Kontinua haklaken tanba domin!

1. Saida mak ita aprende husi reuniaun tinan nian 2023?

IHA reuniaun tinan nian 2023,a ita rona esplikasaun foun balu, no ita mós rona anúnsiu kapás kona-ba ita-nia serbisu haklaken. Porezemplu, ita aprende katak karik ema balu sei iha oportunidade atu serbí Jeová hamutuk ninia povu depois Babilónia Boot lakon. Ita mós rona katak hahú fulan-Novembru 2023, haklaken-naʼin sira la presiza fó sai buat hotu neʼebé sira halo iha serbisu haklaken. Mudansa sira-neʼe hatudu katak serbisu haklaken la importante no la urjente liu hanesan uluk ka lae? Klaru katak lae!

2. Tanbasá mak serbisu haklaken sai urjente liután nuʼudar tempu liu daudaun? (Marcos 13:10)

² Nuʼudar tempu liu daudaun, ita-nia serbisu haklaken sai urjente liután. Tanbasá? Tanba hela tempu uitoan deʼit antes mundu nia rohan toʼo mai. Haree toʼok saida mak Jesus hatete nanis kona-ba serbisu haklaken iha loron ikus sira. (Lee Marcos 13:10.) Iha livru Mateus, Jesus mós hatete katak liafuan diʼak sei haklaken ba ema hotu iha mundu tomak antes “mundu nia rohan” toʼo mai. (Mt 24:14) Mundu nia rohan refere ba tempu neʼebé Satanás nia sistema aat neʼe sei lakon. Jeová deside nanis ona “kona-ba loron no oras”, no lakleur tan neʼe sei akontese. (Mt 24:36; 25:13; Após 1:7) Nuʼudar tempu liu daudaun, ita mós sai besik liután ba tempu neʼe. (Rom 13:11) Antes mundu nia rohan toʼo mai, ita tenke kontinua haklaken.

3. Saida mak book ita atu haklaken?

³ Nuʼudar ita hanoin kona-ba ita-nia serbisu haklaken, diʼak atu husu pergunta importante neʼe: Tanbasá mak ita haklaken liafuan diʼak? Resposta simples mak tanba domin. Bainhira ita haklaken, ita hatudu katak ita hadomi liafuan diʼak, hadomi ema, no importante liu mak ita hadomi Jeová no ninia naran. Mai ita buka-hatene kona-ba pontu sira-neʼe.

ITA HAKLAKEN TANBA ITA HADOMI LIAFUAN DIʼAK

4. Ita sei halo saida bainhira ita rona liafuan diʼak ruma?

⁴ Ita bele hanoin-hetan saida mak Ita sente bainhira Ita rona liafuan diʼak ruma? Karik Ita rona katak Ita-nia família ida foin partus bebé ida, ka ema ida fó ba Ita serbisu neʼebé Ita presiza. Klaru katak Ita hakarak tebes atu fahe tutan liafuan diʼak neʼe ba Ita-nia família no belun sira. Karik Ita mós halo ida-neʼe kuandu rona informasaun neʼebé furak liu, neʼe mak liafuan diʼak kona-ba Maromak nia Ukun.

5. Saida mak Ita sente kuandu Ita aprende lia-loos husi Bíblia ba dala primeiru? (Haree mós foto.)

⁵ Hanoin toʼok saida mak Ita sente bainhira Ita aprende lia-loos husi Bíblia ba dala primeiru. Porezemplu, Ita aprende katak Ita-nia Aman iha lalehan hadomi Ita, nia hakarak Ita atu sai parte ba ninia família neʼebé adora nia, no promete katak aban-bainrua sei la iha tan moras, terus, no iha mundu foun Ita bele hasoru fali ema neʼebé mate ona, no buat barak tan. (Mc 10:​29, 30; João 5:​28, 29; Rom 8:​38, 39; Apok 21:​3, 4) Lia-loos sira-neʼe halo Ita sente kontente tebes. (Lc 24:32) Ita gosta buat neʼebé Ita aprende, no Ita hakarak fahe tutan lia-loos furak neʼe ba ema seluk.—Kompara ho Jeremias 20:9.

6. Saida mak Ita aprende husi Ernest no Rose nia esperiénsia?

⁶ Haree toʼok esperiénsia ida husi Ernest.b Nia tinan sanulu bainhira ninia apá mate. Ernest hatete: “Haʼu hanoin: ‘Apá bá lalehan ka lae? Ka nia lakon deʼit ba nafatin?’ Haʼu laran-moras ba labarik seluk neʼebé sira-nia apá sei moris.” Ernest bá beibeik rate, hakneʼak iha ninia apá nia rate no halo orasaun: “Maromak, favór ida, haʼu hakarak hatene haʼu-nia apá iha neʼebé?” Maizumenus tinan 17 liutiha husi tempu neʼebé ninia apá mate, Ernest komesa estuda Bíblia. Nia komesa aprende katak ema neʼebé mate ona la hatene buat ida, sira toba deʼit, no Bíblia promete katak iha futuru sira sei moris hiʼas. (Ecle 9:​5, 10; Após 24:15) Ikusmai, nia hetan resposta ba ninia pergunta neʼebé nia husu ba tinan barak ona. Ernest gosta tebes lia-loos husi Bíblia neʼebé nia aprende. Ninia feen Rose mós aprende Bíblia, no gosta tebes buat neʼebé nia aprende. Iha tinan 1978 sira hetan batizmu. Sira ho laran-manas fó sai sira-nia fiar ba família, belun, no ba ema naran deʼit neʼebé hakarak rona. Rezultadu mak Ernest no Rose ajuda ema naʼin-70 liu atu hetan batizmu.

7. Domin ba lia-loos book ita atu halo saida? (Lucas 6:45)

⁷ Bainhira domin ba lia-loos sai buras iha ita-nia laran, neʼe book ita atu fahe ida-neʼe ba ema seluk. (Lee Lucas 6:45.) Ita mós sente hanesan Jesus nia dixípulu iha tempu uluk neʼebé hatete: “Ami labele para atu koʼalia kona-ba buat neʼebé ami haree no rona ona.” (Após 4:20) Ita hadomi tebes lia-loos, tan neʼe ita hakarak fahe ida-neʼe ba ema barak liután.

ITA HAKLAKEN TANBA ITA HADOMI EMA

8. Saida mak motiva ita atu haklaken ba ema kona-ba liafuan diʼak? (Haree kaixa “Hadomi Ema—Hanorin Ema”.) (Haree mós foto.)

⁸ Hanesan Jeová no ninia Oan-Mane, ita mós hadomi ema. (Prov 8:31; João 3:16) Ita hanoin tebes sira neʼebé “la hatene Maromak” no “la iha esperansa”. (Éf 2:12) Ema sira-neʼe mout iha problema oioin, no ita iha palampu neʼebé sira presiza, neʼe mak liafuan diʼak kona-ba Maromak nia Ukun. Tanba ita hadomi no hanoin ema, neʼe book ita atu haklaken ba sira kona-ba liafuan diʼak. Lia-loos folin-boot neʼe bele fó sira esperansa, ajuda sira iha sira-nia moris agora, no fó sira oportunidade atu hetan “moris loloos”, neʼe mak moris ba nafatin iha mundu foun.—1 Tim 6:19.

9. Ita fó avizu saida kona-ba futuru, no tanbasá? (Ezequiel 33:​7, 8)

⁹ Ita-nia domin ba ema mós book ita atu fó avizu ba sira kona-ba mundu nia rohan neʼebé besik ona. (Lee Ezequiel 33:​7, 8.) Ita hanoin tebes ita-nia viziñu sira, no mós família neʼebé seidauk serbí Jeová. Sira barak halaʼo sira-nia moris no la hatene kona-ba “terus boot” neʼebé sei akontese lakleur tan. Bíblia esplika katak “husi mundu hahú toʼo agora seidauk mosu terus hanesan neʼe, no depois neʼe sei la mosu fali”. (Mt 24:21) Ita hakarak sira hatene saida mak sei akontese durante tempu neʼe. Primeiru, relijiaun falsu sei lakon, no tuirmai sistema aat neʼe sei lakon iha funu Armagedon. (Apok 16:​14, 16; 17:​16, 17; 19:​11, 19, 20) Ita harohan katak ema barak sei rona ba ita-nia avizu no deside atu serbí Jeová hamutuk ho ita agora. Maibé, oinsá ho sira neʼebé la rona ba avizu neʼe, inklui ita-nia família neʼebé ita hadomi?

10. Tanbasá importante atu kontinua fó avizu ba ema?

¹⁰ Hanesan temi iha lisaun antes neʼe, se ema komesa tau fiar ba Jeová bainhira haree Babilónia Boot lakon, karik Jeová sei salva sira. Se nuneʼe, agora mak tempu neʼebé urjente liután atu kontinua fó avizu ba ema. Hanoin toʼok kona-ba neʼe: Buat neʼebé ita fó-hatene ba ema agora, karik sira sei hanoin-hetan ida-neʼe iha futuru. (Kompara ho Ezequiel 33:33.) Karik sira sei hanoin fali avizu neʼebé sira rona husi ita, no neʼe sei book sira atu adora Jeová hamutuk ho ita antes la iha tan oportunidade ba sira. Hanesan guarda komarka nian iha Filipe neʼebé troka ninia laran bainhira “rai nakdoko makaʼas”, karik sira balu neʼebé la rona ba avizu agora sei troka sira-nia laran bainhira haree Babilónia Boot lakon.—Após 16:​25-34.

ITA HAKLAKEN TANBA ITA HADOMI JEOVÁ NO NINIA NARAN

11. Oinsá mak ita fó glória, respeitu, no kbiit ba Jeová? (Apokalipse 4:11) (Haree mós foto.)

¹¹ Razaun importante liu tanbasá ita haklaken liafuan diʼak mak tanba hadomi Jeová no ninia naran. Ita haree serbisu haklaken nuʼudar dalan ida atu fó hahiʼi ba Maromak neʼebé ita hadomi. (Lee Apokalipse 4:11.) Ita ho laran tomak konkorda ho liafuan: ‘Maromak Jeová merese simu glória, respeitu, no kbiit’ husi ninia atan sira neʼebé laran-metin. Ita neʼebé serbí Jeová, fó glória no respeitu ba nia kuandu ita fó sai ba ema seluk katak nia “kria ona buat hotu” no nia mak fó moris mai ita. Ita fó kbiit tomak ba nia kuandu ita uza ita-nia tempu, enerjia, no buat neʼebé ita iha atu haklaken tuir ita-nia situasaun. (Mt 6:33; Lc 13:24; Kol 3:23) Ita gosta atu koʼalia kona-ba Maromak neʼebé ita hadomi, no domin book ita atu fó sai ba ema seluk kona-ba ninia naran no hahalok. Tanbasá?

12. Oinsá mak ita bele halo santu Jeová nia naran iha serbisu haklaken?

¹² Ita-nia domin ba Jeová book ita atu halo santu ninia naran. (Mt 6:9) Ita hakarak hola parte atu halo santu ninia naran neʼebé Satanás hafoʼer ona liuhusi lia-bosok. (Gén 3:​1-5; Job 2:4; João 8:44) Bainhira ita haklaken, ita hakarak tebes atu fó-hatene ba ema hotu kona-ba Jeová no ninia hahalok sira. Ita hakarak ema hotu hatene katak ninia hahalok furak liu mak domin, ninia dalan atu ukun mak loos no tuir justisa, no katak lakleur tan ninia Ukun sei halakon susar hotu no lori dame no kontente ba ema. (Sal 37:​10, 11, 29; 1 João 4:8) Bainhira ita defende Jeová nia reputasaun iha serbisu haklaken, ita halo santu ninia naran. No ita mós kontente tanba ita moris tuir duni ita-nia naran nuʼudar Testemuña ba Jeová. Tanbasá ita bele dehan nuneʼe?

13. Tanbasá ita orgullu tebes atu sai Testemuña ba Jeová? (Isaias 43:​10-12)

¹³ Jeová hili ita atu sai ninia “testemuña”. (Lee Isaias 43:​10-12.) Tinan barak liubá, iha karta ida husi Grupu Administradór neʼebé hatete: “Priviléjiu boot ida neʼebé ita hetan mak hodi sai Testemuña ba Jeová.”c Tanbasá ita bele dehan nuneʼe? Hanoin toʼok ilustrasaun tuirmai. Se Ita hakarak ema ida atu sai Ita-nia testemuña ka fó sasin iha tribunál, Ita sei hili ema neʼebé Ita koñese no tau fiar, no ema neʼebé iha reputasaun diʼak hodi nuneʼe ema seluk bele tau fiar ba nia. Hodi hili ita nuʼudar ninia Testemuña, Jeová hatudu katak nia koñese ita ho didiʼak, no nia tau fiar ba ita atu fó sasin katak nia deʼit mak Maromak neʼebé loos. Ita sente orgullu tebes atu sai ninia Testemuña, tan neʼe ita uza oportunidade hotu atu fó sai kona-ba ninia naran, no prova katak lia-bosok hotu kona-ba nia mak la loos. Hodi halo nuneʼe, ita moris tuir ita-nia naran nuʼudar Testemuña ba Jeová!—Sal 83:18; Rom 10:​13-15.

ITA SEI KONTINUA HAKLAKEN TOʼO MUNDU NIA ROHAN

14. Lakleur tan, saida mak sei akontese?

¹⁴ Ita hakarak tebes atu haree saida mak sei akontese lakleur tan! Ita hein katak ho Jeová nia bensaun ema barak liután sei simu lia-loos antes terus boot hahú. No mós ita sente kontente katak durante terus boot, karik ema barak sei husik Satanás nia mundu no adora Jeová hamutuk ho ita!—Após 13:48.

15-16. Ita sei kontinua halo saida, no toʼo bainhira?

¹⁵ Antes tempu neʼe toʼo mai, ita iha serbisu barak atu halo, no neʼe sei la repete fali. Ita iha priviléjiu atu haklaken liafuan diʼak kona-ba Maromak nia Ukun iha mundu tomak. Ita mós presiza kontinua fó avizu ba ema. Ema presiza hatene katak mundu nia rohan besik ona. No kuandu loron tesi-lia nian toʼo ona mai, sira sei hatene katak mensajen neʼebé ita haklaken mak mai husi Jeová.—Eze 38:23.

¹⁶ Saida mak ita deside metin atu halo? Tanba ita hadomi liafuan diʼak, hadomi ema, no importante liu hotu mak hadomi Jeová no ninia naran, neʼe sei book ita atu kontinua haklaken ho laran-manas no urjente toʼo Jeová dehan: “Para ona!”