Serbisu neʼebé importante tebes
1. Tanba ita hafolin serbisu haklaken, ida-neʼe sei book ita atu halo saida?
1 Tansá mak ita rona beibeik konsellu atu uza ita-nia tempu, kbiit, no osan iha serbisu hakleken? Tanba serbisu neʼe importante tebes. Hodi hanoin didiʼak kona-ba rezultadu diʼak neʼebé ita hetan, neʼe sei halo ita haboot liután ita-nia hakarak atu hola parte iha serbisu neʼe.—Apos 20:24.
2. Oinsá mak ita-nia serbisu haklaken bele halo santu Maromak nia naran?
2 Halo santu Maromak nia naran: Iha serbisu haklaken ita fó-hatene ema katak Maromak Jeová nia Reinu, liuhusi Jesus Kristu nuʼudar liurai sei halakon ema nia governu sira no rezolve ema nia problema hotu. (Mt 6:9, 10) Ema sei hahiʼi Maromak Jeová, ida neʼebé bele halo ita livre husi sala no mate. (Isa 25:8; 33:24) Tanba ita lori nia naran, ema seluk neʼebé haree ita-nia laran-manas no hahalok diʼak, sira sei hahiʼi nia. (1 Ped 2:12) Ita sente kontente tebes atu haklaken ba mundu tomak kona-ba Ukun-Naʼin Boot Liu Hotu, Maromak Jeová!—Sal 83:18.
3. Sira neʼebé rona mensajen Reinu nian sei hetan bensaun saida deʼit?
3 Salva moris: Maromak Jeová “lakohi katak ema ida lakon, maibé atu ema hotu bele hakribi nia sala”. (2 Ped 3:9) Maibé, se ema ruma la hanorin sira, oinsá mak sira bele hatene saida mak Maromak Jeová nia haree kona-ba hahalok neʼebé loos no la loos? (Jonas 4:11; Rom 10:13-15) Kuandu ema simu lia-foun diʼak, ida-neʼe bele ajuda sira atu hadiʼa sira-nia moris tanba sira husik tiha hahalok neʼebé la diʼak. (Miq 4:1-4) Liután neʼe, sira iha esperansa atu hetan moris rohan-laek. Hodi badinas haklaken no hanorin ema, ita bele salva ita-nia an no sira neʼebé rona ita. (1 Tim 4:16) Ita hafolin tebes knaar furak neʼe hodi halaʼo serbisu importante neʼe!
4. Tansá mak ita presiza tau uluk serbisu haklaken kona-ba Reinu no hanorin ema atu sai dixípulu?
4 Lakleur tan terus boot sei mosu, no Maromak sei halakon mundu aat neʼe. Sira neʼebé adora Maromak Jeová sei hetan salvasaun. Entaun, serbisu haklaken no hanorin ema atu sai dixípulu mak importante tebes, no ita presiza halo ida-neʼe ho urjente atu ajuda sira neʼebé hakarak rona ita. Mai ita tau uluk serbisu importante neʼe iha ita-nia moris!—Mt 6:33.