Hakaʼas an atu lee ho didiʼak

HUSI ema naʼin-neen iha mundu tomak, iha ema naʼin-ida neʼebé la aprende atu lee. Ida-neʼe tanba sira ladún iha oportunidade atu bá eskola. No husi sira neʼebé iha oportunidade atu bá eskola, sira barak ladún lee beibeik. Maski nuneʼe, ita-nia kbiit atu lee bele ajuda duni ita hodi hatene kona-ba rai seluk, koñese ema seluk neʼebé bele fó esperiénsia barak mai ita, no mós atu hetan matenek neʼebé ajuda ita hodi tahan hasoru problema oioin iha ita-nia moris.

Kbiit atu lee ho didiʼak bele ajuda joven sira atu aprende buat barak husi sira-nia eskola. Kuandu sira buka serbisu, sira-nia kbiit atu lee kona serbisu neʼebé sira sei hetan no mós oras hira mak sira tenke serbisu atu apoia sira-nia moris. Feen sira neʼebé lee ho didiʼak iha matenek atu tau matan ba sira-nia família kona-ba hahán neʼebé iha vitamina, oinsá proteje família husi moras, no ajuda família atu moos nafatin. Inan neʼebé iha kbiit atu lee ho didiʼak bele mós kuda matenek iha ninia oan sira-nia hanoin.

Maibé buat diʼak liu neʼebé ita bele simu tanba ita lee ho didiʼak mak ita bele “hetan Maromak nia matenek”. (Provérbios [Amsal] 2:5) Serbisu oioin neʼebé ita halo ba Maromak envolve ita-nia kbiit atu lee. Iha kongregasaun, baibain ita lee Bíblia no livru sira neʼebé esplika kona-ba Bíblia. Atu hetan rezultadu diʼak iha ita-nia serbisu haklaken, ida-neʼe depende duni se ita lee ho didiʼak ka lae. No atu prepara ba serbisu sira-neʼe, ita presiza lee. Tan razaun neʼe, se ita iha toman atu lee beibeik, ita-nia relasaun ho Maromak bele sai metin liután.

Uza didiʼak oportunidade sira

Ema balu neʼebé aprende kona-ba Maromak nia dalan sira ladún iha edukasaun boot. Karik ema seluk presiza hanorin sira atu lee hodi sira bele laʼo ba oin iha lia-loos. Ka karik sira presiza ema seluk atu ajuda sira aumenta sira-nia kbiit atu lee. No se presiza, kongregasaun sei halo arranju atu hanorin ema neʼebé la hatene lee hodi uza livru Hakaʼas an atu aprende lee no hakerek. Ema rihun ba rihun aprende ona buat barak husi arranju neʼe. Tanba importante duni atu lee ho didiʼak, kongregasaun balu halo arranju atu iha kursu kona-ba oinsá lee ho didiʼak. Maski nuneʼe, ita ida-idak mós bele aumenta ita-nia matenek atu lee se loroloron ita lee ho lian makaʼas no hola parte iha Eskola Serbisu Kristaun nian, no mós fó komentáriu iha eskola neʼe.

Maibé, buat neʼebé triste mak televizaun no halimar video game halo ema barak sai baruk atu lee. No tanba haree televizaun beibeik no ladún lee barak, ida-neʼe karik hanetik ema atu lee ho didiʼak, hanoin ho loloos, no mós fó sai ninia hanoin iha dalan neʼebé moos.

“Atan laran-metin no matenek” halo livru sira neʼebé ajuda ita atu komprende Bíblia. Iha livru sira-neʼe, ita bele hetan informasaun barak neʼebé importante ba ita-nia relasaun ho Maromak. (Mateus 24:45; 1 Korinto 2:12, 13) Livru sira-neʼe mós ajuda ita atu hatene buat neʼebé mosu iha mundu neʼe no neʼe katak sá ba ita. Livru sira-neʼe ajuda ita atu hatene didiʼak buat neʼebé Maromak kria, no hanorin ita kona-ba oinsá ita bele tahan hasoru problema sira. Liután neʼe, livru sira-neʼe esplika ho didiʼak kona-ba oinsá atu serbí Maromak iha dalan neʼebé nia simu. Lee livru sira-neʼe bele ajuda ita atu laʼo ba oin iha lia-loos.

Tuir loloos, maski ema ida hatene lee ho didiʼak, maibé ida-neʼe la toʼo hodi lori kedas buat diʼak ba sira. Ita tenke uza kbiit atu lee iha dalan neʼebé diʼak. Hanesan ita hili ai-han, ita mós tenke hili informasaun neʼebé ita lee. Ita sei la han ai-han neʼebé la iha vitamina no bele estraga ita, loos ka lae? Nuneʼe mós, perigu atu lee livru sira neʼebé estraga ita-nia neon no laran. Bíblia fó matadalan kona-ba informasaun saida mak ita presiza hili atu lee. Antes halo desizaun kona-ba saida mak ita sei lee, hanoin kona-ba eskritura sira hanesan Eclesiastes (Pengkhotbah) 12:12, 13; Éfeso 4:22-24; 5:3, 4; Filipe 4:8; Koloso 2:8; 1 João 2:15-17; no 2 João 10.

Lee ho objetivu neʼebé loos

Hodi haree istória neʼebé hakerek iha Evanjellu sira, ita bele hatene tansá mak lee ho objetivu neʼebé loos mak importante. Porezemplu, iha Evanjellu Mateus, ita haree Jesus husu ulun-naʼin relijiaun nian neʼebé hatene didiʼak eskritura. Nia husu pergunta hanesan: “Imi lee tiha ona ka lae?” no “Imi seidauk lee buat neʼebé Eskritura sira dehan ka?” Nia halo ida-neʼe antes nia hatán ba sira-nia pergunta hodi uza eskritura sira. (Mateus 12:3, 5; 19:4; 21:16, 42; 22:31) Entaun, ita aprende katak se ita iha objetivu neʼebé sala kuandu ita lee, ita bele hetan ideia neʼebé sala ka la komprende pontu importante husi informasaun neʼe. Ema farizeu sira lee Eskritura tanba sira hanoin katak liuhusi Eskritura, sira bele hetan moris rohan-laek. Jesus dehan katak ema sei la simu moris rohan-laek se sira la hadomi Maromak no la simu Jesus nuʼudar ida neʼebé Maromak uza atu fó salvasaun. (João 5:39-43) Ema farizeu sira hanoin an deʼit, tan neʼe sira komprende sala buat neʼebé sira lee.

Ita hakarak lee Maromak Jeová nia Liafuan tanba ita hadomi nia. Domin hanesan neʼe sei book ita atu aprende kona-ba Maromak nia hakarak, tanba domin “haksolok ho lia-loos”. (1 Korinto 13:6) Maski uluk ita ladún gosta atu lee, maibé tanba ita hadomi Jeová ho ita-nia “neon tomak”, ida-neʼe sei book ita atu hakarak tebes simu matenek husi Maromak. (Mateus 22:37) Domin book ita atu hakarak lee, no hakarak neʼe sei book ita atu gosta aprende liután.

Hanoin kona-ba oinsá ita lee

Se ita hatene ona liafuan sira, ida-neʼe sei ajuda ita atu lee ho diʼak. Hanesan agora daudaun kuandu ita lee, ita haree liafuan sira no hanoin-hetan ninia arti. No se ita hatene liafuan barak tan, ita bele lee ho lalais. Duké para atu haree ba liafuan ida-idak, koko atu haree liafuan barak hamutuk. Nuʼudar ita aumenta ita-nia kbiit neʼe, ita sei haree katak ita bele komprende buat neʼebé ita lee.

Maibé, kuandu ita lee informasaun neʼebé kleʼan, ita bele hetan buat diʼak husi ida-neʼe se ita uza dalan seluk atu lee. Jeová fó konsellu ba Josué kona-ba oinsá atu lee Eskritura sira hodi dehan: “Livru ukun-fuan nian neʼe labele husik ó-nia ibun, no ó tenke lee ho lian neineik.” (Josué [Yosua] 1:8) Baibain kuandu ema hanoin kleʼan kona-ba informasaun ruma, sira koʼalia ho lian neineik. Tan neʼe, liafuan ebraiku neʼebé dehan “lee ho lian neineik” bele mós tradús nuʼudar “hanoin kleʼan”. (Salmo [Mazmur] 63:6; 77:12; 143:5) Kuandu hanoin kleʼan, ema tenke hanoin didiʼak no la ansi. Entaun, hodi lee ho lian neineik, ida-neʼe bele halo Maromak nia liafuan book ita-nia neon no laran. Bíblia iha liafuan husi profeta sira, iha konsellu, lia-dadolin, poezia, avizu kona-ba Maromak nia tesi-lia, informasaun kona-ba Maromak nia hakarak, no istória barak kona-ba ema nia moris; buat sira-neʼe folin-boot ba ema neʼebé hakarak atu laʼo iha Jeová nia dalan sira. Tan neʼe, diʼak duni atu lee Bíblia iha dalan neʼebé ajuda ita atu rai Maromak nia liafuan iha ita-nia neon no laran!

Oinsá atu tau atensaun

Nuʼudar ita lee, tau ita-nia an iha istória neʼebé ita lee daudaun. Koko atu haree ema iha istória neʼe, no sente hanesan ho ema sira-neʼe. Ida-neʼe karik fasil kuandu ita lee istória sira hanesan kona-ba David no Golias, neʼebé hakerek iha 1 Samuel, kapítulu 17. Maibé, ita mós bele halo moris liu istória sira kona-ba harii tenda santu no hili amlulik sira, hanesan hakerek iha livru Êxodo no Levítico. Porezemplu, ita bele hanoin kona-ba tenda santu nia luan no sasán neʼebé uza, ka hanoin katak ita horon insensu nia morin, fini neʼebé sona maran, no animál neʼebé hasaʼe nuʼudar sakrifísiu sunu nian. Hanoin toʼok kona-ba oinsá amlulik sira sente nuʼudar sira halaʼo sira-nia knaar furak sira! (Lucas 1:8-10) Se ita uza ita-nia kbiit atu hanoin no ita-nia sentimentu iha dalan neʼe, ida-neʼe sei ajuda ita atu komprende buat neʼebé ita lee no neʼe mós sai metin iha ita-nia neon.

Maibé se ita la kuidadu, kuandu ita lee ita-nia neon bele laʼo-lemo ba fatin seluk. Ita-nia matan hateke ba pájina neʼebé ita lee, maibé ita-nia neon iha fatin seluk. Porezemplu, múzika lian ka lae? Televizaun moris hela ka lae? Ema iha família laran koʼalia hela ka lae? Se bele, diʼak atu lee iha fatin neʼebé kalma. Maski nuneʼe, buat ruma iha ita-nia laran mós bele halo ita la tau atensaun ba buat neʼebé ita lee. Karik ita okupadu loos iha loron neʼe. Dala ruma ita-nia neon bele hanoin fali kona-ba atividade sira neʼebé ita halo iha loron neʼe! Maski diʼak atu hanoin fali buat sira-neʼe, maibé keta halo ida-neʼe kuandu ita lee hela. Porezemplu, karik ita hahú hodi tau atensaun ba buat neʼebé ita lee, ka karik ita halo uluk orasaun antes ita lee. Maibé kuandu ita lee, ita-nia neon komesa bá fali fatin seluk. Se nuneʼe, diʼak atu koko fali. Treinu ita-nia an atu tau atensaun ba buat neʼebé ita lee. Neineik-neineik, ita sei lee iha dalan neʼebé diʼak liután.

Saida mak ita bele halo se ita hetan liafuan neʼebé ita la komprende? Karik liafuan balu neʼebé ita la hatene, esplika ona iha informasaun neʼe. Ka karik ita bele komprende ninia arti hodi hanoin kona-ba liafuan sira antes no depois neʼe. Se lae, uza tempu atu haree liafuan neʼe iha disionáriu, ka tau marka ba liafuan neʼe no husu ba ema neʼebé hatene. Se ita halo nuneʼe, ida-neʼe sei aumenta liután liafuan sira neʼebé ita hatene no sei ajuda ita atu komprende buat neʼebé ita lee.

Lee iha ema nia oin

Kuandu apóstolu Paulo haruka Timóteo atu kontinua hakaʼas an atu lee, Paulo koʼalia kona-ba lee iha ema nia oin. (1 Timóteo 4:13) Atu lee ho didiʼak iha ema nia oin, neʼe laʼós deʼit katak temi liafuan sira iha livru laran. Maibé, lee-naʼin presiza komprende arti husi liafuan sira no mós komprende ideia husi informasaun neʼe. Se nia bele komprende didiʼak, ida-neʼe bele ajuda atu fó sai ideia neʼebé loos no hatudu sentimentu neʼebé loos. Atu halo ida-neʼe ita presiza prepara didiʼak no treinu nanis. Tan neʼe, Paulo dehan: “Kontinua hakaʼas an iha ó-nia knaar atu lee iha ema nia oin.” Ita bele aumenta liután ita-nia matenek kona-ba neʼe iha Eskola Serbisu Kristaun nian.

Uza tempu atu lee

Bíblia dehan: “Ema badinas nia planu sira sei hetan susesu, maibé ema sira neʼebé ansi sei sai kiak.” (Provérbios [Amsal] 21:5) Matadalan neʼe loos duni kona-ba ita-nia hakarak atu lee! Atu bele hetan “susesu”, ita presiza halo planu ho didiʼak hodi nuneʼe atividade seluk la hanetik ita atu lee.

Iha tempu saida mak ita lee? Ita hetan buat diʼak hodi lee iha dadeer-saan ka lae? Ka ita sente katak diʼak liu atu lee durante loron? Se ita bele uza minutu 15 ka 20 loroloron atu lee, ita sei hakfodak atu haree informasaun hira mak ita bele lee. Buat neʼebé importante mak halo ida-neʼe beibeik.

Tanbasá mak Jeová hili atu hakerek ninia hakarak furak sira iha livru ida? Ida-neʼe tanba nia hakarak atu ema bele buka-hatene no halo tuir. Ida-neʼe bele ajuda sira atu hanoin kona-ba Jeová nia serbisu furak sira, hodi sira konta neʼe ba sira-nia oan, no atu hanoin-hetan buat neʼebé Maromak halo. (Salmo [Mazmur] 78:5-7) Ita sei hafolin liu Jeová nia laran-diʼak neʼe se ita hakaʼas an hodi lee ninia Liafuan neʼebé bele fó moris ba ita.