Ita Testemuña ba tempu tomak
1. Jesus fó sasin ba feto iha bee-matan. Saida mak ita aprende husi istória neʼe?
1 Jesus laʼo oras barak ona. Nia kolen no hamrook. Toʼo iha rai Samaria nia sidade ida, nia dixípulu sira bá sosa ai-han, no Jesus tuur hein iha bee-matan. Jesus tama rai Samaria laʼós atu haklaken, nia laʼo liu deʼit atu bá rai Galileia, no iha Galileia mak nia sei halaʼo haklaken. Maski nuneʼe, nia uza oportunidade atu fó sasin ba feto ida neʼebé mai kuru bee. (Joao 4:5-14) Tansá? Tanba Jesus la para atu “fó sasin ho laran-metin” ba Maromak Jeová. (Apok 3:14) Ita mós halo tuir Jesus nia ezemplu hodi sai Testemuña ba Jeová tempu tomak.—1 Ped 2:21.
2. Oinsá mak ita bele prepara ita-nia an atu fó sasin iha situasaun naran deʼit?
2 Prepara didiʼak: Atubele prepara ita-nia an atu fó sasin iha situasaun naran deʼit, diʼak atu sempre lori ita-nia livru balu. Haklaken-naʼin barak prepara sira-nia an hodi lori tratu balu, no fahe tratu sira-neʼe kuandu bá loja, bainhira enxe gazolina, no mós iha situasaun oioin. (Ecle 11:6) Irmán ida neʼebé halo viajen beibeik sempre lori ninia Bíblia ho livru Bíblia Hanorin iha nia pasta, no nia koko atu koʼalia ba ema neʼebé tuur iha nia sorin.
3. Oinsá mak ita bele komesa atu koʼalia?
3 Komesa atu koʼalia: Kuandu atu fó sasin ba ema, ita la presiza koʼalia kedas kona-ba Bíblia. Kuandu Jesus koʼalia ba feto iha bee-matan, nia la hatete kedas katak nia mak Mesias. Nia husu bee deʼit, neʼe loke dalan ba feto neʼe atu husu pergunta. (Joao 4:7-9) Irmán ida mós hetan rezultadu diʼak hodi koʼalia hanesan neʼe atu fó sasin ba ema seluk. Kuandu ema ruma husu nia gosta selebra loron-boot ida, duké hatán kedas katak nia mak Testemuña ba Jeová ida neʼebé la selebra loron-boot neʼe, irmán neʼe hatete: “Haʼu foti desizaun ona atu la selebra loron-boot neʼe.” Baibain ema husu tansá, no ida-neʼe fó oportunidade atu fó sasin kona-ba lia-loos.
4. Tansá mak Mateus 28:18-20 fó laran-manas mai ita?
4 Maski Jesus ramata ona ninia serbisu haklaken iha mundu, maibé nia tau matan nafatin serbisu haklaken neʼebé ita halaʼo daudauk. (Mt 28:18-20) Tan neʼe, mai ita halo tuir Jesus nia ezemplu hodi sempre prontu atu fó sasin kona-ba ita-nia fiar, tanba ita Testemuña ba tempu tomak.—Ebr 10:23.