Pergunta husi haklaken-naʼin
◼ Iha reuniaun-fatin, saida mak ita ida-idak bele halo atu ita hotu bele aprende didiʼak? (Deut 31:12)
Ita hotu hakarak hatudu respeitu ba Maromak Jeová no buat neʼebé nia arranja liuhusi reuniaun sira hodi toʼo sedu iha reuniaun-fatin no prontu atu simu hanorin husi nia. Diʼak atu buka tuur-fatin iha oin, atu nuneʼe sira neʼebé iha oan kiʼik no sira neʼebé karik mai tarde bele tuur iha kotuk. Antes reuniaun hahú, diʼak atu taka telemovel nia lian atu la dada rona-naʼin nia atensaun. Ita hotu bele hamenus buat ruma neʼebé atrapalla iha reuniaun-fatin atu nuneʼe ita bele halaʼo reuniaun iha dalan neʼebé hatudu respeitu ba Maromak.—Ecle 5:1; Flp 2:4.
Kuandu ema foun foin hahú tuir reuniaun, ema iha kongregasaun neʼebé koñese sira bele tuur hamutuk ho sira. Ida-neʼe diʼak tebes se ema foun sira-neʼe iha oan kiʼik no sira-nia oan karik seidauk toman atu tuur hakmatek. Ba família sira neʼebé foin hahú tuir reuniaun karik ida-neʼe hanesan buat foun ba sira. Se nuneʼe, dala ruma sira gosta liu atu tuur iha kotuk atu nuneʼe la atrapalla ema seluk kuandu sira presiza sai ba liʼur atu tau matan ba oan sira neʼebé kiʼik. (Prov 22:6, 15) Kongregasaun la bele halo arranja hodi família ho oan sira neʼebé kiʼik tuur iha sala ida ketak hodi oan sira bele halo barullu. Baibain diʼak liu se inan-aman mak fó dixiplina no fó buat neʼebé oan presiza iha liʼur no depois ho oan tama fali.
Asistente sira hakarak ajuda hodi ema neʼebé tuir reuniaun bele tuur hakmatek hodi bele adora Maromak. Sira ajuda família sira no sira neʼebé karik mai tarde atu buka tuur-fatin neʼebé diʼak. Asistente sira hakarak halo sira-nia knaar iha dalan neʼebé diʼak no la dada atensaun kuandu ajuda atu buka tuur-fatin. Sira uza matenek kuandu hasoru situasaun ruma neʼebé mosu derrepente deʼit. Kuandu oan ida nia hahalok dada rona-naʼin nia atensaun, asistente fó ajuda ho laran-diʼak.
Ita ida-idak neʼebé tuir reuniaun atu adora Maromak bele serbisu hamutuk hodi ita hotu bele aprende didiʼak kona-ba Maromak Jeová no ninia hakarak atu lori mai mundu foun neʼebé iha dame no hakmatek.—Ebr 10:24, 25.