Ajuda ema atu fiar lia-loos neʼebé ita hanorin
1. Kuandu hanorin Maromak nia Liafuan, saida mak ita hakarak halo?
1 Hanesan apóstolu Paulo, haklaken-naʼin neʼebé iha esperiénsia barak atu hanorin, hatene katak “tuir . . . lia-menon lia-loos nian” laʼós deʼit temi liafuan balu husi Bíblia. (2 Tim 2:15) Se nuneʼe, oinsá mak ita bele “buka atu halo [ema] fiar duni” lia-loos neʼebé ita hanorin?—Apos 28:23.
2. Oinsá mak ita bele ajuda rona-naʼin atu hafolin liután Maromak nia Liafuan?
2 Husik Maromak nia Liafuan atu koʼalia: Primeiru, dada rona-naʼin nia atensaun ba Bíblia atu sira bele hafolin Maromak nia matenek neʼebé iha Bíblia laran. Kuandu ita hatudu katak ita tau fiar ba Maromak nia Liafuan, ida-neʼe karik sei book sira atu rona didiʼak ba eskritura neʼebé ita lee. (Ebr 4:12) Ita bele hatete: “Mai ita buka-hatene saida mak Maromak nia hanoin kona-ba neʼe. Haree toʼok saida mak ninia Liafuan hatete.” Uza oportunidade hotu atu loke no lee husi Maromak nia Liafuan hodi nuneʼe ita husik Maromak nia Liafuan atu koʼalia ba sira.
3. Depois lee tiha eskritura ruma, saida mak ita bele halo atu ajuda rona-naʼin atu komprende?
3 Segundu, esplika eskritura neʼebé ita lee. Ema barak sente susar atu komprende eskritura neʼebé sira foin lee ba dala primeiru. Dala barak ita presiza esplika oinsá mak eskritura neʼe kona informasaun neʼebé ita koʼalia daudauk. (Lc 24:26, 27) Dada rona-naʼin nia atensaun ba liafuan importante husi eskritura neʼebé ita lee. Kuandu ita husu pergunta, ida-neʼe sei ajuda ita atu hatene se sira komprende ona pontu neʼebé importante ka lae.—Prov 20:5; Apos 8:30.
4. Saida mak hakat ikus atu ajuda ema atu fiar lia-loos neʼebé ita hanorin?
4 Ajuda rona-naʼin atu hanoin didiʼak: Terseiru, hakaʼas an atu book rona-naʼin nia neon no laran. Ajuda sira atu hatene oinsá mak eskritura neʼe kona ninia moris rasik. Kuandu ita ajuda rona-naʼin atu hanoin didiʼak kona-ba eskritura, ida-neʼe sei book sira atu hadiʼa sira-nia hanoin. (Apos 17:2-4; 19:8, MF) Porezemplu, depois lee tiha Salmo 83:18, ita bele koʼalia kona-ba oinsá hatene ema seluk nia naran mak hakat importante atu haburas relasaun neʼebé diʼak ho ema neʼe. Tuirmai ita bele husu: “Tuir Ita-nia hanoin, halo orasaun hodi uza Maromak nia naran bele halo Ita hakbesik liu ba nia ka lae?” Kuandu ita hatudu oinsá mak rona-naʼin bele uza eskritura neʼe iha sira-nia moris, sira sei haree katak eskritura sira iha folin boot duni. Hanorin iha dalan hanesan neʼe sei book ema neʼebé laran-moos atu adora Maromak neʼebé loos no moris, Maromak Jeová.—Jer 10:10.