Haksolok hodi lee Maromak nia Liafuan
KSOLOK ba ema neʼebé “gosta Jeová nia ukun-fuan”. Ema hanesan neʼe sei lee Maromak nia Liafuan “ho lian neineik loron no kalan”. (Salmo [Mazmur] 1:1, 2) Ita sente ona ksolok hanesan neʼe ka lae? Oinsá mak ita bele aumenta ita-nia ksolok atu lee Maromak nia Liafuan?
Rona didiʼak kuandu Jeová koʼalia
Keta lee liu deʼit liafuan sira neʼebé hakerek iha Bíblia laran. Hanoin kona-ba situasaun iha istória neʼebé ita lee. Hanoin kona-ba lian husi ema sira neʼebé iha istória neʼe. Nuʼudar ita lee kapítulu sira iha livru primeiru iha Bíblia, rona bá oinsá mak Jeová rasik esplika hakat ba hakat kona-ba buat neʼebé nia halo hodi prepara rai neʼe atu sai prontu ba ema. Rona didiʼak nuʼudar nia fó-hatene ba nia Oan-Mane, ninia Badain, katak tempu toʼo ona atu kria ema primeiru. Hanoin kona-ba situasaun neʼe: Adão no Eva kontra Maromak, no Maromak tesi lia ba sira, no tuirmai Maromak hasai sira husi paraízu. (Gênesis [Kejadian], kapítulu 1-3) Kuandu ita lee kona-ba oinsá lian ida husi lalehan fó sai katak Jesus Kristu mak Maromak nia Oan-Mane neʼebé nia hadomi tebes, uza tempu atu hanoin kleʼan kona-ba situasaun neʼe. Liafuan sira-neʼe book duni ita-nia laran kuandu ita hanoin kona-ba oinsá Maromak haruka Jesus ba mundu hodi fó nia moris atu salva ema. (Mateus 3:16, 17) Koko atu hanoin toʼok saida mak apóstolu João sente kuandu nia rona Jeová nia lian dehan: “Haree! Haʼu halo buat hotu sai foun.” (Apokalipse 21:5) Sin, hodi lee Maromak nia Liafuan iha dalan hanesan neʼe lori duni ksolok boot!
Se ita kontinua lee Bíblia, ita sei hatene Jeová nuʼudar Ida neʼebé iha glória boot no ita ema mak kiʼik tebes kuandu kompara ho nia. No ita sei hakarak liután atu hakbesik ba nia tanba nia hadomi ita, hatudu laran-sadiʼa mai ita, ajuda ita se ita ho haraik-an kontinua halo tuir ninia hakarak, no mós hatudu ba ita oinsá mak ita bele hetan susesu iha buat hotu neʼebé ita halo.—Josué (Yosua) 1:8; Salmo (Mazmur) 8:1; Isaías (Yesaya) 41:10.
Se ita uza tempu barak liután atu lee Bíblia, ita sei sente haksolok nuʼudar ita aumenta ita-nia matenek kona-ba Maromak nia hakarak ba ita. Kuandu buat neʼebé ita lee ajuda ita atu foti desizaun neʼebé matenek hodi hasoru problema sira, ita sei sente hanesan ema neʼebé hakerek salmu ida neʼebé dehan: “Ita-nia avizu sira mak buat neʼebé furak. Tan neʼe mak haʼu halo tuir sira.” (Salmo [Mazmur] 119:129) Ita mós sei sente haksolok nuʼudar ita aprende matadalan sira husi Eskritura neʼebé ajuda ita atu hadiʼa ita-nia hanoin no ita-nia hakarak hodi tuir Maromak nia dalan sira.—Isaías (Yesaya) 55:8, 9.
Bíblia iha matadalan kona-ba morál neʼebé proteje ita no hatudu dalan loos ba ita. Nuʼudar ita lee ida-neʼe, ita haree katak Jeová mak ita-nia Aman neʼebé hatene kona-ba problema sira neʼebé mosu tanba ita sala-naʼin. Nia lakohi atu ita hetan susar sira neʼebé mosu kuandu ita la halo tuir ninia matadalan neʼebé aas. Nia hanoin ita no hakarak ita atu moris kontente no iha dalan neʼebé diʼak liu. Kuandu ita lee Bíblia, ida-neʼe sei ajuda ita atu hafolin liután Maromak Jeová nuʼudar ita-nia Aman iha lalehan.
Lee Bíblia loroloron
Ema neʼebé hakerek salmu ida koʼalia kona-ba sira neʼebé lee Bíblia loroloron hodi dehan: “Nia sei hetan susesu iha buat hotu neʼebé nia halo.” (Salmo [Mazmur] 1:3) Sin, maski ita ema sala-naʼin, no ita hela iha Satanás nia mundu aat neʼe, no Diabu koko atu halo ita monu, maibé se ita lee no halo tuir Maromak nia Liafuan, ida-neʼe sei ajuda ita atu hetan susesu iha buat hotu neʼebé kona ita-nia relasaun ho Jeová.
Ita hetan tentasaun no susar barak husi mundu aat neʼe, entaun hodi estuda ita-nia Kriadór nia hanoin loroloron maski ba minutu balu deʼit, ida-neʼe bele hametin ita liután. Ema balu neʼebé tama komarka tanba sira-nia fiar, dala ruma hetan deʼit eskritura balu neʼebé hakerek iha jornál ruma. Sira tesi ida-neʼe, dekór, no hanoin kleʼan kona-ba neʼe. Jeová haraik bensaun ba sira-nia hakaʼas-an tanba sira halo buat neʼebé sira bele hodi hetan matenek husi Maromak nia Liafuan. (Mateus 5:3) Tuir loloos, ita barak nia situasaun la hanesan sira. Maski nuneʼe, ita keta hanoin katak hodi lee lalais deʼit versíkulu ida loroloron mak toʼo ona mai ita. Maibé, ita bele hetan bensaun se ita uza tempu atu lee parte balu husi Bíblia loroloron, hanoin kona-ba neʼe, no halo tuir ida-neʼe iha ita-nia moris.
Ita hotu hatene katak dala ruma buat balu bele hanetik ita-nia planu neʼebé ita halo ho didiʼak. Se ida-neʼe akontese, ita hakarak atu tau uluk buat neʼebé importante liu. Porezemplu, la iha ema ida neʼebé ho neon lakohi atu hemu bee ba loron ida ka rua. Entaun, maski buat naran deʼit mosu iha ita-nia moris, ita tenke hakaʼas an atu uza tempu hodi hemu bee lia-loos nian neʼebé halo ita sente kmaan.—Apóstolu 17:11.
Lee Bíblia tomak
Ita rasik lee ona Bíblia tomak ka lae? Ema balu sente katak susar atu lee Bíblia tomak husi Gênesis toʼo Apokalipse. Tan neʼe, ema barak neʼebé hakarak atu lee Bíblia tomak, sira hahú hodi lee husi Eskritura Lia-Gregu. Tanbasá? Karik sira halo ida-neʼe tanba sira sente katak fasil liu ba sira atu haree oinsá parte Bíblia nian neʼe ajuda duni sira atu laʼo tuir Kristu nia ain-fatin. Ka karik sira sente katak Eskritura Lia-Gregu nian mak uitoan deʼit atu lee. Maibé, depois sira lee hotu tiha livru 27 neʼe, sira komesa lee fali livru 39 husi Eskritura Lia-Ebraiku no sira sai gosta atu lee ida-neʼe. No kuandu sira lee hotu tiha Eskritura Lia-Ebraiku, sira iha ona toman atu lee Bíblia loroloron, entaun sira kontinua fali atu lee Eskritura Lia-Gregu ba dala segundu, no sira nunka para atu lee. Ami hein katak Ita-Boot mós bele sai toman atu lee Bíblia loroloron durante Ita-nia moris tomak.
Iha ita-nia família ka kongregasaun, iha ema ruma neʼebé la hatene lee ka lae? Se nuneʼe, karik ita bele husu se ita bele lee Bíblia ba sira loroloron. Ita rasik sei hetan buat diʼak husi ida-neʼe, no ema neʼe mós sei hetan buat diʼak nuʼudar nia hanoin kleʼan kona-ba saida mak nia rona no ikusmai halo tuir iha ninia moris rasik.—Apokalipse 1:3.
Nuʼudar ita laʼo ba oin, karik ita hakarak atu halo projetu oioin neʼebé iha relasaun ho ita-nia programa lee Bíblia nian. Projetu sira-neʼe balu bele ajuda ita atu haree oinsá mak parte Bíblia nian barak liga malu. Se ita-nia Bíblia iha referénsia iha klaran, ida-neʼe karik sei lori ita ba eskritura seluk neʼebé halo klaru liután eskritura neʼe ka karik lori ita ba eskritura neʼebé konta buat neʼebé hanesan. Ida-neʼe bele ajuda ita atu hatene situasaun neʼebé book ema atu hakerek salmu oioin ka karta oioin neʼebé Jesus Kristu nia apóstolu sira hakerek. Iha livru Pemahaman Alkitab ita bele hetan informasaun barak tebes neʼebé esplika kona-ba ema, fatin, no hahalok sira neʼebé temi iha Bíblia laran. No livru neʼe mós iha lista sira neʼebé fó sai kona-ba oinsá Bíblia nia profesia sai loos ona, hatudu kona-ba liurai no profeta ida-neʼebé mak moris iha tempu hanesan, no mós hatudu kona-ba data sira neʼebé istória ruma akontese.
Nuʼudar ita hanoin kleʼan kona-ba saida mak ita aprende, ita sei hatene razaun tansá situasaun ruma mosu iha Maromak nia povu nia leet. Ita mós sei hatene tansá Jeová halo buat ruma ba ninia povu. Ita sei hatene oinsá Jeová haree hahalok husi governu sira, povu sira, no ema ida-idak. Ida-neʼe sei ajuda duni ita atu komprende ninia hanoin sira.
Ita sei gosta liután istória ruma husi Bíblia kuandu ita hanoin kona-ba rai neʼebé situasaun ruma mosu. Mapa kona-ba rai sira iha Bíblia laran hatudu sai kona-ba rai nia luan no mós dook entre sidade sira. Porezemplu, ita hatene fatin ida-neʼebé mak ema Izraél hakur Tasi Mean? Rai neʼebé Maromak promete ninia luan mak oinsá? Kuandu Jesus halaʼo ninia serbisu iha rai, nia laʼo toʼo kilómetru hira? Saida deʼit mak Paulo haree kuandu nia halo ninia viajen misionáriu nian? Sin, mapa no mós informasaun kona-ba rai sira, bele halo ita-nia programa lee Bíblia nian sai moris liután. Entaun, ita bele hetan mapa kona-ba rai sira iha Bíblia laran iha neʼebé? Mapa balu ita bele hetan iha Bíblia Sagrada Tradusaun Mundu Foun. Livru Pemahaman iha mapa hamutuk 70, no mós iha índise kona-ba mapa sira iha pájina ikus iha Jilid 1 husi livru neʼe. Uza mós livru Indeks Publikasi Menara Pengawal atu haree mapa seluk tan. Maibé se ita la iha buat sira-neʼe, ita bele uza mapa sira neʼebé tau ona iha Livru Haklaken kuandu ita lee Bíblia.
Iha Eskritura Lia-Ebraiku, Liurai David fó hahiʼi ba Jeová hodi dehan: “Ita-nia hanoin sira mak iha folin-boot duni! Oh, Maromak, no sira barak tebes!” (Salmo [Mazmur] 139:17) Iha Eskritura Lia-Gregu, apóstolu Paulo hahiʼi Jeová tanba “liuhusi Kristu nia oin nia leno ona ita-nia laran hodi halo nabilan ho matenek neʼebé furak husi Maromak”. (2 Korinto 4:6) Maski David no Paulo moris iha tempu neʼebé la hanesan, maibé sira naʼin-rua haksolok ho Maromak nia Liafuan. Ita mós bele sente hanesan neʼe se ita uza tempu atu lee buat hotu neʼebé Jeová fó sai ona ba ita iha ninia Liafuan, Bíblia.