Hanorin sira neʼebé ladún hatene lee
1. Dala ruma ita hasoru ema hanesan saida kuandu ita halaʼo serbisu haklaken?
1 Kuandu ita halaʼo serbisu haklaken, dala ruma ita hasoru ema neʼebé hakarak hatene lia-loos, maibé sira ladún hatene lee. Se nuneʼe, ita bele halo saida?
2. Tanbasá mak ita hatudu respeitu ba ema neʼebé ladún hatene lee? Oinsá mak ita bele halo nuneʼe?
2 Hatudu respeitu ba ema seluk: Maromak Jeová haree liu mak ema nia laran laʼós se ema neʼe bá eskola ka lae. (1 Sam 16:7; Prov 21:2) Tan neʼe, ita labele hatún sira neʼebé ladún hatene lee. Se ita hatudu respeitu no pasiénsia ba ema hanesan neʼe, karik sira sei prontu atu simu hanorin kona-ba lia-loos. (1 Ped 3:15) Dalan ida neʼebé ita hatudu respeitu no pasiénsia mak hodi la obriga sira atu lee parágrafu no eskritura. Nuʼudar sira aprende lia-loos husi Bíblia, ida-neʼe bele book sira atu aprende lee diʼak liután, no sira sei haksolok atu lee Maromak nia Liafuan “ho lian neineik loron no kalan”.—Sal 1:2, 3.
3. Iha dalan saida deʼit mak ita bele hanorin sira neʼebé ladún hatene lee?
3 Dalan sira atu hanorin estudante: Dezeñu sira bele ajuda ita atu hanorin ho diʼak, no mós bele ajuda estudante atu hanoin-hetan buat neʼebé nia aprende. Karik Ita bele husu saida mak nia hanoin kona-ba dezeñu ida iha livru neʼebé Ita uza atu estuda. Tuirmai, husu pergunta balu kona-ba dezeñu neʼe atu hanorin lia-loos sira. Lee eskritura neʼebé apoia lia-loos sira-neʼe. Kuandu atu ramata estuda ida-idak, Ita mós bele uza dezeñu sira atu ajuda estudante hanoin fali hanorin sira neʼebé importante. Kuandu halaʼo estudu, koko atu la hanorin informasaun barak liu. Diʼak atu hanorin kona-ba tema no informasaun importante iha kapítulu ida-idak, no koko atu la koʼalia kona-ba informasaun seluk neʼebé la kona ho kapítulu neʼe. Loke Bíblia atu lee eskritura sira, no husu pergunta balu atu ajuda estudante komprende eskritura neʼebé ita lee. Se ita halo nuneʼe, bele book estudante atu aprende lee diʼak liután, no mós bele ajuda nia atubele estuda Bíblia mesak.
4. Oinsá mak ita bele ajuda ita-nia estudante atu hatene lee diʼak liután?
4 Dalan sira atu aprende lee: Ema neʼebé ladún hatene lee ka la bá eskola, dala ruma sira bele komprende no hanoin-hetan informasaun barak. Nuneʼe, Ita bele anima ema sira-neʼe atu rona didiʼak sira neʼebé hatene lee diʼak no lee tuir ho lian neineik, ida-neʼe sei ajuda sira atu hatene lee diʼak liután. No mós Ita bele uza broxura Hakaʼas an atu aprende Lee no Hakerek atu ajuda sira. Iha fatin balu, katuas sira iha kongregasaun organiza klase ida hodi hanorin ema atu lee no hakerek. Liuhusi dalan sira-neʼe, ita bele ajuda ema neʼebé ladún hatene lee atu komprende “sagrada eskritura”, neʼebé bele halo sira sai matenek no hetan salvasaun.—2 Tim 3:15.