Ita prontu atu fó sasin iha situasaun naran deʼit ka lae?
1. Istória saida mak hatudu katak fó sasin iha situasaun naran deʼit bele lori rezultadu diʼak?
1 Fó sasin iha situasaun naran deʼit bele lori rezultadu diʼak. Bíblia iha istória barak kona-ba ema neʼebé simu lia-foun diʼak iha fatin no situasaun saida deʼit. (Joao 4:7-15) Oinsá mak ita bele prepara ita-nia an atu fó sasin iha situasaun naran deʼit?
2. Oinsá mak hatais diʼak bele ajuda ita atu fó sasin?
2 Hatais diʼak: Kuandu ita sempre hatais ho diʼak, ida-neʼe ajuda ita la moe atu fó sasin iha situasaun hotu. (1 Tim 2:9, 10) Se ita sente katak ita hatais ladún diʼak nuʼudar Maromak nia atan, karik ita moe atu fó sasin kona-ba ita-nia fiar. Maibé se ita hatais moos no diʼak, ema sei haree ita la hanesan ho ema seluk. Porezemplu, feen-laʼen ida halo viajen ho hatais diʼak, no sira tuur besik mane Islam ida. Nia haree sira-nia hatais diʼak, no husu sira se sira ema kristaun ka lae. Rezultadu mak feen-laʼen neʼe bele koʼalia kona-ba Bíblia ho mane neʼe ba oras tolu.
3. Konta toʼok Ita-nia esperiénsia oinsá mak Ita tuir Jesus nia ezemplu hodi koʼalia ba ema?
3 Komesa koʼalia: Kuandu Jesus hasoru feto samaritana ida iha bee-matan, nia komesa koʼalia ba feto neʼe iha dalan neʼebé simples deʼit, hodi husu bee. Hanesan neʼe mós, karik ita bele komesa koʼalia ba ema hodi hatete buat neʼebé simples, ka husu pergunta ida neʼebé simples. Maski dala ruma ita sente taʼuk, maibé hodi sadere ba Maromak Jeová, ita bele koʼalia ba ema ho aten-brani.—1 Tes 2:2.
4. Oinsá mak Ita bele prepara an atu fó sasin iha situasaun naran deʼit?
4 Buka oportunidade: Haklaken-naʼin barak hetan oportunidade oioin atu fó sasin. Hanoin toʼok kona-ba Ita-nia situasaun no ema neʼebé baibain Ita hasoru. Lori Ita-nia Bíblia no mós tratu ka livru balu neʼebé diʼak. Haree didiʼak ema neʼebé besik Ita. Kuandu Ita hanoin uluk kona-ba oportunidade oioin neʼebé karik Ita hetan, Ita bele sai prontu atu fó sasin ho diʼak.—Flp 1:12-14; 1 Ped 3:15.
5. Tansá mak ita presiza prepara an didiʼak no aproveita oportunidade hotu atu fó sasin iha situasaun naran deʼit?
5 Ita hakarak aproveita oportunidade hotu atu fó sasin ba ema tanba ita iha razaun rua. Ita hadomi Maromak, no hadomi ita-nia maluk. (Mt 22:37-39) Tanba ita hatene katak ita-nia serbisu haklaken lakleur sei ramata, ita labele baruk atu fó sasin iha situasaun naran deʼit ba ema neʼebé seidauk hatene lia-loos. Ita presiza prepara an didiʼak no aproveita oportunidade hotu atu fahe lia-foun diʼak Reinu nian ba ema seluk antes tempu neʼe toʼo mai.—Rom 10:13, 14; 2 Tim 4:2.