naʼin balu fó sira-nia diresaun no númeru telefone ba ema neʼebé sira koʼalia no hatete: “Haʼu kontente tebes atu koʼalia ho Ita. Se Ita hakarak hatene liután kona-ba buat neʼebé ita koʼalia hamutuk, Ita bele kontaktu haʼu ho númeru ida-neʼe.” Se Ita la bele kontaktu fali ema neʼe tanba nia hela dook, diʼak atu fó-hatene ba kongregasaun neʼebé tau matan ba área neʼebé ema neʼe hela.
12. (a) Tansá mak importante atu hakerek no hatama iha relatóriu oras neʼebé ita uza atu haklaken iha dalan la formál? (b) Rezultadu saida deʼit mak ita hetan ona liuhusi haklaken iha dalan la formál? (Haree kaixa “Haklaken iha dalan la formál lori rezultadu diʼak!”)
12 Ita presiza hakerek iha relatóriu oras neʼebé ita uza kuandu haklaken iha dalan la formál. Tan neʼe maski loroloron ita uza minutu balu deʼit, importante tebes atu hakerek ida-neʼe. Hanoin toʼok kona-ba ida-neʼe: Se haklaken-naʼin ida-idak uza minutu lima loroloron atu haklaken iha dalan la formál, ida-neʼe sei aumenta ita-nia oras haklaken nian hamutuk 17.000.000 liu fulan-fulan!
13. Saida mak tenke book ita atu haklaken iha situasaun naran deʼit?
13 Ita iha razaun importante tebes atu haklaken iha dalan la formál, neʼe mak domin ba Maromak no ba ema seluk. (Mt 22:37-39) Tanba ita agradese tebes ba Maromak Jeová nia hahalok furak sira no ho buat neʼebé nia hakarak halo ba ita, ida-neʼe book ita atu koʼalia kona-ba ‘glória no buat furak iha ninia ukun’. (Sal 145:7, 10-12) No mós, hodi hanoin tebes ema seluk, ida-neʼe book ita atu aproveita oportunidade hotu atu haklaken lia-foun diʼak ba ema nuʼudar tempu sei iha. (Rom 10:13, 14) Hodi prepara didiʼak no hanoin kona-ba ema neʼebé karik ita sei hasoru, ita hotu bele haklaken iha situasaun naran deʼit no karik ita mós bele haksolok atu ajuda ema neʼebé laran-moos atu hatene kona-ba lia-loos.
[Liafuan neʼebé foti husi pájina 4]
Karik diʼak atu halo planu atu hasoru ema no komesa koʼalia ho sira
[Liafuan neʼebé foti husi pájina 5]
Hodi uza matenek, haklaken-naʼin barak hetan oportunidade atu haklaken iha dalan la formál
[Kaixa iha pájina 5]
Buat neʼebé ita bele halo atubele komesa koʼalia ho ema
◼ Halo orasaun atu husu ajuda
◼ Hili ema neʼebé hatudu oin-midar no la ansi atu bá lalais
◼ Hateke malu ho ema, hatudu oin-midar, no hatudu interese hodi koʼalia uitoan
◼ Rona didiʼak
[Kaixa iha pájina 6]
Haklaken iha dalan la formál lori rezultadu diʼak!
• Nuʼudar irmaun ida hein hela ninia karreta neʼebé hadiʼa iha benkel, nia haklaken ba sira neʼebé besik fatin neʼe, no nia fó konvite ba sira atu bá rona diskursu públiku. Iha reuniaun boot iha tinan tuirmai, irmaun ida neʼebé nia la koñese hakbesik ba irmaun neʼe. Nia mak mane ida neʼebé simu konvite iha fatin atu hadiʼa karreta nian iha tinan kotuk liubá! Mane neʼe bá rona diskursu públiku no fó-hatene katak nia hakarak estuda Bíblia, no agora nia no ninia feen hetan ona batizmu.
• Irmán ida neʼebé hetan lia-loos liuhusi haklaken iha dalan la formál, haree ema neʼebé nia hasoru beibeik nuʼudar ninia haklaken-fatin espesiál. Haklaken-fatin espesiál neʼe inklui viziñu sira no inan-aman neʼebé nia hasoru iha eskola no iha enkontru ba inan-aman sira. Dala barak kuandu irmán neʼe fó-hatene nia mak sé, ho liafuan badak nia hatete katak Bíblia ajuda duni nia atu haboot ninia oan sira, no depois nia koʼalia fali kona-ba buat seluk. Maibé tanba nia komesa koʼalia iha dalan hanesan neʼe, nia sente katak fasil tebes atu koʼalia fali kona-ba Bíblia. Hodi halo hanesan neʼe, irmán neʼe ajuda ona ema naʼin-12 atu hetan batizmu.
• Kuandu mane ida neʼebé faʼan apólise-seguru nian vizita irmán ida, irmán neʼe aproveita oportunidade ida-neʼe atu fó sasin ba nia. Irmán neʼe husu ba mane neʼe se nia hakarak hetan saúde neʼebé diʼak, moris kontente, no moris rohan-laek. Mane neʼe hatán katak nia hakarak, no husu ba irmán: ‘Ita koʼalia kona-ba apólise-seguru saida?’ Irmán hatudu ba nia saida mak Bíblia promete no fó ba nia ita-nia livru ida, no mane neʼe lee hotu iha kalan ida deʼit. Tuirmai, mane neʼe komesa estuda Bíblia, tuir reuniaun sira, no ikusmai hetan batizmu.
• Kuandu saʼe aviaun, irmán ida komesa koʼalia ho feto neʼebé tuur iha nia sorin no fó sasin ba feto neʼe. Antes sira atu fahe malu, irmán neʼe fó ninia diresaun no númeru telefone ba feto neʼe no nia hatete: “Kuandu Testemuña ba Jeová vizita Ita-nia uma, husu sira atu estuda Bíblia ho Ita.” Loron tuirmai, Testemuña naʼin-rua vizita feto neʼe nia uma. Nia komesa kedas estuda Bíblia, laʼo ba oin iha lia-loos, hetan batizmu, no lakleur nia rasik mós estuda Bíblia ho ema naʼin-tolu.
• Irmaun matan-delek ida neʼebé tinan 100 no neʼebé hela iha ospitál ba ferik-katuas nian, hatete beibeik: “Ita presiza Maromak nia Governu.” Ida-neʼe book serbisu-naʼin no pasiente sira seluk atu husu pergunta, no fó oportunidade ba irmaun neʼe atu esplika ba sira saida mak Maromak nia Governu. Feto ida neʼebé serbisu iha ospitál neʼe husu ba irmaun neʼe saida mak nia sei halo iha mundu foun. Nia hatán: “Haʼu sei bele haree no laʼo fali no haʼu sei sunu haʼu-nia kadeira-roda.” Tanba matan-delek, irmaun husu feto neʼe atu lee ba nia livru fulan-fulan nian. Kuandu irmaun neʼe nia oan-feto mai vizita, feto neʼe husu lisensa se nia bele lori livru neʼe ba uma. Enfermeiru ida hatete ba irmaun nia oan-feto: “Ami-nia tema foun ba ospitál neʼe mak: ‘Ita presiza Maromak nia Governu.’”
• Irmán ida neʼebé tuir liña iha restaurante ida rona katuas balu neʼebé tuur besik, sira koʼalia kona-ba buat polítiku. Katuas ida hatete katak governu la bele rezolve ema nia problema sira. Irmán neʼe hatete ba nia an: ‘Neʼe mak haʼu-nia oportunidade.’ Nia halo orasaun badak no hakbesik katuas sira-neʼe. Depois nia fó-hatene nia mak sé, nia koʼalia ba sira kona-ba governu ida neʼebé sei rezolve ema nia problema hotu, neʼe mak Maromak nia Governu, no nia fó ba sira broxura neʼebé nia lori. Tuirmai, patraun husi restaurante neʼe mós hakbesik. Irmán neʼe hanoin katak patraun sei husu nia atu sai. Maibé, patraun hatete ba nia katak nia rona buat neʼebé nia hatete ba katuas sira-neʼe, no nia mós hakarak hetan broxura ida. Serbisu-naʼin ida mós rona, no ho matabeen nia hakbesik irmán neʼe. Nia dehan katak uluk nia estuda Bíblia, no agora nia hakarak komesa estuda fali.