Banati-tuir Jesus nia laran-manas iha serbisu haklaken

1. Oinsá mak Jeová nia povu la hanesan ho ema Kristaun falsu?

JEOVÁ nia povu haklaken liafuan diʼak ho laran-manas, no neʼe halo sira la hanesan ho ema Kristaun falsu. (Tito 2:14) Maibé, dala ruma Ita sente baruk atu haklaken. Karik Ita sente hanesan ho irmaun ida neʼebé halaʼo ninia knaar nuʼudar katuas kongregasaun ho badinas. Nia hatete: “Dala ruma haʼu la iha hakarak atu bá haklaken.”

2. Tanbasá dala ruma susar atu mantein ita-nia laran-manas iha serbisu haklaken?

² Karik ita gosta serbí Jeová iha dalan seluk duké halaʼo serbisu haklaken. Tanbasá? Tanba ita bele haree kedas rezultadu no sente kontente kuandu ita harii ka halo manutensaun ba Reuniaun-Fatin, ajuda irmaun-irmán sira neʼebé kona dezastre, ka anima irmaun-irmán sira. Ita sente dame no domin bainhira ita halaʼo knaar sira-neʼe hamutuk ho maluk sira. No irmaun-irmán sira sei hafolin tebes ita-nia serbisu. Maibé iha parte seluk, karik ita haklaken ona ba tinan barak iha fatin neʼebé hanesan no ladún iha ema neʼebé hakarak rona, ka karik ita hasoru ema neʼebé kontra ita. Ita mós hatene katak nuʼudar mundu nia rohan besik ona, ita sei hasoru susar liután. (Mt 10:22) Saida mak bele ajuda ita atu mantein ka aumenta ita-nia laran-manas iha serbisu haklaken?

3. Ita bele aprende saida husi Jesus nia ai-knanoik iha Lucas 13:​6-9?

³ Ita bele aprende husi Jesus nia ezemplu kona-ba haklaken ho laran-manas. Bainhira iha rai, Jesus nunka lakon ninia laran-manas. Maibé nuʼudar tempu liu daudaun, nia haklaken ho badinas liután. (Lee Lucas 13:​6-9.) Iha Jesus nia ai-knanoik, nia kompara ninia an hanesan ho mane neʼebé serbisu makaʼas durante tinan tolu atu tau matan ba ai-figeira, maski ai neʼe la fó fuan. Iha dalan neʼebé hanesan, Jesus uza maizumenus tinan tolu atu haklaken ba ema Judeu, maibé sira barak la simu. Maski nuneʼe, hanesan mane neʼebé la rende an hodi hein ai neʼe atu fó fuan, Jesus mós la rende an. Jesus haklaken ho laran-manas liután atu book ema Judeu nia laran.

4. Ita sei aprende dalan haat saida husi Jesus nia ezemplu?

⁴ Iha lisaun neʼe, ita sei koʼalia kona-ba oinsá Jesus hatudu laran-manas, liuliu durante fulan neen ikus iha rai. (Lc 10:1) Hodi aprende kona-ba Jesus nia hanorin no banati-tuir nia, neʼe sei ajuda ita atu nafatin laran-manas. Mai ita haree dalan haat neʼebé ita bele aprende husi Jesus: (1) Nia fokus ba Jeová nia hakarak, (2) nia tau atensaun ba Bíblia nia profesia, (3) nia sadere ba Jeová nia apoiu, (4) nia kontinua iha hanoin pozitivu katak sei iha ema neʼebé rona ba nia.

NIA FOKUS BA JEOVÁ NIA HAKARAK

5. Oinsá mak Jesus hatudu katak nia fokus atu halo Maromak nia hakarak?

⁵ Jesus laran-manas atu haklaken “liafuan diʼak kona-ba Maromak nia Ukun” tanba hatene katak neʼe mak serbisu neʼebé Maromak hakarak nia atu halo. (Lc 4:43) Haklaken mak buat neʼebé importante liu iha Jesus nia moris. Maski hela fulan balu deʼit iha rai, nia “laʼo husi sidade ida ba sidade seluk no husi knua ida ba knua seluk” atu hanorin ema seluk. (Lc 13:22) Nia mós treinu dixípulu barak liután atu haklaken.—Lc 10:1.

6. Oinsá mak serbisu haklaken iha ligasaun ho knaar seluk neʼebé ita halo? (Haree mós foto.)

⁶ Ohin loron mós serbisu haklaken mak knaar importante liu neʼebé Jeová no Jesus hakarak ita atu halo. (Mt 24:14; 28:​19, 20) Knaar naran deʼit neʼebé ita halo ba Jeová iha ligasaun ho serbisu haklaken. Porezemplu, harii Reuniaun-Fatin ka serbí iha Betel mak atu apoia serbisu haklaken. Ita apoia irmaun-irmán sira neʼebé kona dezastre hodi tau matan ba sira, no neʼe sei ajuda sira atu halaʼo fali atividade espirituál nian, inklui haklaken. Bainhira ita rekoñese katak serbisu haklaken mak knaar importante liu neʼebé Jeová fó mai ita, neʼe sei motiva ita atu haklaken beibeik. Katuas kongregasaun ida naran János iha rai-Ungria hatete: “Haʼu fó-hanoin beibeik haʼu-nia an katak la iha knaar seluk neʼebé bele troka fali serbisu haklaken. Neʼe mak knaar neʼebé importante liu.”

7. Tanbasá Jeová hakarak ita atu kontinua haklaken? (1 Timóteo 2:​3, 4)

⁷ Ita bele aumenta ita-nia laran-manas iha serbisu haklaken hodi halo tuir Jeová nia dalan kona-ba hanoin ema. Jeová hakarak ema barak liután atu rona no simu liafuan diʼak. (Lee 1 Timóteo 2:​3, 4.) Tan neʼe, Jeová treinu ita atu aumenta ita-nia matenek hodi fahe ninia mensajen neʼebé bele salva ema nia moris. Porezemplu, broxura Hadomi Ema—Hanorin Ema fó sujestaun oioin atu hahú konversa ho ema hodi bele ajuda sira sai Jesus nia dixípulu. Maski ema balu la simu kedas ita, maibé karik sei iha oportunidade ba sira atu simu antes terus boot remata. Karik buat neʼebé ita koʼalia ba sira agora sei book sira atu simu iha futuru. Maibé neʼe bele akontese só deʼit kuandu ita kontinua haklaken.

NIA TAU ATENSAUN BA BÍBLIA NIA PROFESIA

8. Bíblia nia profesia saida deʼit mak book Jesus atu uza didiʼak ninia tempu?

⁸ Jesus komprende katak Bíblia nia profesia sira sei kumpre duni. Nia hatene katak ninia haklaken sei laʼo ba tinan tolu ho balu deʼit. (Dan 9:​26, 27) Nia mós hatene profesia kona-ba bainhira no oinsá mak nia sei mate. (Lc 18:​31-34) Neʼe book Jesus atu uza didiʼak ninia tempu. Tan neʼe nia haklaken ho laran-manas atu bele kumpre ninia knaar.

9. Oinsá mak Bíblia nia profesia bele book ita atu haklaken ho urjente?

⁹ Se ita komprende Bíblia nia profesia, neʼe sei book ita atu haklaken ho laran-manas. Ita hatene katak lakleur tan mundu nia rohan sei mai. Bíblia fó-hatene kona-ba ema nia hahalok no akontesimentu sira durante loron ikus, no ita haree profesia sira-neʼe kumpre daudaun. Ita mós komprende Bíblia nia profesia kona-ba liurai súl no liurai norte neʼebé dudu malu “iha tempu nia rohan”, no neʼe refere ba Amérika no Bretaña neʼebé kontra hasoru Rúsia no ninia aliadu sira. (Dan 11:40) Ita mós hatene katak estátua nia ain parte kraik neʼebé Daniel 2:​43-45 fó sai reprezenta Amérika no Bretaña. Ita fiar katak hela tempu uitoan deʼit atu Maromak nia Ukun halakon ema nia governu hotu. Profesia sira-neʼe hatudu katak ita moris iha loron ikus nia rohan, no neʼe book ita atu haklaken ho urjente.

10. Iha dalan saida tan mak Bíblia nia profesia motiva ita atu kontinua haklaken?

¹⁰ Bíblia mós fó sai profesia kona-ba esperansa furak neʼebé ita hakarak fahe ba ema seluk. Irmán Carrie iha Repúblika Dominikana hatete: “Bainhira haʼu hanoin Jeová nia promesa furak kona-ba futuru, neʼe book haʼu atu haklaken ba ema seluk. Kuandu haʼu haree ema barak hasoru susar oioin, haʼu rekoñese katak sira presiza hatene kona-ba Jeová nia promesa sira.” Bíblia nia profesia anima ita atu la dada an tanba ita hatene katak Jeová apoia ita-nia serbisu haklaken. Irmán Leila iha rai-Ungria hatete: “Isaias 11:​6-9 book haʼu atu haklaken liafuan diʼak ba ema hotu, inklui ba ema neʼebé haʼu hanoin sei lakohi rona. Haʼu hatene katak ema bele halo mudansa ho Jeová nia ajuda.” Irmaun Christopher husi Zámbia hatete: “Hanesan Marcos 13:10 fó sai nanis ona, ema sei haklaken liafuan diʼak iha mundu tomak, no haʼu sente neʼe mak priviléjiu atu hola parte iha profesia neʼe.” Profesia saida mak motiva Ita atu kontinua haklaken?

NIA SADERE BA JEOVÁ NIA APOIU

11. Tanbasá Jesus presiza sadere ba Jeová nia ajuda atu kontinua haklaken ho laran-manas? (Lucas 12:​49, 53)

¹¹ Jesus sadere ba Jeová nia apoiu atu kontinua haklaken ho laran-manas. Maski Jesus koʼalia ho matenek no respeitu, nia hatene katak ema balu sei hirus no la simu ninia mensajen. (Lee Lucas 12:​49, 53.) Ulun-naʼin relijiaun sira la gosta buat neʼebé Jesus haklaken, no sira koko beibeik atu oho nia. (João 8:59; 10:​31, 39) Maski nuneʼe, Jesus kontinua haklaken tanba hatene katak Jeová sempre hamutuk ho nia. Nia hatete: “Haʼu laʼós mesak deʼit, Aman neʼebé haruka haʼu mai mak hamutuk ho haʼu. . . . Nia la husik haʼu mesak tanba haʼu sempre halo buat neʼebé fó ksolok ba nia.”—João 8:​16, 29.

12. Oinsá mak Jesus prepara dixípulu sira atu kontinua haklaken maski ema kontra?

¹² Jesus fó-hanoin dixípulu sira katak sira bele sadere ba Jeová nia apoiu. Nia hatete beibeik katak Jeová sei ajuda sira maski ema kontra. (Mt 10:​18-20; Lc 12:​11, 12) Tanba sei iha ema barak neʼebé kontra sira, Jesus mós anima sira atu matan-moris. (Mt 10:16; Lc 10:3) Nia haruka sira atu la obriga ema neʼebé lakohi rona. (Lc 10:​10, 11) Nia mós fó-hatene sira atu hasees an husi ema neʼebé fó-terus. (Mt 10:23) Maski Jesus laran-manas no tau fiar ba Jeová, maibé nia la tau ninia an iha perigu laran.—João 11:​53, 54.

13. Tanbasá Ita bele fiar katak Jeová sei ajuda Ita?

¹³ Ita presiza Jeová nia ajuda atu kontinua haklaken ho laran-manas maski ema kontra. (Apok 12:17) Tanbasá Ita bele fiar katak Jeová sei ajuda Ita? Hanoin toʼok Jesus nia orasaun iha João kapítulu 17. Jesus husu Jeová atu tau matan ba apóstolu sira, no Jeová hatán ninia orasaun. Livru Apóstolu fó sai oinsá Jeová ajuda apóstolu sira atu kontinua haklaken ho laran-manas maski ema fó-terus. Iha Jesus nia orasaun, nia mós husu Jeová atu tau matan ba ema seluk neʼebé tau fiar ba buat neʼebé apóstolu sira haklaken. Neʼe inklui Ita. Jeová kontinua hatán Jesus nia orasaun. Jeová sei ajuda Ita, hanesan nia ajuda ona apóstolu sira.—João 17:​11, 15, 20.

14. Tanbasá ita fiar katak ita bele kontinua haklaken ho laran-manas? (Haree mós foto.)

¹⁴ Nuʼudar mundu nia rohan besik daudaun, karik sei sai susar liu ba ita atu haklaken ho laran-manas, maibé ita sei hetan apoiu neʼebé ita presiza. (Lc 21:​12-15) Hanesan Jesus no ninia dixípulu sira, ita husik ema mak deside atu simu ka la simu, no ita mós lakohi diskute malu ho sira. Maski irmaun-irmán sira iha rai balu labele haklaken ho livre, maibé sira bele kontinua haklaken tanba sadere ba Jeová, laʼós ba sira-nia an rasik. Hanesan Jeová fó forsa ba ninia atan sira iha tempu uluk, nia mós fó forsa mai ita atu “bele halo serbisu haklaken toʼo hotu” hodi tuir ninia hakarak. (2 Tim 4:17) Ita fiar katak se Ita sadere ba Jeová, Ita bele kontinua haklaken ho laran-manas.

NIA KONTINUA IHA HANOIN POZITIVU

15. Saida mak hatudu katak Jesus iha hanoin pozitivu kona-ba haklaken?

¹⁵ Jesus sempre iha hanoin pozitivu kona-ba haklaken. Neʼe ajuda nia atu kontinua haklaken ho badinas. Porezemplu, bainhira Jesus haklaken ona maizumenus ba tinan ida, nia haree katak ema barak prontu atu simu liafuan diʼak, no nia hatete katak sira mak hanesan toʼos neʼebé prontu ona atu koʼa. (João 4:35) Maizumenus tinan ida liu tiha, nia hatete ba dixípulu sira: “Serbisu koʼa nian boot tebes.” (Mt 9:​37, 38) No liutiha tempu balu, nia énfaze tan: “Serbisu koʼa nian boot tebes . . . Husu Toʼos-Naʼin atu haruka tan ema hodi halo serbisu koʼa nian.” (Lc 10:2) Jesus fiar katak sei iha ema barak neʼebé rona ba liafuan diʼak, no nia haksolok bainhira sira halo nuneʼe.—Lc 10:21.

16. Oinsá mak Jesus nia ilustrasaun ajuda ita atu iha hanoin pozitivu kona-ba haklaken? (Lucas 13:​18-21) (Haree mós foto.)

¹⁶ Jesus mós hanorin dixípulu sira atu iha hanoin pozitivu kona-ba mensajen neʼebé sira haklaken tanba neʼe sei ajuda atu mantein sira-nia laran-manas. Porezemplu, hanoin toʼok kona-ba Jesus nia ilustrasaun rua. (Lee Lucas 13:​18-21.) Primeiru, Jesus kompara mensajen kona-ba Maromak nia Ukun hanesan mostarda-musan neʼebé kiʼik maibé sei kontinua buras toʼo sai boot hanesan ai-hun ida. Segundu, Jesus uza fermentu atu esplika oinsá mak mensajen kona-ba Maromak nia Ukun sei haklaken iha mundu tomak no troka ema nia moris maski ema seluk la haree kedas mudansa neʼe. Jesus nia ilustrasaun neʼe ajuda ninia dixípulu sira atu fiar katak mensajen neʼebé sira hatoʼo sei ajuda ema barak.

17. Ita iha razaun diʼak saida deʼit atu kontinua iha hanoin pozitivu kona-ba haklaken?

¹⁷ Bainhira ita hanoin kona-ba oinsá serbisu haklaken ajuda daudaun ema barak iha mundu tomak, neʼe book ita atu haklaken ho laran-manas. Tinan-tinan, ema millaun ba millaun mak tuir Memoriál no estuda Bíblia. Ema rihun ba rihun hetan batizmu no hola parte iha serbisu haklaken. Ita la hatene ema naʼin-hira tan mak sei simu mensajen neʼebé ita hatoʼo, maibé ita hatene katak Jeová halibur daudaun ema-lubun neʼebé sei hetan salvasaun. (Apok 7:​9, 14) Jeová mak Toʼos-Naʼin, no nia hatene katak iha ema barak mak sei simu liafuan diʼak. Tan neʼe, ita iha razaun diʼak atu kontinua haklaken.

18. Ita hakarak ema rekoñese saida kona-ba ita?

¹⁸ Ema sempre rekoñese Jesus nia dixípulu sira tanba sira haklaken ho laran-manas. Bainhira ema haree apóstolu sira haklaken ho aten-brani, “sira foin hatene katak ema sira-neʼe uluk hamutuk ho Jesus”. (Após 4:13) Ita mós hakarak haklaken ho aten-brani no laran-manas, hodi nuneʼe ema sei rekoñese katak ita banati-tuir Jesus nia laran-manas iha serbisu haklaken.